¹ Kalevei tialea Avibolisi isi Abolonia leiviai tialea Diuia Dubu Tesoloniae uale kela daialu. ² Keale oleve keveo tiluaga abole tai Diuia Dubu uale keveo guliguliagei iale bula abutita igalitau uvu kele Bolou tialeu dubule guliguliai Bukau koto dodavei ata ke haivelu. ³ Isi bukau kotou KELISOu loiveve louale ke loui haivei avoe DILAVAule Diu ata dulugeveve ata hanavage aule loi vateu tuvu agisi voeleai to tota kobelai. Iale da la lavigelu Diuia ata dulugeale kela IESU KELISO. ⁴ Kateai louge Diu ata volea isi DILAVA hoeaseavale Guliki ata moeaga isi keate ivite moeaga kea koto ke evisi IESU lovalu. ⁵ Ige Diu ata volea koto ke evisi tuvuaevelu isi tialea laskolo lavigelu ige ea vole bevuai igalitoai loevelu. Loevei oo ke neni kosai lelevai Bolota Sailasita kaoai loevelu loi evievi ata vole Diesoniu ole loevelu olale Bolota Sailasita kavei agisi tai ataea nile otovei. ⁶ Isito ive solisi Diesoni vai evievi ata voleta agigei tai ou kosia nile otovei loui avoe ata koeala vali bahata oo ke nenila aveve toela ava iale keala koea lailoi oe loevelu. ⁷ Kea loige Diesoniu agigei au oe otovelu iale lehosivaeaviva. Kosealelu abo loui avoe kosi vole kitae IESU keu ulu. ⁸ Laskoloea kateai louge Lomeni kosia ata bahata ke evisi tuvu kitaeai ulu. ⁹ Ige Lomeni kosivea louge Diesoniu evievi ataeali abo ibila ai moni vavei oe tievelu. ¹⁰ Iale vau loisege evievi ataea Bolota Sailasita hanavege abo Beliae tievelu. Tai daiai to kalevai Diuia dubue tilu. ¹¹ Keveo tige ata kea aveveabeu Tesolonia kea aveve late olie solilu isito duave ula. Kea aloloeabe koto ke evisi vai lelevetisi vali bahata Buka dodavei olale ke dibai vailelevetisi. ¹² Aveve katealeluga Diu ata moeagaea IESU lovalu ige Gulikie ata ivite kea bahata IESU lovaevelu. ¹³ Kateige Diu ata volea Tesoloniae uale kea ke evige Bolou Beliae ui DILAVAu nona loui ata haiveva ige abo ke evisi vole lohomei loi Bolo kavage voeleai. ¹⁴ Kateige evievi ataea ke evisi Bolo vai davala vavala tisege Sailasiu Timotiti oe ulu. ¹⁵ Kea Bolo meialemei tialea Atenesila daiai Bolo vaeavaito kuiakavai beliae loevelu. Ige Bolou lavigei avoe taevelivelu Sailasita Timotita lavigege abo solekata lolivelu kole daele loi. ¹⁶ Bolou kateai louito oo kele Sailasita Timotita inohole ui seleivale dilava moeaga iveive homasialu. ¹⁷ Au ke ivei tiale Diuia dubule Diuta Guliki ata haivelu isi tialeu maketie DILAVAu koto loui ata bahata ke haivelu. ¹⁸ Kateige lulelete ata volea Ebikulia koto vai loale kea Sitoika koto vale keali Bolou koto louale kele koto volele ke belalaeviva. Kosealelu Bolou IESU voeleai kobelale ke loui lavigelu ige abo vole lavigei avoe malaha vadeula kou amiga letatavava isoho malaha keu loi dilava volelau ke louva. ¹⁹ Kateai Bolo meialemei tilu vatava vole ivivela Aliobagasi kele kanisolo kitaea uale vaitai belalivelu tai daiai Bolo belai avoe aa aike koto louvale ke baive loui lo haive. ²⁰ Aa koto louvale keu loele kotou dogala keu a louva iale lo olale aike koto ke baive loui lo lavige. ²¹ Kosealelu abo koto ke loulu Atenisi ataea isi aboili uvale keale vali bahata kotou doga ke loui vole haivegei olai ke evigei. ²² Abo kateai loue Bolou kobelai lavisi lavigei avoe Ateni malahaea da ivage laea dilava moeaga hoeaseavaeviva. ²³ Daa lai ologo kola loaleu lai sele dilava hoeaseavale ke ivelu isi kaota tatale lai kisai vole ai kosealu lo iva soliale dilava kole hoeaseavaeviva. Isi la dilava iva savaito hoeaseavale ke dale aike loui la haivei. ²⁴ DILAVA keu vata ai valevile ai avoele otoveale keu Otogota vata kotaea kosi kitae iale keu ataea adata Dubu kouale kele ulivelu bele. ²⁵ DILAVA igaliu valevile ai lu vaveale ke lailole oleve kateai adata ale vai vavui. ²⁶ DILAVAu memila ata igali ale kelega ataea bahata vata kole igaligaliai ui lotilu isito ataea ue solisege eu abo uveve isi vali vai dati uveve ke vavelu. ²⁷ Au ke ai olale ataea kaoai tai ivai hoeaseavai au ke aito lailoele ogela ue solilu. ²⁸ Iale lai lole vuvunevele ui tigei da koto ko igalile lai ata voleu loui avoe lai lota eseabe lailola koea. ²⁹ iale lai DILAVAu ese olialelu huhui toela a kalevai ataea golo, siliva, vule agisi abo lulelele kaivakuku ai vaeavai avoe dilavala kou isito DILAVA leleve keu atala. ³⁰ Memila ataea aveve kateale age DILAVAu ke ivai kavesolisito aike ata bahata lavigei avoe daeo love. ³¹ Au louale keu kosealu au ata vole letatavale keule au vali vaeavale kele ataea aveve kaoai abo avale kele ibilaeabe vavelu. Iale ata kela voeleige DILAVAu isage kobelalu IESUla keu. ³² IESU voeleai kobelale ke Bolou loui aloloige ataea ke evisi koele hamasege volea loui avoe valivole tota loi koto ke louge lo evisi. ³³ Kateai louge Bolou kalevei tilu. ³⁴ Isege ata volea ke evisi Bolo lovai tievelu ata keala koea Dionisiasi keu kanisolo ese vole isege keate volela Damilisi ige ata voletaga aboili tilu.