¹ Kumasure koSabatha, muma zambakuyedja ngozuva lokutanga lovhiki, kakaviya Maria Magadhalena noumweni Maria koona ibha. ² Panguvayo, pakaitika chiguidiguidi chikuru; ngokuti nguilosi yaMambo yakadzaka kubva mudhenga, yakaviya ikabvisa bhuwe,nokugala padhenga palo. ³ Kuoneka kake kainga kakafanana nomulazvu, nezvokufeka zvake zvainga zvakachena kunga chando. ⁴ Varindi vakatetemera ngokumutya, vakaita tinga vafa. ⁵ Asi ngilosi yakati kumadjimai, “Musatya iyemwi; ngokuti ndinoziva kuti munotsvaka Jesu uwo wakakohomerwa. ⁶ Asiipo panapa; ngokuti wamuka, sezvainga akavereketa. Viyanhi muone pandau paainga ari. ⁷ Kasikanhi muyende mubvunje vadjidji vake kuti, ‘Wamuka kuvakafa, penhai, unomutanguira kuenda Garireya; konayo munozomuona. Ninguiranhi ndizvona zvandinomubvunja!'' ⁸ Saka vona vakabhudha ngokukasika vesibva paibha, vositya nokudhakala kukuru; vakagogoma koobvunja vadjidji vake. ⁹ Pakaitika kuti, Jesu wakasongana navo, akati, “kaviyaa.” Vona vakaviya vakabhata soka djake, vakamunamata. ¹⁰ Ponapo Jesu wakati kavari, “Musatya; endai mobvunja vanukuna vangu kuti vaende Garireya, vanozondiona konakweyo''. ¹¹ Vona pevainga vesipinda, pakaitika kuti vamweni vevarindi vakaviya kudoroba, vakabvunja vaprista vakuru zvese izvo zvakaitika. ¹² Saka vona vakaungana pamwepo nevakuru vevandhu, apo vakapangana pamwepo, vakapa mare yakawanda masocha, ¹³ vesiti, “Buyanhi kuti vadjidji vake vakaviya nousiku, vakamubha takavata. ¹⁴ Kana izvi zvakazwika ngomutongui, tinozonasirisa kuti musava nendava''. ¹⁵ Vona vakatola mare iyo, vakaita kudhai ngezvevakapangwa, neizwi iri lakashumirwa pakati pevaJudha kumbhera nanhamasi. ¹⁶ Nevadjidji gumi naumwe vakaenda muGarireya, pamutundhu apo paakavabvunjaJesu. ¹⁷ Pevakamuona vakamutamata. Asi vamweni vakadauta. ¹⁸ Jesu wakakwedhera kwavari, akavereketa kwavari esiti, “Simba lese lakapuwa kwandiri mudhenga nopanhika. ¹⁹ Ndizvo endai, mesiita vadjidji kumadzinza ese, mechivababatidza ngozina laBhabha niloMwana niloMweya Wakachena, ²⁰ mechivadjidjisa kungwarira zviro zvese zvendakamupanga; penhai, ndinemwi mazuva ese kumbhera kuguma kenhika''.