¹ Aya emashina ya bana abaume bakwa Israeli abaishile mu Egypto na Yakobo, cila muntu naba Ng'anda yakwe: ² Ruben, Simoni, Lefi, na Yuda, ³ Issaka, Sebuloni, na Benjamini, ⁴ Dani, Nafutali,Gadi, na Asha. ⁵ Bonse abantu abali balupwa lwakwa yakobo bali amakumi cine-lubali mumpendwa. Yosefu ali kale mu Egypto. ⁶ Elyo Yosefu, bonse bawabo, kabili nailya yonse inkulo yalifwile. ⁷ Abena Israeli bali nobufyashi, balifulile apakulu mu mpendwa, kabili baishile kuba aba mpomfu, nencende yaiswile nabo. ⁸ Nomba elyo imfumu iipya yaimine mu Egypto, umo uutaishibili palwa kwa Yosefu. ⁹ Atile kubantu bakwe, '''Moneni, abena Israeli bafulisha kabili ne mpomfu ukucila ifyo tuli. ¹⁰ Iseni, lekeni tubombe nabo mano-mano, ngateifyo bakonkanyapo ukukula mu mpendwa, kabili inkondo ngayaima, tulwisha, nokusha icalo.'' ¹¹ Eco bababikile abakubangalile pakuba cusha nimilimo ya lucu. Abena Israeli bakulila farao imisumba ya matala: Pitoma na Ramesesi. ¹² Lelo ilyo bakobacusha sana kubena Egypto, abena Israeli elyo bakofulilako mu mpendwa kabili nokusalangana. Eco abena Egypto batampile ukutina abena Israeli. ¹³ Abena Egypto balengele abena Israeli ukulabomba ukucila mucipimo. ¹⁴ Balengele imyeo yabo ukukalipwa ne ncito ya lucu pakubomba ne ndaka na matafwali, kabili nakumisango ya milimo yonse iya mumabala. Ne milimo yonse iyalikufwaikwa yali iya kukosa. ¹⁵ Elyo imfumu yaku Egypto yasosele kuli banacimbusa aba Hebele; Ishina lya umo lyali ni shifula, kabili umbi puah. ¹⁶ Atile, ''Ilyo mukoafwilisha abanakashi aba Hebele pakupapa, lolekesheni ilyo bakopapa. Nga mwana umwaume, elyo mufwile ukumwipaya; lelo nga mwana umwanakashi, kuti aikala.'' ¹⁷ Lelo banacimbusa balikutina Lesa kabili tabalikucita ifyo imfumu yaku Egypto yalikubakonkomesha; balikuleka abana abaume ukwika. ¹⁸ Imfumu yaku Egypto yakutile banacimbusa nokutila kuli bo, ''Bushe nindo mucitile ci, nokuleka abana abaume ukwikala. ¹⁹ Bana cimbusa bayasukile Falao ati, ''Abahabele abanakashi tababa nga banakashi abena Egypto. Balishipa kabili bapwisha ukupapa libe nacimbusa talaisa kuli bo.'' ²⁰ Lesa alicingilile aba bana cimbusa. Abantu bafulile mu mpendwa kabili nokwisa kuba sana namaka. ²¹ Pamulandu banacimbusa balikutina Lesa, abapele abana. ²² Falao akonkomeshe abantu bakwe bonse, ''Mufwile ukuposa onse umwana umwaume uyo uwafyalwa mumana, lelo umwana umwanakashi onse mulekeni ekale.''