Buka Utube Abiga ga.

1 Horu aubougige ramu bauge yau ga ihihive goisa, badivara bauge bera mati veitera eduge Dirava avahu, au senige auna orogisa. Bauge be yaberamu eyanu eduge yaka Dirava raki ihiro gevenu. 2 Eige unuhuna bia eya daure gahigeima, yauka Dirava gare ra yauki dodova; renu unuhuna inai gahigeima yauki au hedoke yauna misa. 3 Badivara bia yabera beta daure kikivara mage kiare koitava yau, eduge daure kiare koitava yau. Ana sigo veitenu biava maemane koitava au? A mage kiege, aka mage e hairadiva mimivara. 4 Badivara auka Dirava gare ihare koitavara ai dainehe oti vani au bougi. Eduge a daure kiege, aka sigora; badivara auka beta egira auki kamuka kava vima. Auka Dirava ga ihihivera, daure besibe gahare koitavara daure kiare koitava au. 5 Eige ama anaisa, beta daure e orogare dainehe, eduge uhu ananava tagera. 6 Edainehe gera aki tax maemima. Badivara bia gainage Dirava ga ihihive yabera, me era yauki kia vani aubougi. 7 Koita aubougi yauma yau damuna kisa, tax oti unuhuna tax mimi yau, meva kikiva oti meva kisa, sigoisa oti unuhuna sigamiga vanu, mage gahisa oti unuhuna mage mimivanu. 8 Anegu koitabe iaganebe kamuime, eduge bebe mage gahigeisa. Badivara unuhuna au gaika koitava mage gahima auki aena dibanara, 9 "Anegu ni muduka maguriva kime, anegu vahoime, anegu iaga be gahara vime," renu aena bena enu, aena oraki aubougi bougevenu, " Ai gaika koitava ama mage gahisa a avahu a mage gahare nagate." 10 Magera beta Koita be daure gahigavara. Edainehe gera, mage ra aenavara auki riaga gahanu. 11 Edainehe, aka vani iaga orogare dibanara, era a yagiya uhura urimare vani iagagani vara. Badivara no urugoi nanavane maguri noka misa, miare e ramu kahika goinu. 12 Vahi vadibua varamu otinu, Vani abaga varamu o kahika goinu. Edainehe no vadibu mevaya idigei gaise gosigeva, renu vani abaga ogonava mi kia. 13 No ogigi mage ragoha, vani abaga uhura nagate, beta gadiki daure hegiriva se gadiki omo daure va ragohisa; renu no negu yagiya daure gumava kime se gahusivara raho goisa, uhu daure meva kisa se gahusiva kisa. 14 Eduge Rohi Bauge Keriso Iesu mi aie goisa, anegu ahata maka meva anaime, se riaga gahime.