1
Basiova sisila vali keu bula igaliu unie usege IESU Betanie tilu, oo keu Lasalosi ola keu kelegau IESU Lasalosi isage kobelalu.
2
Iale IESU tai velevage Matau avolu lovi vauva, isege IESU Lasalosi ti ui sisila nonake ai usege.
3
Meliu senisi hagote vole vai lolu, senisi ke ibila kitaete, ke vai loi IESU genale kosai au kineu numuta ke behaumalu. Isege hagove keu ou uvu kele hagoai ulu.
4
Ige Diudasi Isikaliota keu IESU Disaibolo vole kela IESUlu haialu iale ke evisi loui avoe.
5
Au vadeuluga kou ko vai voia moni tili hadeleti kina 'k300' agisi haue site ke vave solilu?
6
Eu ke louale keu amigalau ke huhuai loulu, vavoloivalelu loive isi eu IESU ta Disaiboloea moni baiki naliavalelu louive au moni vadeu vai au baiki kele iavui.
7
Kateige IESU lavigei avoe kalevave da voeleluga age eu di vava senisita vavuva kateigeto da voeleige abo daa vai abavui.
8
Laeale vali bahata hauiabea uesite keali ui ba hau vavegeve.
9
Diu ata moeagaea evige IESU Betani oe uge kelu loevelu IESU Lasalosi isale keta ivaevelivelu.
10
Igeto Dubu naliavale bulisiti kitae kea huhuai avoe lai Lasalosita kavage voeleai.
11
Kosealelu Lasalosila voeleage Diu ata moeagaea otai nikovai uvaga IESU loi isage eu kobelage ata moeagaea ke ivai IESU vai lelevetisi lovai tievelu.
12
Vavita volele ata moeaga moeagaea loevelu Dielusalemae Basiova sisila valiniu loige usege abo loui avoe IESU la kou loiva ige.
13
Kea kobekavai bamuoele vana koievei agisi tai leleisi ivai sisilave ai genuhamai toai avoe seloo, Iselalaea, kosi kitaeala kou DILAVAu ivile loale ko lai hoeaseavai, Iselalaea kini.
14
Kela IESU doniki vole vai ele ugulumai loila asege abo keava, abo kisaiai avoe.
15
Vabualive Saioni mahohoea lai kinila keu loiva, Donikiu dogale ugulumaive.
16
IESU Disaiboloea lulele savalea to, ba IESU Otogoe tisege ea luleleai loui avoe abo koto kolabo kisaialu ata ke loueveive isi valevile moeaga avoele alu, ivaga eu Otogoe tilu.
17
Ige ata moeagaea ba vai lelevetisiloui avoe ma leleve eu Lasalosi isage lo ivasege Lasalosiu kobelalu, loi nita.
18
Iale keluga keu Dielusalemae loige ata kenenia beiavai tievelu.
19
Beiavai tievesege Balisese ata kea ke ivai loui avoe ivave ata moeagaea lovai. Tievelu lailole vadeu ai kuvave bavui.
20
Basiovalu Dielusalemae sisilalu loeveale ke volea Guliki ataea loi aboili guliguliai lovi ivale ke uvue.
21
Kateige ata kevolea tai Bilibi ivai keu Beteseda Galileia abo laviai avoe kosive lo olai IESU ivai.
22
Bilibiu tai Enidulu laviai avoti tai IESU laviaevelu.
23
Igeto IESU lavigei avoe atau eseu voeleve keu loi vugualu.
24
IESU loui avoe leleve ula da la lavigei uiti ii katuge vatale tiale keu sakavage au ba lavilivelu bele isito uiti ii katuale keu lavige aule bai moeaga otovei.
25
Ata vadeu au mauli huhualuaga aule au mauli lelevai isege oleu au mauli huhue solisi IESU haukala kole tiale keule ukolikoli mauli vai.
26
IESU loui avoe ata vadeu da hoeaseavale keu da lovai dati tai ige di mamaule ke hoaseavai.
27
IESU kateai abolai louito tota loui avoe di uvui tetealu, dale vadeu loui? Mama daa hoeaseava taemi ko uvule da hau keluga loale kela loi taemive ke valuiale vateu tuvu kela da valivelu loale dale tuvu ke vai.
28
IESU koto kateale louito loui avoe mama daa olale ataeau di avevele ai ivi letatavai. Isi kateai lousege Otogole nonau dobai avoe ai avevele memila di ivi letatavalu, iale ave ai avevele abo tota di ivi letatavalu.
29
Koto keu loige ata moeagae IESU vavale uale kea ke evisi volea louiavoe hatala keu lulualu isege volea loui avoe Anelula keu avolu koto louva.
30
Ige IESU lavigei avoe koto keu di totonalu loie solilu isito lai totonalu koto ke lolu.
31
IESU loui avoe ave vata ko vai kotale vaeavalela kou lolu, ave vata kou ata kitae ke kavai lovai vai kavatuliveluga kou lolu.
32
Ivalivelu abo vata kole daa vai letatavage dale ata koneni damigalu agigei.
33
IESU voele louvale keu abole vai Satauloeavai, ige au idile voeleai isi ata koneni amigalu agisi.
34
Ige ata moeaga kea laviai avoe lo basu uvue dodavage loui avoe KELISO keu ba voelealivelu bele. Isege oleve katealela aa loui avoe abole atau ese vai letatavai? olela atau ese ke?
35
IESU tota lavigei avoe atagau aike laili ulu valive niu egeta ue solilu katealelu la konenia loi ataga kole teve. Ige ba vau gusu keu la bavuge ivelu bele, ata vadeu loi gusu kele tiluaga au ba huhualivelu bele au vato oleve kelegau ke otiva.
36
Laea atagale ualelu ataga vai lelevetive, ilivelu atagau ese olive, IESU ke louto niabelu amiga mahogovai tilu.
37
IESU toana moeaga agelu igeto abo vai lelevetie solilu kou DILAVA vola kou, kate savalu.
38
Ige keu Aisaiau louale kelau ke vai lelevetilu loui avoe Kosive oleule ba loi nona ko evisi vai lelevetisi, isi olevilele DILAVAu adau hau koule loi velevai?
39
Katealeluga ataea koto evie savalu, Aisaia tota louale keu leleve.
40
Eu niabe vai gusutilu isi uvuiabe vai aukaeavalu, kea abo nita ivai abo uvule huhuai kuiakavai loige da amauligeveva.
41
Aisaiau kelate loulu, kosealelu eu IESU ataga ivalau ai loulu.
42
Ige Diu Lida moeagaea IESU vai lelevetilu isito Balisese vabuiavelu abo Dubule kokigeva.
43
Aveveabe keu toelalu kosealelu ea ata hoeaseavei to DILAVA hoeaseava solilu.
44
Ige IESU genuhamai toai loui avoe ata vadeu daa vai lelevetiale keu DILAVA tagau vai leleve tilu, kela daa hanavage daa lolu.
45
Isi ata vadeu daa ivale keu daa hanavale ketagau ke ivalu, kela daa hanavage daa lolu.
46
IESU loui avoe daa loale kou vatau ataga dala lolu, ialelu oleu daa vai lelevetiale keu ba vavile ulivelu bele.
47
Ata vadeu igaliu di nona evisi to nalie solige daa ba vai kotalivelu bele daa loale kou vata vai kotale vaeavalivelu loie solilu.
48
Ata vadeu da homasiavai daa louale nona keta evie solige koto ke tavaule vaola vai kotale vaeavai eu evisito a solialelu.
49
IESU loui avoe daa nona louale keu di nona olie solilu isito di mamau daa hanavale kela au nona ke loui da haivui loui avoe tai nona ko loui ata lavige.
50
Daa dibage nonave keu ukolikoliu avoele uale nonala aa eviluaga ukolikoli mauli nona ketaga aa ke evilu amigalu. Dii mamau nona ke daa haivuale kela daa ke loui laa haivelu.