¹ Ige Anelu keu oo kele ukolikoli ee ke vai da haivulu, ee keu taeai ulu. Ee keu DILAVAta mamoeve taea telona valale laluvai lolu. ² Hanai loi laluvai vai kuvau minala lolu, ige ee keu vaki voleo ukolikoli idiu lavilu ige eu vaki voleo voleu lavilu isi loi voleta bakutoai lavisi vae tilu. Iale lahani igaligalile, bata igaligali uvule idi keule baiai tigei ige vanave keu ata lu mauli vavevalela keu. ³ Iale oo keveo aveve toelaea ue solilu isito oo kele DILAVAu telonata mamoe vileta uale kele ea usege atavea loi guliguliai hoeaseaveva. ⁴ Ataeale niabe ivasege iviabeule valiabele ui. ⁵ Oo kele vaviu ue solilu ige ataea ba lameba vaulivelu bele, valiu ba kalulivelu bele kosealelu DILAVAu au voti atagai uge ataeale kosive olisi avoluvita ui hauve aevigei. ⁶ Anelu keu dalu loui avoe a koto bahata kisaiale keu leleve ulala, DILAVAu ba kalevalivelu bele isito aule vali bahata ke aevigei. DILAVAu au munana tuvu agisi au beloveta vavegeale keu au anelu hanavai, olale aike vadeuia loiveve ke loui ata haivege abo vadeu aike loiveve ke dibaevei. ⁷ Anelu keu kateai louge IESU loui avoe da louge evive, da lolivelu ale keu vuguvugualu. Iale olea buka kou louale ke eviale keale sisilai u dua ai. ⁸ Dau di ivila Dioni da aveve ke bahata ivei koto keta evilu aveve keu vesuge da kome bokoai vata bisi Anelu leu da haivuale ke hoeaseavalu. Igeto eu loui avoe ke alive DILAVA igali hoeaseava, lai loea DILAVAu haukala avale lailola koea. Ige ai kakoluvuia Beloveta ata oliale isi olea buka kou nona evisi lovai tiale keali lai loi mama kitae DILAVA ke ula hoeaseavai. ¹⁰ Au kateai louio tota da laviai avoe momai buka ko uvule uale ke vai mahogovalive, kosealelu au louale keu loiveveu aike vuguvugualu. ¹¹ Iale vali kela olea aveve toela avale kea abo toela keta kateai ui, ai tigei, isege olea uvuiabele toelau uale keale abo toela keta ui. Isege olea vali kela aveve dua avale keale abo dua keta ui ai tigei, isege olea aveve tuvute avale keale abo aveve tuvute keta ui tigei. ¹² Anelu keu kateai louge IESUta loui avoe di koto ko evive, da loiveve keu vuguvugualu iale dale ataea ibila agisi loi aveveabe kaoai ibilaeabe igaligaliai vavei. ¹³ IESU avoe da valevile kea gala da memila ui vaoe uvale kea kosive, daele valevilea loale tota abole daele vesui. ¹⁴ Olea abo uvu hoeaseavage duale keale sisilai u dua ai kosealelu DILAVAule vuvune, o siau vavege abole ukolikoli idi ke bai isi o kitae, o site anakala daiai vatava doga keveo tai. ¹⁵ Isito atau toela kea ba o keu vue taivelu bele ata keleteala koea eveavale, tebahamalea, ata kavevalea, vata silava hoeaseavale sele nona loui ata seleavevalea, seleu aveve avalea ata katealea ba keveo talivelu bele. ¹⁶ Au kateai louito tota loui avoe IESU dala kou dala di anelu hanavege abo tialea aveve keneni loui ekalesia ata ke haivelu,, dau Deividi atatele lolu dau vau alavale didi hoba ke dalau. ¹⁷ Ige munana tuvute isi mamoe leke ivu loui avoe love ige olea koto ko evialelale keale loui koseai lve iale olea enuale kea loi ukolikoli e ko ive ibilaveu ue solilu. ¹⁸ Ige Dioni data kotovole louge evive la oleu o olalea buka kou vaoe vadeu loiveve louale ke adale avoele tolove louale keule DILAVAule au bukau uvule louale ke levovoai vai avoele vaeavai vai toelatisi o vateu tuvu vavui. ¹⁹ Ige la oleu buka ko uvule vadeuia loiveve belovetaea loui kisaiale ke bukiai katuge DILAVAule louge au ba ukolikoli idiu bai ke ilivelu bele isi o tuvute keveo ba talivelu bele. ²⁰ Ige ata le keu koto ko neni loui agisi lelevetiale keu loui avoe koto lelevela kou, da aike loiveve keu vuguvugualu au kateai louge da laviai kosealu mana di kosive IESU solekai lo. ²¹ Da olale lailoi kosive IESU KELISOu vali bahata la huhugei, la hoeaseavegei di kotou loi kele kateai ulu, ata tuvute olive. NOHOVU.