¹ Au loui avoe di kakoluvuia bahata ui evisege da di gala louge evive. ² Isi kateai nonaeabele nonage ea evisi sekiai ulu. ³ Ige au lavigei avoe dau Diu ata iale di aiau vata vole Silisia keveo oo vole Tasisi keveo da vaeavai to eseu eseta da usege abo da vai hanavage da Dielusalemae loi velevage basu nona loui haivevale kosi kitae Gamalielo keu da haivulu. Kosi keu lailoi vavivuia aveve isi basuale nona keta loui da haivulu ige da ke evisi meliai la late ai olale DILAVA hoeaseavai. ⁴ Isi da memila IESU koto evivale ata keate ta malahata agigei dibulae otoveva. ⁵ Iale lale lai dubu kosi isi kanisolo kitae ke lavigege abole ba di aveve isi da dibavale ke loui la lavigei. Diu ataea Damasikasie uvale ata kelai levaleva kisaiai damuge da ivai olai talivelu IESU evievi ata seinita umuvei agisi loi koveo kavei toela tigei. ⁶ Daa aveve kateale huhuai loalelu Damasikasi vavae loisege valiu minale ataga voleu Otogole dobai loi da bavulu. ⁷ Ige da vatale dobai evisege koto voleu dalu loui avoe Solo Solo, aa vadeuluga daa dikaiaviva. ⁸ Ige da laviai kosealu kosive ole alau ige eu loui avoe dau Nasaleta ata IESU KELISO kela a ke vai toelativa. ⁹ Kateai daa lavige daluvita loale kea ataga ke ivaito kotove ke evie solilu. ¹⁰ Kateige da kosive laviai kosealu kosive ige dale vadeu ai, ige eu da lavia avoe kobelai talivelu Damasikasie ata voleu uale keu ba DILAVAu aa vadeu alivelu ale ke loui aa laviai. ¹¹ Ige ataga kitaeu daele loale keu di nii vai kelotige dii niu gusuige daluvita tiale kea dii adala holisi vai Damasikasie loevelu. ¹² Oo kele malaha vole Ananaiasi keu vali bahata kele ui lailoi basu lovai DILAVA hoeaseavaeviva. Kateivalelu Diu ata bahata Damasikasie uvale keale malaha ke eahalegei atau dua. ¹³ Iale malaha keu loaleu dii vavale lavisi loui avoe dii kakolo Solo, baito nia kateai lousege daa niai ivalu. ¹⁴ Ige keu loui avoe lailoi vavivu memila DILAVA hoeaseavale keu alu olaleale olave ke ai. ¹⁵ Isi olale aa vadeu evisi ivale keneni bahata loui ata haive. ¹⁶ Iale a vadeu inohole uva kobelai kosive ivile babatisoage ai aveve toela ke neniu vesui ue solisi. ¹⁷ Kateige da oo kele uale kalei Dielusalemae lolu. Loaleu dubu uvue guligulia loho naole kosive ivalu. ¹⁸ Ivage eu dalu loui avoe solekata oo ko kalei te. Kosealelu ata koea aa dii koto louge abo ba evilivelu bele. ¹⁹ Ige da loui kosealu kosive kea dibage da dubuiabe kele tai ai evievi ata moeaga kavei agigei toelatigelu. ²⁰ Ige kaimale volea ai koto aloloai louvale ke vole Siteveni kavage da kelueve solisito dabaeabe ogona nikovai usege ea kavage voelealu. ²¹ Kateai louge kosiveu dalu loui avoe dale aa hanavage ale oge voleo tai di nona loui Diu ata olie soliale ke haivelivelu tee. ²² Bolou au deiadeia ke loui lavigei to loui avoe dale Diu ata olie soliale keve tai haivei. Koto keta loui lavigelu ige abo keta evisi kobekavai loui avoe kavagau voeleai keu nita ui ke loui ata seleavei oi gei, kavage voeleage vesui. ²³ Kateai loui tuvuai abo dabau ogona bodiai katui gogoea mugai eue katui kou kouai avoe kavage voeleai. ²⁴ Kateige Lomenia ami kosi keu au solodia lavigei avoe kovai tai ou uvue visukavaeage au vadeu avale ke louge lai evisi valivelu Diu ata lavigei abo vadeuluga kavaevelu. ²⁵ Kateai louge abo vai tai ou uvue umuvalivelu asege ame voleu vavavele lavisi uale ke laviai avoe la di toela kaoaito ba daa kavave. Dau Lomeni ata dala kou iale lale da kavakavaluaga la Lomania basula la ke vusalu. ²⁶ Ige amea malaha ke evisi tai au amea kosi ke laviai avoe ata keu Lomenia atala keu lai kava kavage keu toelalu. ²⁷ Ige amea kosive keu tialea Bolo laviai avoe au au Lomenia ata alau, ige Bolou avoe mana. ²⁸ Ige kosive keu laviai avoe dau Lomeni ata olialelu ibila kitae valu. Ige Bolou loui avoe au katealu isito dau di mamau Lomenia ata. ²⁹ Kateai lousege amea kaimale kea visukavalivelu ale ke kalevalu ige amea kosiveu keu Bolou Lomenia ata oliale ke evisi vabuiavalu. Kosealelu au au koimale lavigei avoe Bolo umuvave. ³⁰ Iale vavita amea kosive keu olale Bolo vai tai Diu ataea avoele koto louale ke kaoai. Isi louge abo dibulae uale ke laviage eu lolu isi koto hanavage Diuia dubu kosivea isi kanisolo ata bahata kea loaleu usege abo Bolo vai loi vudiabele vaeavalu.