¹ Tialeu lo kalevatuge lo bouti vai lilikata tialea vata vole ivie Kosi ke leiviai tilu isi vali voleo tialea Lodesi vatava leivia Batala oe daiai kele otolovalu. ² Isege bouti voleu Benisia vatae tige lo tai avoele tievelu. ³ Isi loevelea davala tatae leleisi ovole Saibalasi ke malihai loeviva. Loi vovokavai vatavole kenenita tialeai Silia vatae daiage abo hau vole agisi vatae otovelu. ⁴ Ige lo tai evievi ata kaogei aboili bula igalile uevelu ige evievi ata kea munanau tuvu vuvunele Bolo laviai avoe Dielusalemae talive. ⁵ Kateige lo keveo aboili uale bula keu vesuge evievi ata kea abo ese abo ivuvu keali boutie lo kalevatulivelu loevelu. Ige lo bahata loi davalau milile kome bokoai DILAVA lavialu. ⁶ Keu iae lo boutile tisege ea kuiakavai oe tievelu. ⁷ Tialea Tolomeasi oe daiai kele otolovai tai evievi ata kaogei aboili uevelogo kele navalu. ⁸ Iale vavita ke kalevei tiale Seseliae daiai tialea abo memila Bilibita ata seveni '7' abo makale kela ke luvita navalu. ⁹ Iale malaha keu mahoho bahata voa '4' kea velavue soliale keale vali bahata belovetaea avale kelate ai DILAVAu koto louge. ¹⁰ Iale lo vali voleo oo kele usege Diudea vatale beloveta vole Agabasi keu loaleu loela velevalu. ¹¹ Velevai Bolou beleti vai ela au genata louale avevela da ko alu iale beleti ko biage Diu ataeale Dielusalemae umuvai vai tai Lomenia gamani kosi ke vavei. ¹² Ige oo kele evievi ataea isi lo ko nenia ke evisi alio kavai olae savalu Bolou Dielusalemae talivelu. ¹³ Ige Bolou lavigei avoe laa vadeuluga ko alio kavai di uvu vai toelativa. Kalege da keveo tige abo IESU ivile da umuvai da kavai vateu tuvu damuge keta duave. ¹⁴ Kateai loue lo keluale ke kalevai laviai kosealu kalege kosiveu isivi ula. ¹⁵ Kateaito loi hau bevuai oo ke kalevai vatala Dielusalemae tievelu. ¹⁶ Keveo tige Keselia evievi ata volea loili tialea lo agigei tai Nasoni oe otovege lo keveo avoluvita navalu. Malaha keu memila Saibalasie evievi ata olisi loaleu Dielusalemae ulu. ¹⁷ Loo Dielusalemae daiage ekalesia loi sisilai ai koukouaevelu. ¹⁸ Iloho vali voleo Bolou lo lohomegei Dieimisi ivalivelu tilu lo keveo tige ekalesia kosive kea keveo bahata ulu. ¹⁹ Ige Bolou adaebe katui hoeaseavei DILAVAu haule Diu ata olie soliale ke dulugevale ke loui haivelu. ²⁰ Kateai haivege abo ke evisi DILAVA hoeaseavai laviai avoe loi kakolo a dibage lailoi Diuia ata moeaga kea IESU lovaito olale Mouseseu basuale ke lovai udua ai. ²¹ Isito kea vatava voleo aloloai loui koseiva momai Mouseseu basu ke lovai lai esea vudiu vate boisi lai vavivuia avale kelate aevegelive. ²² Aa loale koto ko abo evilu iale lailole abolai vadeu ai. ²³ Lo olale lo huhuale ko aso lo ata abutita abutita '4' ulaea DILAVAu ivile koto louva isege basu vaeavale kea koveo uva. ²⁴ Iale ke lohomei talivelu aboili Diuia dubu aveve ke vole ai lamiga hoeaseavage vesusege abo mesia agisi vaui DILAVA hoeaseavage vesusege au ba ke ibilave vavei. Igeto ke iae abole ba abo kine boige abo DILAVAu ivile basuale keule vesui. Ale kateige ata bahataeale dibage a memila ai aveve ale keu leleve olie solisito au Mouseseu basuala aa ke lovai tiva. ²⁵ Isito Diuia ata olie soliale kea IESU lovale kelai lo kisai vole hanavai kosealu labea abo kaiva kukulu loviale ke ievevale isi mesia taote ievegelive isi volea keateali navai tebalive. ²⁶ Kateai louge Bolou au kaimale keali tialea Diuia basu lovai abobiga hoeaseavelu ige Bolou tialeu Diuia dubu kitae ke uvue tialeu dubu kosi kitae ke laviai avoe lo lomiga hoeaseavage vesualelu lole bula igaliu vesuge lo tota kuiakavai mesia agisi loi kosive hoeaseavai. ²⁷ Ivaga bula keu vesulivelu asege Diuia ata volea Eisia vatae loale kea Bolo ivai vole bahata lavigei loi Dubu uvule Bolo vatalaevelu. ²⁸ Vatalaevei vole toiavei avoe Iselala ataea lolivelu lo dulugeve. Malaha kola vatava bahata kola aloloai oai lailo agisi toelatigeva isi Mouseseu basuale keta lailoi Dubu tuvute kota vai toelativa. ²⁹ Abo koto kateale louale keu kosealu abo ivage Bolou Ebesesi malaha vole Tolovimasi ke vai avoti oo kele oivale keluabo ke ivai huhuai avoe isoho bolou malaha ke vai avoti dubue lolu. ³⁰ Ige dubule ataea koto ke evisi malomaloai loui belalava ige oe ata kea ke evisi melihamai loi bolo butuhai vai vatae tilu isege volea dubu anankale leleisi bavui ulu. ³¹ Ige ea olai Bolo kavage voeleai isege ata volea Lomeni gamani laviai avoe Dielusalemae ata moeagaea vole kaveva. ³² Ige solekata amea kosiveu au solodiali loi ata moeaga kea uvule tilu ige ata kea ke ivai Bolo kavale ke kalevalu. ³³ Ige amia kosiveu au kaimale lavigege ea seini abutita vai Bolo umuvaevelu isi aveve evilivelu ata belagelu. ³⁴ Kateige ata volea koto vole lousege volea koto ni volete louvaga kotou malomaloage amea Bolo vai abo balikie tilu. ³⁵ Meialemei tialeu ou anakale tige ataea kavalivelu tige abo eule letatavai tilu. ³⁶ Isege ataea iavela tai loui avoe vai kavave ige au voeleai. ³⁷ Ige abo vai tialea ou uvue talivelu asege Bolou Gulikia kotole amea kosi ke laviage eu teteai avoe au au Gulikia koto evilu. ³⁸ Au ale memila Agubito vatae malaha voleu loaleu ata bahata vo taoseni '4000' agigei aboili gamani dikaiavaito iluvisi odavae tai uale ata keala kou. ³⁹ Ige Bolou laviai avoe be dau Diu ata dala kou vatava vole Silisia vata kele oo vole kitae Tasisi kelega da lolu. Iale ale olage da ata ko lavigei. ⁴⁰ Ige ame keu louge Bolou ou anakale lavisi koto loulu Diuia nonale.