¹ Wonai kuti musaita mushando yokutendeka kwenyu pamberi povanhu, kuti vamuone, ngokuti mozodalo, amuzooni mubairo kunaaBa venyu vari kudenga. ² Saka mukazoopa zvipo zvenyu kuvalombo, usaridja gwamanda pamberi penyu yemwi, kudai ngozvovanoita vadjiitisi mumbhatso djo mumasinagoga ne mumapato, kuti varumbidjwe ngevandhu. Ngegwinyiso ndinoti komuri, matowashira mubhairo wavo. ³ Asi, woopa zvipo zvako kuvalombo, usatendera kuti nyala yako yokumubushue izive chinoitwa ngenyala yako yokumurhyo, ⁴ kuti zvipo zvako zvipuwe ngokufishika; naaBavako vanoona kuwiguika vanozokupawo. ⁵ Apo mookumbira, musazodai ngovadziitisi, ngokuti vanoda kukumbira vechiema mumbhatso dzokudira nopambhalalano mumakwatcha, kuti vaoneke ngovanhu. Ngegwinyiso ndinoti komuri, vatowashira mubhairo wavo. ⁶ Asi yewe, apo wookumbira, potera kukamera lako lopakati, naapo konya musiwo, kumbira kunaaBa vako vari mukuwiguika, naaBa vako vanoona mukuwiguika vanozokupawo. ⁷ Asi mukukumbira kwenyu musazohwirindjira mashoko asina shwiro, kudai ngezvevanoita vomadzinza; ngokuti vona vanofunga kuti vanozoziwa ngokuwanda kwemashoko avo. ⁸ Ndizvo musazodai ndivo, ngokuti aBaba enyu vanoziwa izvo zvomunotama musati makumbira kwaari. ⁹ Ndizvo kumbirai ngoiyi njira: “aBaba wedu vari kudenga, zita renyu garikudzwe. ¹⁰ Umambo wenyu ngahuuye. Kuda kwenyu ngakuitwe munyika kudai ngomudenga. ¹¹ Tipei kudya kwedu kwezuva lanhamashi. ¹² Tiregerenhi zvitadzo zvedu kudai yesu takaregerera avo vanotadzaa kwotiri. 1 ¹³ Musatipinza mukuedzwa, asi tinunurei kubva kuneuwo wakashata. ¹⁴ Ngokuti kudai yemwi mwechireguerera vanhu zvichaichi zvavo, aBaba wenyu vari kudenga vanozomureguererawo nemwi. ¹⁵ Asi kudai musigareguereri vanhu zvichaichi zvavo, naBaba venyu avazomureguereriwo yemwi zvichaichi zvenyu. ¹⁶ Kundza kwe izvo, mukazozilaa, musasunga meso dzenyu kudai ngovadziitisi, ngokuti vanodzishaisha meso yenhu kuti vaoneke ngevanhu kuti vari pamutsanyo. Ngegwinyiso ndinoti kwomuri, vatowashira mubhairo wavo. ¹⁷ Asi kwomuri, mukazotsanya, dzodzai musoro dzenyu, nekushamba mumeso menyu. 1 ¹⁸ Kuti musazooneka ngovanhu kuti muri pamutsanyo, asi ndiBaba venyu vari pakawiguika, naBaba venyu avo vanoona mukufishika, vanozomupawo. ¹⁹ Musavziunganidzira gaanho munyika, apo mundu nengura zvinozvishaishira, apo mbavha dzinopwanya kube. ²⁰ Asi unganidzai pfuma kudenga, apo unundu ngokuti ngura zvisikazvishaishiri, apo mbavha adzizo pwanyi nekube. ²¹ Ngokuti panenge pane pfuma wako, apo ndipo panozowavo nemwoyo wako. ²² Chibani chomuiri idziso, ndizvo kudai dziso rako riri dziso kwalo, muiri wako weshe unozozala ngokujeka. ²³ Asi kuti dziso lako lakashata, muwiri wako weshe unozozala ngochidima. Ndizvo kudai kujeka kuri mukati mwako kuri chidima, kukuranyi kwechidima icho! ²⁴ Akuna munhu angakona kushandira madzimambo mawiri, ngokuti unozonyengueredza umwe, ade umweni, nokuti unozoshoora umwe abatirire kunoumweni. Amungashandiri Mwari nemare. ²⁵ Ngendaa yeichi ndinoti kwomuri, musadembatemba mundalamo yenyu, kuti munozoryei ngokuti munozomwei ngokuti ngendaa yemuiri wenyu, kuti munozosimirenhi. Kutendeka akupindi kurya here, nemuiri aupindi zvokupfeka here? ²⁶ Ningirai shiri dzomudenga kuti adzikushi, adzivhuganizi, nokuti kuunganidza mumatura; asi aBaba wenyu vari kudenga unodzipa zvokurya. Yemwiyo amuna kukosha kukuru kupinda idzo here? ²⁷ Ndiani kwomuri ngokudembatemba ungakona kuyenguedzera zuva rimwe rekupona kwake. ²⁸ Nemwi munodembatemba ngeyi ngozvokufuka? Pinimidzai ngominyimbiri yomushango kumera kwayo, aishandi, aripabherere, ²⁹ asi yeni ndinoti kwomuri, naSoromoni muutende wake weshe aazikupfekezka kudai ngoumwe wayo. ³⁰ Asi kudai Mwari echisimidza kudaro mwenje womushango, uwo uripo nyamashi, mangwani unokandirwa muchoto, aazopindi here kukuru kumusimidza, yemwi mune kutenda kudokodoko? ³¹ Ndizvo musadembatemba mwechiti, ‘Tinozoryei?’ nokuti, ‘Tinozomwei?’ nokuti, ‘Tinozosimirenhi?’ ³² Ngokuti vatema vanotsvaga izvi zveshe, ngokuti aBenhu vari kudenga vanoziva kuti munozvikorera izvi zvese. ³³ Asi tsvagai kutanga umambo wekudenga nokutetenda kwawo,zviro zvese zvinozoenguedjerwa kwamuri. ³⁴ Musaneseka ngozuva lamanguana,ngokuti lamanguana rinozviwonera lega. Kutambudjika kwozuva kunokwana zuvalo.