¹ Iale vali voleo Bolo Ateni kalei Kolinitoe tilu. ² Keveo tialeu Diuia ata vole Akuila ta keateve Bulisila kele tilu, malaha ke aiaveu Bonitasi vatae vaeavage au kalei tiale Itali vatae ulu keveo ulogo Lomenia kosive kitae Kalodiasiu basu baeavai louge Diu ataea vata ke kalevai vata voleo tievelu. Kateige Akuilau au keateti Kolinitoe loevelu ige Bolou ivei tai aboili ulu. ³ Aboili keve ui hauiabe kelate ai valai abo kouvale kelate ai avoele moni agisi hauai tiva. ⁴ Isi Bula bahata kela aule Diuia dubue tai Diu ata isi Guliki ata ke haivegei olale kea IESU koto evisi lovaevei. ⁵ Isege vali voleo Sailasiu Timotiti Magidonia kalevai Kolinitoe loevelu. Loi daiage Bolou au hau ke kalei vali bahata kotou dua ke loui Diu ata haivei avoe la dulugevale at kela IESU KELISO igali. ⁶ Kateai louge abo ke eviloho kotove ke bavui avolu kotou toela louge Bolou abolai tuvuai au ogona sesiai abolai loui avoe la koto ko bavualelu vateu tuvu agige keu lai olala keu keu di ola olie solilu iale dale kolela kalevei Diu ata olie soliale ke haivelivelu tai. ⁷ Kateai louito tialeu Diu ata olie soliale malaha vole Tisiaaisi Diasitasi keu ou Diuia Dubu vavale uale oo keleviloai tilu malaha keu DILAVA hoeaseavale atala. ⁸ Isege Diuia dubu kosive Kilisibasi keu au uvu vai IESU vavuge ovele uvale ata ke nenia baito abo uvu vai IESU vavuge Kolinito ata volea koto ke evisi abo uvu IESU vavui babatisoaevelu. ⁹ Vavi volele bolo nai naoale kelate asege DILAVAu laviai avoe di koto loui ata lavigelivelu vabuai kalevagelive isito melitavai loui lavige. ¹⁰ Dale ata uge atabeu ba a kavalivelu bele kosealelu di ata moeagaeala kole ulu. ¹¹ Ige Bolou vagala igali isi bata sigisi '6' uvule o kele ui DILAVAu nona loui ata ke haivelu. ¹² Vali voleo Lomeni Gamani kosi vole Galio ke letatavage Gulikia vata ke naliavalu. Kateivalela Diu ataea vole bevugei Bolo vai kotalivelu tilu. ¹³ Vai tialea kotau kosive ke laviai avoe malaha kou olale atae aveve ni vole tolove ai DILAVA hoeaseavai Lomenia basu lehosivalu. ¹⁴ Kateai louge Bolou olai kotoeabe ibila loulivelu asege Galiou Diu ata lavigei avoe da la lavigei malaha kou laele avevebe toela ale bele da lai koto evisi la dulugei isito eu doadoalu. ¹⁵ sito da huhuige laea lai basu kele atau ivi ula isi koto volela la ko louvalelu da ba malaha kole aveve kaoalivelu bele isito labiagea ba ke kaoave. ¹⁶ Isi kateai loui ata ke nunuvege vatae tilu. ¹⁷ Galiou kotoeabe evie solige kea loevealea abo Dubuu kosive Soseteni Lemudisi umuvai loalea kotoivale ou ivile vaevai kavage Galiou ke ivai kotobe loue solisito doadoai ulu. ¹⁸ Aveve keu vesuge Bolou Kolinito ata kalevei kuialai Akuilata Bulisilata lohomei aboili Senikiliae tilu keveo usege Bolou DILAVAu ivile basuale kele Diuia avale late ai au Siliae tilu. ¹⁹ Tievealea kuvau tavae Ebesesie otolovage Bolo igaliu tialeu Diuia Dubuu ataeali nonalu. ²⁰ Ige ataea isiviale Bolou valivolea nile aboili ui isito Bolou homasialu. ²¹ Isi lavigei avoe DILAVAu olage daba laeo loi la ivegei kateai louito kalevei bouti vai tilu. ²² Tialeu Siseliae velevai bouti kalei Dielusalemae tiale ekalesia keali sisilaito kalevei Anitiokae tilu. ²³ Keveo tai velevai vali voleavele aboili uito kalevei tota Galasiata Vilisia vatae tialeu evievi ata vole dulugei agisi melitigelu. ²⁴ Bolou kateai oisege Diuia malaha vole Abolasiu Alekisdalia o kitae keveo loaleu Ebesesie loi koto lou dua ai Bukau koto kaoai kele lulele kitae alu. ²⁵ Memila malaha vole Dioniu IESU nona loui haivuge au ke evisi melitavai IESU nona loui ata haivelu isito keu IESU avale ke bahata diba solisito Dioniu ata babatisogevale ke aveve ula dibalu. ²⁶ Au kateai vabue solisi Diuia dubule kosiveu koto louge Akuilau au keateti vai abo oe tilu tai ba DILAVAu nona hoeaseai loui havulu. ²⁷ Ivaga vali voleo Abolasiu olai Gulikia vatae tai tige Ebesesia ataea kakoluvuia bea Gulikia vatae uvale kelai levaleva kisaiai hanavai olale abo Abolasi vai abo oe vaeavage ui DILAVAu kotou dua loui haivei melitigei. ²⁸ Melitigei ata moeaga kea vudile lavisi Diuia ata kelai koto melite ke loui kotoeabe kavai Bukau koto vai lelevetisi avoe IESU keu Diuia ata dulugevale kosi kitae KELISO.