¹ Abolasiu Kolinitoe usege Bolou loaleu Eisia vatae tialeu Ebesesi oe velevai evievi ata vole ivegelu. ² Ivei belagei avoe la memila evievie ata olige munanau tuvuteu laele lolu ige abo loui avoe loea a munanau tuvute louvale ke dibage solilu. ³ Ige Bolou belagei avoe la oleu kotola evisi babatisoaevelu ige abo laviai avoe loea Dioniu kotola evisi babatisoalu. ⁴ Ige Bolou lavige avoe Dioniu ata babatisogevale keu Diu ata ke lavigei avoela lai aveve toela kalevaluaga lale babatisoave. Isi lai uvu vai di iae loivale kosi kitae IESU kele vaeavai lovai teve. ⁵ Kateai loui haive abo ke evisi kosive IESU ke ivile babatisoaevelu. ⁶ Ige Bolou au ada vai tataeabele vaeavage munanau tuvu aboele loige koto ni voletele nonai kele DILAVAu nonata loui vole haivelu. ⁷ Ata bahata tuelo '12' ulaeala ke aevelu. ⁸ Ige Bolou bata abutita igalita uvule ata kehaivelu. Diuia Dubu kele ataea DILAVAu adau vuvunele uveve ke loui ata haivei baita loui baita olale atae ke evisi IESU lovai. ⁹ Isito ata volea evisi homasialu IESU lovalivelu isi ataea kosive lovaveve ke homasiavai kotou toela louge Bolou ke kalevei evievi ata ulaeali tialeu Ebouivale oo kitae kele ui haiveva, oo keu Tailanasiu ola iale Bolou kele aloloai ata haiveva. ¹⁰ Vagala abuti keu uvule haivevaga Eisia vatava oo keneni bavuge Diu ata isi Diu ata olie soliale kea bahata koto ke evisi vaevelu. ¹¹ DILAVAu au vuvune Bolo vavuge aveve ni volete moeaga agelu. ¹² Kateige evievi ataea Bolou mukota ogonave ivita agisi tai hatitiavale kea tatale otovege abole doadoai ui isi olea munanau toelau aboele uvale keale kalevei tigei. ¹³ Bolou au kaimaleali kateisege Diuia ata volea oo igaligali kela oai tai munanau toela nunuvevale kea loi Bolou avale kelate ai IESU ivile ata hoeaseavelu. ¹⁴ Diuia Dubuu kosi kitae Sikiva keu ese bahata seveni '7' keala aveve ke aeviva iale vali volele tialea malaha voleu munanau toelau avoele uale ke laviai avoe Bolou IESU ivile ata haiveale kea ivile lo a lavialu kobelai te. ¹⁵ Kateai louge munanau toela keu abolai loui avoe da IESUta Bolota ke dibagelu isito laea olela laeala koea. ¹⁶ Kateai lousege malaha leu munanau toelau avoele uale keu kobelai ke mudikavei kavei toelatigei ogonaeabe keta davuai katuge ea vate ulata iluvisi tievelu vateu tuvuta. ¹⁷ Abo kateige ata bahata Ebesesie uale kea ke evisi bavuai IESU hoeaseavage IESU ivi keu aboele kitaealu. ¹⁸ Ige evievi ataea loevealea ata bahata kea vudile abo aveve toela ke loui daiavelu. ¹⁹ Ige eveivale ata volea abo eveu aveve bukale kisaiale ke agisi loi atae nile vauevelu. Buka vauale ke ibilaveu viviti taoseni kina '50,000'. ²⁰ Aveve katealele DILAVAu nonau vata konenile tilu. ²¹ Aveve ke iae Bolou olale o ke kalei Magidonia vata Gilikia vata isi Dielusalema oo kitae keveo tai. Kateai huhuai avoe dale oo keveo taito ba tota kalevei Lomenie tai. ²² Kateai Eisia vatae uito au kaimalea uvule Timoti isi Elasitasi ke hanavege abo memila Magidonia vatae tilu. ²³ Bolou Ebesesie usege aveve toelau evievi ataele loale keu kosealu. ²⁴ Oo kele abo siliva vaui sele dilava vole munana aevegelu ivivela daiana. Iale keale hau ke ai moni kitae agigei hau ke ale malaha vole ivivela Demitiasi. ²⁵ Iale malaha keu au kakoluvu voleali hau ke avale ke lavigei vole bevuai loevelu ige malaha keu lavigei avoe di kakoluvuia lai hau kolega moni agiva. ²⁶ Isito Bolou avale ke la ivai lulelealu au ata haivei avoe ataea adata avale keu dilava leleve olie solilu. Bolou aloloai kateai louge Eisia vata bahata kole isi oo kitae kenenia koto ke evisi lovalu. ²⁷ Katealelu ataeale lai avale ko voie solige lailoeale monie solisi isi kateale age lailoi dilava daiana ketale ue solige oleale ba loi dubu kole ke hoeaseavai. Aike Eisia vata koke uvale isi vatava volela uvale keala lailoi dilava hoeasavaeviva isito ataeale Bolou koto evisi lovage lailoi dilava koule ue solisi. ²⁸ Demitiasiu kateai louge kele vole bevuai uale kea ke evisi tuvuai genuhamai toai avoe lailoi dilava daiana kou Ebesese vata kole kitae. ²⁹ Kateai baita louge ata kea ke belalai tailoivaga gutualu. Kateai loi Bolou ata abuti Geihesi ta Alisitakasi agigelu kea Magidonia mohohoea Bolo luvita aloloai oivalea ata kea abota ke ivei agisi nonau oe tilu. ³⁰ Ige Bolou ke evisi olai tai ata ke lavigei isito evievi ataea kelualu. ³¹ Ige Bolou kakolo volea gamani gaukala avale kea Bololu koto hanavai avoe ebouiabe oo keveo talive kalei uso. ³² Kateisege oo ke uvue ata bahata kea daudau asege volea koto ni voletele nona loui belalava, kosealelu kotou bai ke diba solilu. ³³ Ata bahataea kateisege Diu ataea Alekisada kabitisi laviai avoe au tai lavisi ata ko lavige, ige abo kotou bai evisi luleleai. ³⁴ Ige abo ke ivage Diu atala keu ige abo ba genuhamai toai avoe lailoi dilava daiana kou Ebesese oo kole dilava kitaela. ³⁵ Abo koto ke ula louvaga ou kosiu kobelai lavigei avoe Ebesese ataea ata bahata koea ivage lai dilava kitae igalila daiana keu lailo naliava. ³⁶ Atabeu ba ke vovoholivelu bele, ialelu ke kalevai sekiai uve. ³⁷ La vadeuluga malaha abutita ko agigei lolu kea lailoi dubu dikaiava solilu, vavolobe a solilu isi koto u toelabe lailoi dilava kolu loue solilu. ³⁸ Iale Demitiliasi au kaimaleali olai kotaluaga kota valiu loige loi aveveabe ke lousege ea abota lai avevete ke loui daiai kotau kosia usege loi ba ke louve. ³⁹ Isi oo kole kotobeta uge ke vai tai kanisoloa kotale louve. ⁴⁰ Lale kateale a solisi aveve toela age Lomenia gamaniu ke evisi lailoi oo ko vaugei ata kavei, belage lailole vadeu loui lavigei koseai kotou baila kou. ⁴¹ Kateai louito ata ke hanavege tievelu.