¹ Asi ngezuva rokutanga revhiki, mangwanani maishi, vakauya kuiba, vechiunza mitombo inegwema rakanaka yevaiya vanasirira. ² Navo vakaona buwe ramburumbudzwa kubva paiba. ³ Asi naapo vapotera mukati avazi kuona muiri waMambo Jesu. ⁴ Naapo vachakangaidzwa ndizvo, penya, vamuna vairi vakaema pasinde pavo, vakapfeka zvinon'anikira; ⁵ naapo vechityiswa, vakatsikitsira pashi hope dzavo, vamuna vakati kwavari, “Munotsvaka vanopona ngenyi pakati pevakafa? ⁶ Amuna muno, wamuka. Cherechedzai zvaakamuronzera apo achiri muGarire. ⁷ echiti, ‘Kunosisira kuti Mukororo woMunhu apirwe munyara dzevanhu vakashata, akohomerwe, naye ngezuva rechitatu amuke''. ⁸ Navo vakakarakadza mazwi ake, ⁹ vechipetuka kubva kuiba, vakaronza izvi zveshe kunevarigumi naumwe nokunevamweni veshe. ¹⁰ Zvinopano vaiya Maria Magadhareni, Joana, Maria mai aJakobe, pamwepo nemadzimai amweni, vakaronza izvi kunevapostori. ¹¹ Asi vapostori avana kutenda kuneMadzimai, mazwi aya akaoneka kwavari ari asina shwiro. ¹² Asi Petro wakamiruka, akarumba kuenda kuiba, akaguma, wakakotama, akaringira mukati, akaona machira akachena andori ega; naye wakaenda kanyi kwake, echishamiswa ngeicho chakaitika. ¹³ Pazuva iro vairi vavo vaihamba kuenda kuguta rinozwi Emausi, raida kuita makhiromitha gumi narimwe kubva Jerusarema. ¹⁴ Navo vaiereketa umwe kunoumweni ngeizvo zveshe zvakaitika. ¹⁵ Naapo vachaereketa vechibvunzisana, Jesu emene wakakwedzera kwavari, akahamba navo. ¹⁶ Asi madziso avo akaitiswa rubuma kuti vasamuzia. ¹⁷ Wakati kunaJesu, “Ngerenyi shoko iri romunoereketa umwe kunoumweni mwechihamba?” Vakaema vakanyarara, vane hope dzinotambudzika. ¹⁸ Naapo umwe wavo, unozwi Kreopasi, wakapingura, akati kwaari, “Unogara uri wega here muJerusarema usikazii izvo zvakaitikamwo ngaaya mazuva?'' ¹⁹ Naye wakati kwavari, “Zviro zvenyi?” Vakati kwaari, “Izvo zvaJesu weNazaretha, uwo waiya muprofeti anesimba ngezviito namazwi pamberi paMwari nepamberi pevanhu veshe, ²⁰ nenjira yevakamupira ndiyo vapristi vakuru nevatongi vedu nokugura kuti aurawe ngokumukohomera. ²¹ Asi isusu taigonda kuti ndiye waizoripira Isuraeri. Eya, nepadera peizvi zveshe, nyamashi ratoa zuva rechitatu kubvira panguva yezvakaitika izvi. ²² Uyezve, vamweni vemadzimai vechiunga chedu vatishamisa. Vafumira kuenda kuiba, ²³ naapo vasikaoni muiri waJesu, vakauya vechiti vaona chioniso chengirosi, idzo dzati kwavari unopona. ²⁴ Nevamweni veavo vaiya nesu vakaendawo kuiba, vakaona kudai ngezvevakaronza madzimai; asi iye avazi kumuona''. ²⁵ Iye wakati kwavari, “A! Mapenzi nevanononoka kutenda ngomwoyo izvo zveshe zvakaereketwa ngevaprofeti!, ²⁶ Kwaiya kusikasisiri here kuti Kristu atambudzwe ngeizvi zviro zveshe nokupotera muuthende hwake?” ²⁷ Naye echibva ngezvaMosi nezvevaprofeti veshe wakapangidzira kwavari muzvinyorwa zveshe izvo zvakanyorwa ngendaa yake. ²⁸ Ndizvo vakakwedzera kuguta apo pevaienda. Iye wakaita kudai ngounopinda kuenda mberi, ²⁹ Asi vakamukoka vechiti, “Gara nesu, ngokuti rotengama nezuva rooda kubira.” Naye wakapotera koogara navo. ³⁰ Naapo agara navo pakudya, wakatora chingwa, akachibonga, akachigura, akachipa kwavari. ³¹ Nemadziso avo akapembenuka navo vakamuzia; naye wakanyangarika kubva mukuona kwavo. ³² Navo vakati umwe kunoumweni, “Mwoyo yedu aizi kupisha here mukati mwedu apo achaereketa kwetiri munjira nokupangidzira kwetiri zvakanyorwa?”. ³³ Navo vakamiruka ngeiro awa, vakahwirira Jerusarema; vakaona varigumi naumwe vakaungana pamwepo nevamweni avo vaiya navo, ³⁴ vechiti, “Mambo wamuka ngegwinyiso, naye waoneka kunaSimoni”, ³⁵ Zvino vakaronza izvo zvakaitika vari munjira, nokuziikanwa kwaakaita ndivo ngokugura chingwa. ³⁶ Naapo vacharonza izvi, Jesu emene wakaema pakati pavo, akati kwavari, “Kunyarara ngakugare kwomuri”, ³⁷ Asi vakakaruka, vakatyiswa kakurutu, vakapinimidza kuti vaona dzangaradzimu. ³⁸ Asi Jesu wakati kwavari, “Munotambudzika ngenyi? Inobuda ngenyi mibvunzo iyi mumwoyo yenyu? ³⁹ Ringirai nyara dzangu netsoka dzangu, ndini ndemene. Ndibatei muone; ngokuti dzangaradzimu arina nyama nemagodo kudai ngezvomunoona kuti inini ndinazvo''. ⁴⁰ Naapo aereketa kudaro, wakavapangidzira nyara dzake netsoka dzake. ⁴¹ Naapo vasikagondi ngendaa yokudakara nokushamiswa, Jesu wakati kwavari, “Munazvo here panapa zvokudya?”. ⁴² Vakamupa chigurwa chehove chakasasikwa, ⁴³ Jesu wakachitora, akadya pamberi pavo. ⁴⁴ Naapo wakati kwavari, “Aya ndiwo mazwi endakaereketa kwomuri ndichiri nemwi, kuti kunosisira kuti zveshe zvizadzisike izvo zvakanyorwa muMipango yaMosi nezvevaprofeti nezveNduyo ndini''. ⁴⁵ Naapo wakajekisa mipinimidzo yavo kuti vazwisise zvinyorwa, ⁴⁶ naye wakati kwavari, “Kwakanyorwa kudai, Kristu unozotambudzwa nokumukazve kubva kwevakafa ngezuva rechitatu, ⁴⁷ nokutizve kutenderuka nokurekererwa kwezvishaishi kunosisira kuchumairwa ngezina rake kunemadzinza eshe, kutanga muJerusarema. ⁴⁸ Nemwi muri zvapupu zveizvi zviro. ⁴⁹ Ndinotuma chigondiso chaBaba angu padera penyu; asi garai mudhorobha, metsa mupfekeswe ngesimba rinobva mudenga''. ⁵⁰ Naapo Jesu wakavatungamirira kubuda mudhorobha metsa vaguma Bhethani, naye echimirudza nyara dzake wakavafumisa. ⁵¹ Naapo achavafumisa, wakaparadzana navo, akakwidzwa mudenga. ⁵² Navo vakamunamata, vakahwirira kuenda Jerusarema ngokudakara kukurutu,, ⁵³ navo vakatsamwirira kugara muTemperi vechikudza Mwari.