¹ Aveve toela keu vesusege Bolou evievi ata toiavege ea bahata loevege au sisiba nonau dua loui agigei melitievelogo kalevei Magidonia vatavae tilu. ² Keveo tialeu oo igaligalila ata haivei melitieveloho vesusege kalevei Gulikia vatateo tilu. ³ Tai keveo ualeu bata abutita igalitau vesusege olai bouti vai Silia vatae tai. Isito evige Diu ataea vai kavai, kateige au tiveve ke kalei kuialai Magidoniae tilu. ⁴ Lo keveo tige ata koea loili tilu Beliae Bilusi vove Sobata. Ige Tesoloniae ata abuti Alisatakasi isi Sekudakasi ige Debi malaha vole Geiasi ige Eisiae ata abutita igalita Timoti, Tikikasi isi Tolovimasi. ⁵ Lo keali tige kea memila tialea Toloasie loi inohole uva. ⁶ Kea keveo usege lo Bilibai oo kele uale Diuia sisila valiniu loige basiova keu vesusege lo boui vai tiale vali ni ada vaki igaliu vesusege Toloasie daiai evievi ata, keali belelevalu, bula igali uvule aboili ulu. ⁷ Lo bulau gutule lovi ilivelu vole bevugei usege Bolou aloloai tivaga vaviu mina valu. ⁸ Lo nonavale oo ke uvue lameba moeagaea ulu. ⁹ Iale eue oo ke vuini doale voo vole ivivela Lutikasi keu kele ugulumai Bolou nona uvanaeavai tivaga niveu haniage naloho ke vuvuai dobai amiga kavai voelealu. ¹⁰ Ige Bolou dobai loi letatavai avoe avola kou nita ulu alio kalevave. ¹¹ Kateige abo voo ke vai oe tievelu tai ivaga eu nita uge kea sisila kitae aevelu voo kelu. ¹² Isege Bolou kuialai ou uvue tai aboili aleto isi haivei tivaga vau alavage kalevei tilu. ¹³ Lo bouti vai Asosi tisege Bolou huhuai olai vatala tai louge lo bouti vai taito ba tavae avoele tai ba aboili taevei. ¹⁴ Kelu eu vatala tisege loea boutie tievelu isito Asosie avole tai ba aboili tiale Mitilenie daia velu. ¹⁵ Isi vavita voleo tiale ovole kiosi leiviai tialea vavita voleo Samosier daialu. Isi vavita voleo tialea Tologiliamue daialu isito vavita voleo tiale Ebeseseie leleie solisito leiviai tialea Militasi daialu. ¹⁶ Bolou Eisia vata homasiavage lo eve loevelu Dielusalemae daiai kele ui Diuia sisila vali benitikosi keu loige. ¹⁷ Ialelu Bolou Militasi oo kele uito Ebesesia dubuu elodalai louge abo avoe loi nonave evisi. ¹⁸ Ige Eloda kea avoe loige eu lavigei avoe vali moeaga da Esia vata koveo loi laili uale ke la ivalu isi da vadeu avale keta la ivalu. ¹⁹ La ivaga da damiga letatava solisege Diu ataea olai da kavage da vateu tuvu agisi. Kelu da vali bahata alio ulalega da kosiveu hau ko ai vateu tuvu agiva. ²⁰ La dibage dale lai oo igaligali kela la haivevaga la kele luleleaevelu. ²¹ Diu ata isi Diu ata olie soliale ke da haivei isuta abolai loui koseiva lai aveve toela ke kalevai DILAVAu koto evisi lai uvu vai vavui lailoi kosi IESU KELISO ke lovai avoluvita teve. ²² Da koto kateale ke loui la haive dua alu iale munanau tuvu aike dalu louale dale la kalevei Dielusalemae tai iale isoho da keveo tige aveve vadeule daele velevai. ²³ Isito da luleleige da oo bahata kela loisege munanau tuvu abo davai tai dibulai da kavai vateu tuvu damuale ke loui da haivulu. ²⁴ Ige da koto ke evisi di voele kele bavue solisi to olale kosiveu au hau damuale ke vesuiavai IESU lovi keu kosealu. Dale kotove dual ke loui ata haivege DILAVAu uvu vavei hoeaseaveleke abo ivai. ²⁵ Da memila laili ui la DILAVAu adau vuvunele uale nona ke da loui la haivei dibage la ba tota di ni ivalivelu bele da voelebe age. ²⁶ Iale da koto ko louge evive la da louale koto ke evisi ukolikoli mauli va solige keu lai toelala keu. Keu ba di toela bele da la haivege vesulu. ²⁷ Kosealelu da DILAVAu koto loui la haivei lalai be bai vai mahogova solisito DILAVAu aveve kenenila da ke loui la haivelu. ²⁸ Bolou kateai ouito Eloda ke lavigei avoe lai evievile melitavai meliai vatala ige munanau tuvu lameale kele Ekalesia ke ive dua ave. Kosealelu DILAVAu au voo IESU taole ata ke agigealela kea atave olilu. ²⁹ Isito dale la kalevai tisege vavolou ataeale loi la seleavei lai uvu isi la agigei toelatigei. ³⁰ Ige vali voleu loige lai minale ata voleale kobekavai kotou keuka lou disaibolo louegei. ³¹ Ialelu lamiga neniaveve isi da lahani abutita igalita uvule gutua vavita alio ulale ui la haivevale ke huhuave lai mauliluga da ke ava. ³² Iale dale ave DILAVAu adau uvule la kalevei tige aule ba la hoaeseavege lale kotove kele meliai ui DILAVAu au atalai louale ke agive. ³³ Laa ivage da memila laili uvale kela lai ogonata monitalu la imiliave solilu. ³⁴ Isito dau di adatela loviai moni agisi di kaiamaleali lovi voiai isi ueviva DILAVAu hau aive. ³⁵ Iale da aveve kateale la haiveale ke late lata ai lovialivelu ata volea lovie site ke vavege isi. Isi IESU louale ko huhuave au loui avoe lai hau ata vaveale kele sisila kitaeule ui isito lai lailomiga ula huhuivale kele sisilau ba ulivelu bele. ³⁶ Bolou kateai louge vesusege aboili au kome bokoai vata bisi DILAVA daluiavalu. ³⁷ Abolai guliguliato vesusege ata kenenia loi Bolo vatalai aliokavalu avolu uvuaive. ³⁸ Isi vaoe Bolou ivasoliveve koto keta louge abo keta evige lutiabe bai vusage aliokavai Bolo meialemei vai tialea boutile hanavage eu tilu. Nohovu uvu kitae misinaliu tige.