¹ Iaga e iau itahara, auki atena garemi korinto otinu. ² Eige auki iuda atabe behuanu, ponto beseva bera, ihivara akula, auka nuiki ge auki au mabare priscila ruta italia seni oroganu; klaudia gare iuda gaha iau bougei roma, uiarera adira e garehia dainehe. Ege paulo raki iau abu iau otinu; ³ au renu au moni mimi me’eve kobabe dainehe, auki iau ruga guramege mati me’e mimi kobua ragege. Iau me’e vera dabua iaga-iaga tigu gei gevara. ⁴ pura vani iau bouge, auka dubu ge auki haroro viege iuda gahaea renu helene gaha iau uhure auki iogei tohovege. ⁵ sila renu timoteo iaberaki makedonia seni kau raganu. Nega eige ra, paulo raki haroro berebe viege, iuda gaha boriti gahigei mage-mage gahigei roma, “iesu ra keriso ra.” ⁶ iaukaki au gare naminava rai vagadau ragege auki au hedokive bokivi iei-ie gahi roma, “iai taokera iavagu iai omotehe ge aune gurahisa, beta di kererevera, negu-butu otarera, daka bese nune iauge dane otisa. ⁷ auki bina gabu ei gurami oti ata be ihiva titio iostu iagehe guramanu, ata era dirava gurivege bera ,au iage tagera dubu gaika gera. ⁸ krispo dubu bauge tagera rohi-raho mi riaḡa gahima, au renu au iaga gahatuhea iau bougei. Korinto gaha dadaga gaina paulo harorove ihime iauki riaḡa gahi mati babatiso manu. ⁹ rohi-rahoa raki vahi paulo iago kiroma, “sigoisa gare! Ama gavisa, a negu ai avage kumuima. ¹⁰ badiva daka a ruta ge dakaki uma, koita bera beta a bara gahisa, beta a ga’a daure gahisa badiva di koita tuhe iabera dadagavara ogo o hura. ¹¹ eramu eige paulo raki lagani be, bata agorokiva ei guramime auki dirava ga’are boriti gahi gevege. ¹² galio akena vatetava rohiva viege ganaganahe, iuda gahaia raki au uhure kobua gahime iauki paulo gogai gahi, nisigami maoro gabua oti roia, ¹³ ata ora koita iau uhurera auki ima, taravatu dododo gumahe iauka dirava gurivisa e’e rome auki. ¹⁴ paulo ra garisa roege, galio raki iuda gaha kiroege roma, “iuda gaha ia, avani daure be se kerere raho be iau ia boriti gahi gevenu be daka iai gare ihige auka mage goine. ¹⁵ iduke ga’a e renu ihi-e ai taravatu berabeve iabera iavaguge iane iagoisa, daka beta iaga e iau maorove kikivara. ¹⁶ ena roiareme iauki gabu ei oia gevenu. ¹⁷ ege iauki bina iau bougei dubu bauge sostene kamoime iauki dadaba gahanu, a galio ra kara era auka anana veitera. ¹⁸ paulo ra vani rore be au sokuhe ruga ume auki bina vasiba gahigei iagatoiva guivi suria otinu. Priscila renu akula iaberaki bamoanu. Kenkria ge auki au omo hanake dodoanu badivara ga’a be ro’o maemane ra autera. ¹⁹ efeso ge iauki iau abigaga kaurage auki ei abua goreha garegevenu. Eige auki auvagu dubu gadimi me auki iuda gaha ruga gagaviege. ²⁰ iauka imigi auka ei guragu gamana visa iduke auka iau imimive ihihi veitera. ²¹ iauki vasiba gahigei, roma, “dirava uraige danema goiragi iai oroisa. Auki bina efeso garemanu. ²² kaisara ge iauki goromi me auki ierusalema gadimi ekalesia orea e mage gahigei me auki bina antioka otinu. ²³ nega tinabe ei gurami me auki ioa-ioa galatia renu frugia vateta va oti ekalesia orea e, iesu badina gahige gahavaea iau bougei eragei ma auki hero mohigevenu. ²⁴ hora ei gera iuda atabe ihi vara apolo, auki efeso otinu. Auki alesandria atava ra aonega te renu buka aena tagera auki dibana riagavara. ²⁵ ata ora be ramu rohiraro gumage uagatune dainehe iesu harike au roege ra hedo ruta mati rome auki saia-saia gahige. Iaga kobua be ra babatiso ra ioane babatiso ve guge auki dibana. ²⁶ auka dubu uhura ge auki au haroro ganaganave ronu uhu berebe ruta. Eige priscila renu akula iaberaki au gare ihime iauki nisigami oti iaga iau abu dirava gumage regu boriti gahi maoro gahanu. ²⁷ au urave auka rurui hanaivi akaia otisa, e’e dainehe, eige au sokuhe iaberaki iesu badina gahige gahavaea ei gurahare vasiba gahigeige, imigei iauma abidae gahisa. Au ei kaua nera dirava vagahuve dainehe ihine koitavaia auki durugei rahogahanu. ²⁸ badiva auki koita iau vagotohu iuda gaha namigei roma, “buka aena va gera aumu ro’o ḡaḡae gahanu, iesu ra keriso ra.