¹ Nona negu bina otado rorovanu? Nona dagedage daure kisa mage dainehe? ² Auna so beta varavare. No daureva seni hoge ragohane, nona orenaki mati uhurahe maguri ragohisa? ³ Yana dibana veitenu koita mudago yaberamu bapatiso manu Keriso Iesu uhura, renu au hogevehe bapatiso manu. ⁴ Yaukamu no abate gevenu, eige, au ruta bapatiso va oti hoge uhura. Au onaki varavane ra, Keriso ra hogeve gera auki magurivi goiraganu, au Mame haire uhura, eige no gainage noma maguri isage uhura ogisa. ⁵ Badivara nokamu auruta kobuga gaha au hogeve uhura nagate, noka au ruta kobuga gahigavara maguri isage uhura. ⁶ Noka dibanara, ni ahata maka maguri emene veramu au ruta hoge raganu, eige ahata maka daure varamu veite goisa. Enaki varavane badivara noka beta gaitana daure uhura maguri ragohisa. ⁷ Au hoge raganera magera badivara daureva ra veite goisa. ⁸ Nona hoge ragohanu Keriso ruta, riaga gahime noki, noka au ruta maguri ragohira vara. ⁹ Nokamu o bina dibana gahanu Keriso hogeva seni magurivi goiraganera, auka beta hoge ragi goiragi ravara; hoge ra hedoke veitera au ada. ¹⁰ Aukamu hoge raganu daureve dainehe, nega kobabe auki hoge raganu, ni dainehe. Eduge, au maguri vare maguri va, era Dirava dainehe gera. ¹¹ Guma kobuga ei, ya gainage yama dibana gahisa, yakamu hoge ragohanu daureva seni, eduge yakamu o maguri ragoha Dirava ruta Keriso Iesu uhura. ¹² Edainehe ya negu daure miege au yai magurive ruru gahime, yaka au gare ihisa. ¹³ Ya negu yai ahata make mi daure dainehe iagabe kime, maguri daureva dainehe. Eduge Dirava gahara vare meva kisa, hogeva seni magurivi goiragohane koitava ya nagate, renu yai ahata make mi Dirava moimisa, maguri riaga ahata makava kisa. ¹⁴ Ya negu daure miege auka yai magurive ruru gahime. Badivara yaka beta aena derikahu gera, eduge Dirava haire derikahu gera. ¹⁵ Eige nona? Nona daure kikivanu badivara noka beta aena derikahu gera, eduge au haire uhura. ¹⁶ Yana dibana veitenu ya ga ihihi koitava nagate yabera, yaka ga ihihi koitava yabera badivara koita e gare yaki ihe? Yaka daure ga ihihi koitava yabera, era hogera yaki yagoa, se ga ihihi koitava yabera, eraki riaga goima. ¹⁷ Eduge Dirava ra magera! Badivara yaka daure ga ihihi koitava yabera, eduge yakamu yai sorukehe ga ihinu, era ga guma ihihi guma magevara. ¹⁸ Yaukamu daure va seni veite gahanu, renu yakamu bina ga riaga ihihi koitava gahanu. ¹⁹ daka ata ra daki ga vima ahata maka rabura goiare dainehe. Badivara ya ahata maka meva kine, miro uhura renu aena anana veite, guma kobuga ei, yamu negubutu yai ahata makeva ga riaga iha aena ragoha. ²⁰ Badivara ya daure ga ihihiva ragohege, yaka ga riagave uhurahe gera. ²¹ Nega ei, otado idi tahakavana ya miege, ya negubutu variva va ragoha? Badivara maguri e damuna vara hogera. ²² Eduge Negugera yaka beta daure uhurahe gera renu yakamu Dirava ga ihihive gahanu. Damuna vara maguri behibehi. ²³ Badivara daure damuna vara hoge ra eduge Dirava haire ra maguri behibehi vera Keriso Iesu uhurahe.