¹ Paul, Keriso Iesu raki ihiromonu auka apostle goisa Dirava rone dainehe, renu Sosthenes ni ogo nane, ² oti Dirava dubuve Corinth uhura, Iesu Keriso aena gahi gevene koitava ya, yauka aena koitava ya yaubougi, renu idigevenu ogo kobakoba uhura, ogore yabena Rohi Bauge Keriso Iesu ihe roia, auka tau Rohi Bauge ve renu goie. ³ Mage renu mai ra yaiera Dirava ni Mame renu Rohi Bauge na ya mohigeisa. ⁴ Yai dainehe ge daki vani inuhati Rohi Bauge motea gahima makavara Au mageve Au moe Keriso Iesu ihehe. ⁵ Yaga inuhati uhura yaki taboro gahanu Au dainehe ga va mata uhuvaka. ⁶ Eige Keriso harike yaumu riaga gahanu ni vagahe. ⁷ E dainehe aka horu aena meva uhurahe a uiare Rohi Bauge Iesu Keriso ororove aka narivima. ⁸ Auka a hero gahigavara oti dokonahe, eige aka daure veite ra Rohi Bauge vani be orogare ei. ⁹ Dirava ra gabidadama vara, yaukaki a ihiromonu au ruta no ragohisa au Moe Iesu Keriso ni Rohive, au ihehe. ¹⁰ Di sokuhe ya, yakera daki ya hero gahigeime Iesu Keriso ihehe, yaka yai bouge riaga gahisa, yaka beta bebe ihie gahi geigevara. Yaka kobuga gahisa uhu anana kobugava. ¹¹ Daka dibanara yai magurivena orena vivivenu, di sokuhe ya, Chole koitatuhe yaberamu daki ronu yaka bebe ihie gahigeva. ¹² Ga riagavara: Bera roma, "Daka Paul ruta gera," se "Daka Cepas ruta gera," se " Daka Keriso ruta gera." ¹³ Keriso na be ruga renu? Paul na ai dainehe gena yau gamanu? Paul ihehe gena yau a bapatiso gahanu? ¹⁴ Dirava mage riaga vara daka yabe ya bapatiso gahi geige veitera, Eduge Crispus and Gaius. ¹⁵ E dainehe, bera beta rorovara, di ihehe gera yauki a bapatiso gahanu. ¹⁶ (Renu Stephanas yaga koita tuhe yabera, daki bapatiso gahigevenu. E adahe, Daka dibana veitera dana be yainage bapatiso gahigevenu se veitenu.) ¹⁷ Keriso ra beta bapatiso dainehege auki da besugane, hari mage rorovara auki da besuganu-beta uhuvaka gava, Eduge Keriso satauro vera beta au hedoke garegavara. ¹⁸ Satauro badivara uhuvaka veite koitava ya huhu nagohare yau era. Yau vagotonehe maguri ragohare yau era, era Dirava hedokera. ¹⁹ Yaukamu torevanu, "Daka uhuvaka koitava yau uhuvake sebose vara. yau uhu anana mageve mi gaise maemavara. ²⁰ Uhuvaka koitavara oreigenu? Uhuvaka, gava vare koitavana oreigenu? Vata o ga vare koitavana orenu? Dirava na beta vata uhuvakava mi sivai ga maka veite va maemanu? ²¹ Vata o uhuvakava Dirava dibane veite dainehe, Dirava raki uhuvaka veite gava uhura koita be maguri gahigevenu. ²² Eige Jew yabera erara veite iaganiva erara gahava ragoha, a Greek yabera uhuvaka gahara ragohanu. ²³ Eduge, noka Iesu Keriso sataurova hoge ragane hari mageva roia, era Jew koitava yau isuke miare ra renu Gentile yabera uhuvaka veiteva roia . ²⁴ Eduge ogore yabena Dirava ihiro gevenu, Jew renu Greek ya, noka Keriso noki roia yauka Dirava hedoke renu uhuvake. ²⁵ Badivara , Rohi Bauge uhuvaka veitevera ra koita yau uhuvake auki soiganu, mati Dirava au hero veitevera koita yau herove auki soiganu. ²⁶ Di sokuheya, yai totove eragiahe, Yaka dadaga veitera yai uhuvaka ahata makava. Ya dadaga veiete yaka hero veitera. Dadaga yaka vara mage veitera. ²⁷ Eduge Dirava raki vata o ada uhuvaka veite iaganiva idigi uhuvaka koitava ya variva gahigevenu. Dirava ra vata ada uhuvaka veite iaganiva uki idigei herote gahava ya variva gahigevene. ²⁸ Dirava raki dahida veite renu ihi veite idigevenu. Dahida veite iaganiva gainage idigevenu, iagabe veite iaganiva yabera mati iaga be yabera. ²⁹ Au onakine makavara ahata maka maguri vara beta bia goisa au vairenehe. ³⁰ Au dainehege, noki Iesu Keriso ruta kobuga gahanu. Rohi Bauge raki Keriso Iesu gagae kinu, auka ni uhuvake goisa. Noka yeriri ve gahisa, aena uhurahe renu maguri isage misa. ³¹ Ga Aena va ra onakime auki ronu unuhuna moteamotea vima, auma Rohi Bauge motea gahisa.