¹ Paul, Iesu Keriso gamite be, ihiromonu auka apostle goisa renu Dirava hari mageve dainehe, ² Era au subuta ominua vane era au peroveta ronu aena gava uhurahe, ³ au Moe dainehe auka David besevera ahata makava. ⁴ Horu Aena uhurahe gera yauki riaga gahanu, ge auki hedo manu auka Dirava Moera eige auki hore va maguri vi goiraganu, Iesu Keriso ni Rohive. ⁵ Au dainehe ge noki vagahu renu ga ihihi gabidadama va manu, mata aubougi yau uhurehe, au dainehe. ⁶ Mata e aubougi yau uhurehe, akera yauki a ihiromonu aka Iesu Keriso ei dainehe. ⁷ Rome uhura gahava ya Dirava gahara vare au Aena gaha tuhe: Vagahu miahe renu mai ruta Dirava ni Mame renu Iesu Keriso ihehe. ⁸ Urugoi ge dakidi Dirava ve mage gahisa Iesu Keriso uhura yai bouge ge yai dainehe, yai gabidadama veramu mata inuhati manu. ⁹ Dirava ra do dibanera, di horu vehege daki au meve kima au Moe hari mage uhurahe, eige daki dagedage ai the roma. ¹⁰ Di imimive hege daki imimi vi roma guma bei daka mage misa, Dirava mageve uhura ai gasina orogisa. ¹¹ Badivara daka hari a eragisa, horu mageve bea a moimisa, a hero gahisa. ¹² Era, daka hero misa ya ruta bebe ni gabidadama ve uhura, yaie renu daie. ¹³ Negu daka beside vima yaka nune gahisa, di ogo nanuhe ya, daka urai yai gasina orogisa ( di gumage ra be yabeki koua), daka ya ruta idi tahaka be isa, da itahe gahava ruta kine nagate. ¹⁴ Dakamu iaga be idiganu Greek renu Koita nune yau, uhuvaka mage koitava yau renu uhuvaka veite gaha yau. ¹⁵ E dainehe, daka, daka geregereve hari mage roro Rome gaha yai. ¹⁶ Daka hari mage roro varivava veitera, era maguri gava riaga gahare gahava yau era, Jew urugahi, yau itahe Greek ya. ¹⁷ Badivara e uhurahe gera Dirava ieriri vare ra gabidadama oti gabidadamave gera, rone nagate, "Uhu ieriri vera gabidadama gahava yau era." ¹⁸ Dirava hedoke vava seni orogare ra au dibana veite gahava yau ada gera renu gabidadama ieriri veite gahava yau ada gera, ga riaga gahiga veite dainehe. ¹⁹ O badivara, no dibana ganane ra, Dirava ra yau ruta gera. Dirava ramu yau uhure abaga gahigevenu. ²⁰ Mata o kine oti orogi negu, au toage gumava ya, au behibehi hedoke renu va maguriva hedokava, yabara baobao vera, iaga ya ni tanahe no o eragevera e. Uhu anana bera veitera. ²¹ Badivara, yauka Dirava dibanera eduge yauka hegiri gahiga veitera auka Dirava, se mage roro veitera au. Eduge, yauki uhu anana nunenune ragohege, yau uhure yaberamu vadibuve gahanu. ²² Yau uhuvaka rahove ronu, eduge yaumu uhuvaka veite gahanu. ²³ Dirava haire yauki sivai koita yau uhurehe maemanu, uguha nagate, vasi ababu iaga gahanu, renu dara ragohare iaganiva gahanu. ²⁴ E dainehe Dirava ramu yau uhure sivai daure iagava yau, yauka ahata makava beta bebe matau gahigeisa. ²⁵ Era yaukaki Dirava ga riagave avanage gahanu, mata o maguriva gahara ragohane beta Dirava gahara ragohanu, auka mage behibehi, Amen. ²⁶ E dainehe, Dirava ramu besugei otinu variva havara koitava gahanu, yau maginuhe yaberamu mage sivai oti daure uhura. ²⁷ Guma kobuga ei, ata yaberamu yau guma mageve yau mabare ruga garegei, bebe yau gahara ragohanu. Ata o yaberaki variva maguri mati atabe au ki renu tohiva va daure va manu, yau kerereve dainehe. ²⁸ Yau Dirava riaga gahiga veite dainehe, Yau uhure yaberamu daure gahanu, yau beta mage be kisa. ²⁹ Yau uhure ra uhu anana daure, gahusi, avanage to bike ra. Yauka ho uhu, koita hoekisa, vagadau, uhu anana daure anana va ragohisa. ³⁰ Dirava riaga gahiga veite, vagava veite, yavahu yauka auhe, daure kiki uhu anana, yau iahuve yau gare otinu veite. ³¹ Yauka uhu anana mage veite, gabidadama hero veite, uhu anana daure, renu vagahu veite. ³² Yauka Dirava aenave dibana veitera, ena kiare gahava yabera hoge ra yauki yagoa. Yau ena kiare dainehe, koita be ya ena kiare tage yauki riaga gaha.