¹ Zvinopano mushongano wokudya chingwa chisina mumera wakakwedzera, unozwi Phasika. ² Nevapristi vakuru nevanyori vaitsvaka njira yokumuuraya ndiyo, ngokuti vaitya vanhu. ³ Zvino Sathani wakapotera munaJudhasi uwo waizwi Isikarioti, umwe wevari gumi navairi. ⁴ Jhudas wakaenda kooshongana nevapristi vakuru nevangwariri veTemperi kuti waizomuita mapirenyi kwavari. ⁵ Navo vakadakara, vakaita chitenderano kuti vamupe mare. ⁶ Ndizvo wakatenda, akatsvaka mukuwo wokumupira kwavari pasina mbungano. ⁷ Zvino zuva rechingwa chisina mumera rakaguma, iro raibaiwa gwai rePhasika, ⁸ Jesu wakatuma Petro naJohani echiti, “Endai mutinasirire Phasika kuti tiridye''. ⁹ Vakati kwaari, “Unoda kuti tirinasirire pari?”. ¹⁰ Wakati kwavari, “Penyai, apo mwoopotera mudhorobha, unozoshongana nemwi mwamuna wakatwara hari mwechimuteera kumhatso yaanopotera, ¹¹ nemwi munozoti kumuna wemhatso, ‘Mudzidzisi unoti kwouri, Riripari kamera revaeni, apo pendinozodya Pasika nevadzidzi vangu?’. ¹² Naye unozomupangidzira kamera guru romuturika rakanasirirwa ndizvo zveshe; tinasirirei apo''. ¹³ Navo vakaenda, vakaona kudai ngezvaakaronza kwavari; navo vakanasirira Pasika. ¹⁴ Naapo awa raguma, wakagara patafura nevapostori. ¹⁵ Naye wakati kwavari, “Ngokudisisa ndaida kudya iri Phasika nemwi ndisati ndatambudzika. ¹⁶ ngokuti ndinomuronzera kuti andichazoridyizve, metsa razadzisika muumambo hwaMwari''. ¹⁷ Jesu wakatora tsani, naapo abonga wakati, “Torai ichi, mukoanisirane pakati penyu. ¹⁸ ngokuti ndinomuronzera kuti andichazomwi kumichero yomuvhini metsa hugume umambo hwaMwari''. ¹⁹ Wakatora chingwa, naapo abonga wakachigura, akachipa kwavari, akati, “Ichi chiri muiri wangu, unopirwa ngepamusoro penyu. Mwechiita ichi kundikarakadza inini''. ²⁰ Netsani ngokudaro ngesure kwokudya, echiti, “Tsani iyi inodururirwa imwimwi chitenderano chitsva mungazi yangu. ²¹ Asi ringirai, nyara youwo unondipira ineni patafura. ²² Ngokuti Mukororo woMunhu unoenda kudai ngezvezvakaemeswa; asi hezvo kuneuwo munhu waanozopirwa ndiye!''. ²³ Navo vakatanga kubvunzana pakati pavo kuti ndiani kwavari waizoita ichi chiro. ²⁴ Kwakabudazve hasha pakati pavo yokuti ndiani kwavari unozoita mukuru. ²⁵ Naye wakati kwavari, “Madzimambo emadzinza anotonga padera pavo; vanodaidzwa kuti vadetseri vevanhu. ²⁶ Asi imwimwi amuzodaro akadi; asi uwo wakakurisisa pakati penyu ngaadai ngewakatsongesesa, nouwo uri mutongi ngaadai ngomuranda. ²⁷ Ngokuti ndiani wakapinda kukura, uwo unogara panekudya nokuti uwo unoshandira? Andiyepi here uwo unogara panekudya? Asi inini ndiri pakati penyu ndakadai ngouwo unoshandira. ²⁸ Asi imwimwi muri avo vakagara neni mukuedzwa kwangu. ²⁹ neni ndinomuemesera umambo kudai ndiBaba anguzve vakandiemesera inini, ³⁰ kuti mudye mwechimwa patafura rangu muumambo hwangu, nemwi munozogara pamadendemaro mwechitonga madzinza gumi namairi aIsuraeri. ³¹ Simoni, Simoni, ringira, Sathani wakatenderwa kuti amupuwe, kuti amutsere kudai ngekoroni, ³² asi inini ndakakukumbirira kuti kugonda kwako kusazopera; newe apo watenderukazve, ugwinyise vakoma vako''. ³³ Petro wakati kwaari, “Mambo, inini ndakanasirira kutoenda newe mutirongo nomukufa''. ³⁴ Jesu wakati, “Ndinokuronzera iwewe Petro, jongwe arizoriri nyamashi, usati waramba katatu kuti aundizii''. ³⁵ Jesu wakati kwavari, “Apo zvandakamutuma musina chikwama nenyede nemagwada, mwakatama chiro here?” Navo vakati, “Atina chetakatama''. ³⁶ Naye wakati kwavari, “Asi zvinopano, uwo unechikwama ngaachitore nounenyede ngokudaro. Nouwo usina shoti ngaatengise bhachi rake atenge shoti. ³⁷ Ngokuti ndinomuronzera kuti ichi chinyorwa chinosisira kuti chizadzisike ndini kuti, ‘Naye wakaerengwa pamwepo nevashaishi;’ ngokuti izvo zvakanyorwa ngendaa yangu zvinozoitika''. ³⁸ Navo vakati, “Mambo, ringirai, shoti mbiri dziri panapa.” Naye wakati kwavari, “Zvakwana''. ³⁹ Jesu wakabuda kubanze, wakaenda kudai ngomushuma wake kuMutunhu wemaOrivhi; nevadzidzi vakamuteera. ⁴⁰ Naapo aguma pandau iyo wakati kwavari, “Kumbirai kuti musapinda mukuedzwa''. ⁴¹ Naye wakasiyana navo nharauko inoda kudai ngeekuposhera buwe, wakagwadama pashi, akakumbira, ⁴² echiti, “Baba, dai mwechida, bvisai tsani iyi kwendiri; asi, kusaita kuda kwangu, asi kuda kwenyu ngakuitike''. ⁴³ Yakaoneka kwaari ngirosi yechibva mudenga yechimugwinyisa, ⁴⁴ Asi mukurwadziwa kakurutu, wakagwinyisira kukumbira; nezia rake raiya rakadai ngemadonhwe makuru engazi echibomhera pashi pamavhu. ⁴⁵ Naapo amiruka kubva pamukumbiro, wakauya kuvadzidzi vake, akavaona vakaata hope ngendaa yokusvipa mwoyo, ⁴⁶ naye wakati kwavari, “Munoatirenyi? Mukai, mukumbire kuti musapinda mukuedzwa''. ⁴⁷ Naapo achaereketa, kwakauya mbungano nouwo waizwi Judhasi, umwe wevari gumi navairi, echivatungamirira. Wakakwedzera kunaJesu kuti amuchingamidze ngomuromo. ⁴⁸ Asi Jesu wakati kwaari, “Judhasi, wopira here Mukororo woMunhu ngokuchingamidza ngomuromo?”. ⁴⁹ Naapo avo vaitendenedza Jesu vaona izvo zvaizoitika, vakati, “Mambo, tobaya here ngeshoti?” ⁵⁰ Umwe wavo wakatema hloko yomupristi mukuru, akagura nzee yake yokumudyo. ⁵¹ Asi Jesu wakati, “Zvakwana izvi!” Naye wakabata nzee yake, akamuponesa. ⁵² Jesu wakati kunevapristi vakuru nevangwariri veTemperi nevakuru vevanhu, avo vakauya kurwisana naye, “Ngenyi mwabuda nokuuya kudai ngevanorwa nembavha, muneshoti nenduku? ⁵³ Naapo ndaiya nemwi mazuva eshe muTemperi, amuzi kundibata. Asi iri riri awa renyu neresimba rechidima''. ⁵⁴ Naapo vakamubata, vakamukweya kuenda naye, vakamuunza mumhatso yomupristi mukuru. Asi Petro wakateera ari kuretu. ⁵⁵ Naapo vabasa muriro pakati poruwanze, vakagara pashi pamwepo, Petro wakagara pashi pakati pavo. ⁵⁶ Naapo musikana, echimuona akagara mukujeka kwomuriro, echimuringisisa wakati, “Munhu uyu waiya naye''. ⁵⁷ Asi Petro wakaramba echiti, “Dzimai, andimuzii''. ⁵⁸ Ngesure kwekamukuwo, umweni wakamuona akati, “Iwewe newe uri umwe wavo.” Asi Petro wakati, “Mwamunewe, inini andiri umwe wavo akadi''. ⁵⁹ Ngesure kwomukuwo waida kuita awa, umwenizve wakagwinyisira kuronza echiti, “Ngegwinyiso munhu uyu waiya naye, ngokuti muGarire''. ⁶⁰ Asi Petro wakati, “Mwamunewe, andichizii chounoronza.” Paripo achaereketa, jongwe rakarira. ⁶¹ NaMambo wakakunukuka, akaringira kunaPetro, naPetro wakakarakadza izwi raMambo, ngenjira yaakaronza kwaari kuti, “Jongwe risati rarira nyamashi, unozondiramba katatu''. ⁶² Petro wakabuda kubanze, akachema kakurutu. ⁶³ Nevamuna avo vakabata Jesu vakamuitira jee, vakamurova;, ⁶⁴ vakamufukidza muhope, vakamubvunza vechiti, “Profeta! Ndiani uwo wakurova?'' ⁶⁵ Vakaereketa zviro zvimweni zvakawanda ndiJesu vechimutsambura. ⁶⁶ Naapo kwaedza, vakaunganidza pamwepo vakuru vevanhu nevapristi vakuru nevanyori, navo vakamukweya kuenda naye kubangano ravo vechiti, ⁶⁷ “Kuti uri Kristu, tironzere.” Asi iye wakati kwavari, “Kudai ndanyamuronzera, amuzotendi; ⁶⁸ kunyazwi ndikanyamubvunza, imwimwi amuzopinguri. ⁶⁹ Asi kubvira zvinopano Mukororo woMunhu unozogara ngokumudyo kwesimba raMwari''. ⁷⁰ Navo veshe vakati, “Iwewe zvino uri Mukororo waMwari here?” Jesu wakati kwavari, “Imwimwi mwatoronza kuti ndini inini.”, ⁷¹ Navo vakati, “Tichatama chapupu chimweni ngenyi? Ngokuti isusu temene tazwa kubva pamuromo wake