¹ Atabe ihiva Anania, au mabare Sapphira rutage yauki yau matame haevanu, ² yauki haevane nata ihinava kamoanu (au mabare tage dibanara) yauki ihinava mi ti Apostolo yau vasi gaikehe maemanu. ⁷ Vani yaga a biga-ga itaharahe, Au mabare ki rogi sirivanu, dibana veite otadovanu varavanu. ⁸ Peter raki beraganu, ya mata haevanu natava ogugenu,"auki ronu, io, egugera." ⁹ Ge Peter raki kironu, " orena kimena ai mobore ruta yai uhure kobua gahare Dirava Horuve toho ganu? nigaha ai mobore abatemenu gahavaia yabemu e uduani rahanu, yauka atage a hirivi haki ragiravara. " ¹⁰ Inono veite auki ari raganu Peter vasi gaikehe Hoge raganu. Ata e ya siri ragohanei, yauki hoeke behu ganu, yauki hirivi mioti au mobore gaika abatemenu. ¹¹ Dubu gahavaia renu harie ihine koitava ya sigoi raho riaga raganu. ¹² Hedo mati gago ragira me yabeki koita yau vagahe gagae gahege, Apostolo yau meve uhura. renu yau bouge kobuga gahime yauki Solomon Aena patavehe uyege. ¹³ Koita dadagava ra sigo ragohi yau ruga gahiga veitera; eduge, koita yabaki motea gahi gevege. ¹⁴ Dirava riaga gahege gahavaia, ata mati magi yabemu yau ruga gahege. ¹⁵ yauki mati komata ragohege gahavaia idigei orogo hakiragi gosi gevege, Peter hanevege au varivave yau ada goisa. ¹⁶ Jerusalema gaika ogoayau uhura ge Koita mudago yabaki dika mati sua daure yau uhurehe uyege gahavaia idigi oroge-ge, yauki mage gahege. ¹⁷ Eduge aena koita be, au soukuhe ruga ( Sadducees koitavaya); vagadau ragohege. ¹⁸ Yauki urihare apostolo e gahi gevare yauki idigi vadibu yagava gosi gevenu. ¹⁹ Vahige Rohi Bauge aneruva beraki ti vadibu yaga baoare nisigei hakivare. auki kiro gevenu, " ²⁰ ti dubu rahare maguri gava koita inuhati boriti gahi geiahe." ²¹ ga e ihare yauki va bao ragi oroge-ge uhura dubu uhura siri ragare hari mage roege. Eduge Aena koita e mati au ruta orogane koitava, yaberaki council mati Israel koita baugeva ihiro gevare, besu gevenu vadibu yagava ti Apostolo idigei orogisa. ²² Eduge yau otinei yauka vadibu yagava behu geige veitera, yauki goirago hare boriti raganu, ²³ " No otinei vadibu yagavara basubasu era mati, nitabata gahavaia gaina ge uduani rahirahera; eduge udua bao raganei,gahavaia yaba veitera." ²⁴ Aena gahavaia mati dubu biava ga e ihinei, yauki dau ragohanu. o makava na otavadoanu. ²⁵ Yau vagahe koita beraki boriti gahigei ronu, ya vadibu yagava gosi gevene koitava yabera ra i dubu gera yauki koita ga-ga geva." ²⁶ Eige dubu biava besu be gami raki au gamituhe ruga otare idigei goiragi oroganu, beta vagadau uhura, badivara koita yau sigore yauki ragohanu, yau negu muni tahu gahi geime. ²⁷ Idigei orogare, yauki council yau vagotonehe gahanu. Dubu bauge e raki bera gevenu, ²⁸ ronu," Nokamu ya boriti gahi gevenu yaka beta Iesu ihehe koita ga-ga geisa, eduge yai gare ramu Jerusalem uhurava tobo gahanu mati yaka gahara riaga ata o tagokera ni ada bohu ragisa." ²⁹ Eduge Peter renu apostles yabeki ronu,Dirava gare nona ihisa beta koita. ³⁰ No mamuhe yau Dirava ve raki Iesu iagemanu, yaki gamare, mi idi ada maemanu. ³¹ Dirava raki mi yagemi au vamagahe maemanu, auka Rohi mati maguri Biavara, Israel maguri gahi goiragisa, renu yau daure ve vagua gahi geisa. ³² Nokamu eraganu ni niehe, renu Horu Aena tagera, Dirava raki au riaga gahare koitava mohi gevenu. ³³ Yau ga e ihinei, yauki ho raho riaga raganu, yauka gahara riaga Apostolo e gahigei hoeki geisa. ³⁴ Eduge Pharisee koita be ihiva Gamaliel, auka aena uhuvaka biavara, koita inuhati geraki matau gaha, auki koita yau vagahe urimi ramare ronu so ata o nisigei haki ragohiahe. ³⁵ Auki ronu, Israel atava ya otavadoanu ya kisa roea koita o yau,yama gabidave misa. ³⁶ Subuta Theudas ramu urimi ramare ronu autage koita bera, koita be tinahu ababu ramu auruta gahanu. yauki gami hoekanu, au ruta gahane yaberamu kobakoba gahare veite gahanu. ³⁷ E itaharahe Galilee ata be ihiva Judas ramu urimanu, ihi mimi vanihe koita butu gevege, yaumu au itahe oginu. au tage hoge rage-ge, au itahe goine gahavaia yaberamu hana raganu. ³⁸ Yaka daki ya boriti gahi geima, yama koita o gare geisa, yau me kiare o ahata makava goiege, auka sebo ragira vara; ³⁹ Eduge au Dirava ai goiege, yaka beta riagahu sebose vara; yama gabidava misa ya negu Dirava gogai gahime." yauki ei gare gevenu. ⁴⁰ Yauki Apostolo ihiro gevare, gahi gevare, yauki aena gahi gevenu, yauka beta Iesu ihehe koita ga-ga gei goirago hisa. ⁴¹ Apostolo yabeki hegirita kansol gare gevenu badiva Iesu ihehe huhu nagohane dainehe. ⁴² E itaharahe yauki vani inuhati, dubu mati yaga kobakoba hari mage ro yoa ragohege, Keriso ra Iesu ra.