¹ Jesu wakati kuvadzidzi vake, “Akungaitiki kuti zvipumhuniso zvisauya; asi ihehe kwaari uwo wezvinouya ndiye!, ² Kurinane kwaari kuti guyo gurutu risungirwe muhuro mwake naye anzvaidzwe muruandhle, kunekuti aite kuti umwe weava vadoko ashaishe. ³ Mwechidzingwarira pachenyu; kudai munun'una wako echishaisha, wechimurambidza, kuti iye echitenderuka, chimurekerera. ⁴ Nokudai echikushaishira kanomwe ngezuva, akakunukuka kwouri kanomwe, naye echiti, ‘Ndinotenderuka,’ newe unosisira kumurekerera''. ⁵ Vapostori vakati kunaMambo, “Wanza kugonda kwedu!” ⁶ NaMambo wakati, “Kudai mwaiya nokugonda kwakadai ngetsangu yemustadhi, mwaizoronza kuneuyu muti womuonde kuti, ‘Bvitwa, usimwe muruandhle,’ nawo waizomupurutana. ⁷ Asi ndiani kwomuri, unemuranda echirima mumunda nokuti kuusha makwai, ungazoti kwaari apo auya echibva kumunda, ‘Uya zvinopano ugare pashi patafura panekudya? ⁸ Aazoti here kwaari, ‘Ndinasirire kudya kwemadeekoni, udzisimidze pachako wechindishandira, metsa ndadya nokumwa; ngesure kweizvi ungazodyawo nokumwawo iwewe? ⁹ Unobonga here uwo muranda ngokuti wakaita izvo zvaakapangwa kuita? ¹⁰ Ngokudaro imwimwi nemwiwo, apo mwazopedza kuita zveshe izvo zvemwakapangwa mwechiti, ‘Tiri varanda vasikadetseri chiro; takaita izvo zvaiya bingo redu''. ¹¹ Vari munjira kuenda Jerusarema Jesu wakahamba ngepakati peSamaria neGarire. ¹² Naapo achapinda muguta, vakashongana naye vanhu gumi vaiya nemapere, vakaema vari kuretu, ¹³ navo vakadaidzira ngemazwi avo vechiti, “Jesu, Mambo, tiitire nyasha''. ¹⁴ Naapo avaona wakati kwavari, “Mwechienda mudzipangidzire kuvapristi.” Naapo vechienda vakamhodyoswa. ¹⁵ Naapo umwe wavo, apo aona kuti wamhodyoka, wakahwirira, echikudza Mwari ngeizwi guru, ¹⁶ naye wakawa ngehope yake patsoka dzaJesu, echimubonga. Iye waiya muSamaria. ¹⁷ Naapo Jesu wakati, “Avazi kumhodyoswa varigumi here? Asi varipari vapfumbamwe?, ¹⁸ Apana wakaoneka echipetuka kookudza Mwari, asi ega uyu mupara here?”. ¹⁹ Naye wakati kwaari, “Miruka, uende; kugonda kwako kwakuponesa''. ²⁰ VaFarisi vamweni vakamubvunza kuti umambo hwaMwari hunozouya riini, Jesu wakavapingura akati, “Umambo hwaMwari ahuuyi ngenjira youngaoneka pamhene. ²¹ akuna naumwe unozoti, ‘Penya, uri panapa!’ Nokuti, ‘Uri apo!’ Ngokuti penyai, umambo hwaMwari huri mukati mwenyu''. ²² Jesu wakati kuvadzidzi: “Mazuva achazouya omunozodisisa kuti muone rimwe remazuva oMukororo woMunhu, nemwi amuzorioni. ²³ Navo vanozoti kwomuri, ‘Penyai apo!’ Nokuti, ‘Penyai, panapa!’ Musazoendapo, nokuti kuvateera. ²⁴ Ngokuti kudai ngemheni inopenya yechijekisa denga yechibva kurupande rumwe rwomudenga kuguma kurupande rumweni rwepashi pomudenga, nokuuya kwoMukororo woMunhu kunozodaro ngezuva rake. ²⁵ Asi kutanga kunosisira kuti ashononeswe ngezvakawanda nokurambwa ngouyu mubarirwana. ²⁶ Kudai ngezvakaitika ngemazuva aNoa, kunozoitikawo ngemazuva oMukororo woMunhu. ²⁷ Vakadya, vakamwa, vakaroora, vakaroodzwa, metsa rakaguma zuva raakapotera ndiro Noa mungarava, nendambi yakauya ikavapedza veshe. ²⁸ Kudaizve ngezvakaitika ngemazuva aRoti, vakadya, vakamwa, vakatenga, vakatengesa, vakasima, vakaaka, ²⁹ asi ngezuva raakabuda ndiro Roti kubva muSodhoma kwakanaya muriro nesorufa zvechibva mudenga zvikavapedza veshe. ³⁰ Izvi ndizvo zvinozoitika ngezuva raanozopangidzirwa Mukororo woMunhu. ³¹ Ngeiro zuva, uwo uri padera pemhatso, nenhumbi dzake dziri mukati mwemhatso, asazodzaka kuti adzitore; nouwo uri mumunda asapetuka. ³² Mwechikarakadza mukadzi waRoti. ³³ Kunyazwi ndiani unozotsvaka kuuyirwa ngokurarama kwake unozokurasha, asi kunyazwi ndiani unozorasha kurarama kwake iye unozokungwarira. ³⁴ Ndinoti kwomuri, ngouwo usiku vairi vanozoapo pamubhedhi umwewo; umwe unozotorwa noumweni unozosiiwa. ³⁵ Vanozoapo vakadzi vairi vechikuya pamwepo; umwe unozotorwa noumweni unozosiiwa''. ³⁶ Naapo vanhu vairi vanozoapo mumunda, umwe unozotorwa noumweni unozosiiwa. ³⁷ Navo vakati kwaari, “Kuri, Mambo?” Naye wakati kwavari, “Apo panomuiri wakafa, ndipo panozoungana ngwanga.