¹ paulo raki derebe renu lustera otinu. Lustera gera iesu kamoi berebe gahige atava bera me uiege, ihi vara timoteo ra.neinakavara iuda magi vara, au tagera dirava hari maḡeve mi berebe gahige bera, a mama kavara helene ata vara. ² varavara, lustera renu ikonia gahaea roege ra auka ata magevara. ³ paulo uravera timoteo ra au ruta otiti dainehe auki mi aenate gahanu. ⁴ iau ogobe-ogobe otegera apostolo renu ierusalema ata baugea taravatu roegevege iabera auki mohigevege se kiroegevege iauka badina gahigeisa. ⁵ eramu eige ekalesia orea iau gabidadamave raki raho goi otege mati vani gaugi iau atera dadaga goiege. ⁶ pirigia renu galatia vatetava iauki hanai gahigevenu badiva horu aenava raki boriti gahigevenu iauka beta asia vatetava hari mage rosa. ⁷ iau musia vateta egi-ahe kauragoha nera iau urave siriragi bitunia otisa, iduke iesu sua aenave raki rugugevenu. ⁸ eramu eige auki ena ogi hanairai troa otinu. ⁹ vahihe, paulo raki iago be vanu. Au iago vehe gera, makedonia ata be raki au vagotohu rami, imigi roma, “makedonia, oroi no iahegeve.” ¹⁰ iago e dainehe noki urihi makedonia otinu badivara ni dibanera dirava urave noka hari mage koita e boriti gahigeisa. ¹¹ eramu eige noki troa iagatoiva guirai maoro gahi samotrake otinu. Va tahige, noki mati rururai oti neapoli kau raganu. ¹² ei senige noki filipi otinu, auka makedonia ogo rahoa bera, roma, ga orea beraki au guramima. ¹³ pura vaniva noki ogo magua ogi hakiraḡi tinavai egiahu otinu badiva nokamu bina dibana gahanu guriguri gabua ra eigera. Gurahime noki ei magia bouragane gaga gevege. ¹⁴ eigera magi be ihivara ludia, dabua kerekare haevare magivara, au oge ra tuati ra. Auka dirava gurivege bera. Au ni gare ihinera, rohiraho raki uhurava mati baovi ge auki paulo gare uhuiamige. ¹⁵ au renu au iaga gaha tuhea babatiso mane itahara aukinu imigei, roma, “ia dibana daka rohiraho kamoi berebe gahare magiva goinu, nona beta di iagehe otige, iana beta ei uanu .” ¹⁶ vani bei no guriguri gabua otige uhura, sua daurea boloane maeagoa be raki no beiagei oroganu, maeago e biagu gahige koitavara kohu momoara auki miege au hei karave iau. ¹⁷ paulo itahege auki barai roege, “ata o abugera rohiraho hereagare mi ioa raḡare iabera, maguri gumavara iauki ro ioa raga. ¹⁸ vani momoara auki ena kiege. Paulo raki bina vagadauvime auki au sivai sua daure e namigi, roma iesu keriso ihehege dakaki aki roma, au hakiva. Hora eige sua daure e raki hakivanu. ¹⁹ biagu gahige koitava dibana au iaga mimi gabune dokoane negahe ge iauki paulo renu sila idigei, butugei hae gabua, ogo rohi iau vagotohu otinu. ²⁰ Maoro gaha iau vagotohu nisigei otime iauki roia, koita o abu gera iuda gahaia a ni ogehe kerere kia. ²¹ Renu iagabe riaḡa gahigeige mati badina gahigeige vara roma gahaia noi gera aena vara, iduke iaganiva iauki ḡaḡae gahigeva. ²² Garu gaha gainage raki gogai gahigei mati maoro gaha boriti gahigei iauka so iau dabuave darigei mati idigei gahigeisa. ²³ gahigei daure gahigeime iauki vadibu iagava gosigei nari koitava kiroea auka narigei saia gahigeisa. ²⁴ ga enaki hakivane dainehe auki abua goreha idigei uhura daitu bei kougei, vasika idi vakahu kahigei berebe gahigevenu. ²⁵ nemehege, paulo renu sila iaberaki guriguri raege renu nogoa dirava moteahege mati vadibu gaha gainage uhuia gevege. ²⁶ e uhura, vata raki duvi, vadibu iaga ta marere gahi, udua iau bougei baoragohi mati raro gainage iauvagu vahe ragohanu. ²⁷ vadibu iaga nariva iagia uhura nogai udua eragei baoragi rage gahanera auki kaia butui hakivi aukatai auvagu au gami hoekisa badiva au uhu ananave ra vadibu gaha iabera bina haki raganu. ²⁸ iduke paulo raki barai roma, “avagu a hoekisa gare, badiva, nokamu ni bougei o ianu.” ²⁹ vadibu iaga narivege raki kede totoa vime auki rurui sirivi paulo renusila iau vagotohu gurami me auki gabubu viege. ³⁰ auki bina nisigei hakivi beragei roma, “rohia, dana orenaki maguri mimivanu?” ³¹ iauki kiroia, “iesu keriso mi riaḡa gahime anema maguri misa, a renu ai iaga gahatuhea.” ³² rohiraho ga maḡeve ra iuaki au renu au iaga gahatuhea iau bougei boriti gahi gevenu. ³³ vahi ei, auki idigei oti iau berove ketogei ge iauki bina au renu au iaga gahatuhe iau bougei babatiso gahigevenu. ³⁴ auki idigei oti iaga iauga dabara be kiege iauki bina tamuta raganu. Au iaga gahatuhe ruga iauka hegiri herea, badiva iau dirava gabidadama gahane dainehe. ³⁵ vagutu, maoro koita iaberaki iau ga boriti gahatuhe besugei, roia, ata e iabema otisa. ³⁶ vadibu iaga nariva raki paulo kiroma, “maoro gaha iau gareraiaumu siai gahanu, daka ia rere geisa, eramu eige iaka bina mai mage ruta ogi hakirai otitivara. ³⁷ iduke paulo raki roma, “noka roma basileiave gahavaea auka so ganagana maoro be no mohigeige veitehe hutuma iau vagotohu no dadaba gahigeige kava rai, vadibu iagava no kougei, a negu butu iau mati vahoro no besu gevarena?” Veite makavara. Iauvagu ge iaune oroi no nisigei haki raisa. ³⁸ boriti gaha iaberaki iau gare mi oti maoro gaha e mohigevenu. Iau dibana, koita e abugera roma basileiave gahavaea negahe gera iauki siḡo raganu. ³⁹ iauki bina oti abua goreha gaḡa gei mage-mage gahigei me iauki nisigei hakirai mati imigei roia, iauka ogo e garehisa. ⁴⁰ vadibu iagava hakiraime iauki iau abu ludia iagehe otinu. Eige iauki iau sokuhe davari gahigei mati hero mimi gava goadate gahigeime iauki bina filipi garehanu.