¹ Zvinopano vabhadarisi vemuthero nevashaishi veshe vaikwedzera kwaari Jesu kumuzwa, ² VaFarisi nevanyori vakavhuruvhuta vechiti, “Munhu uyu unoashira vashaishi nokudya navo”. ³ Jesu wakavaronzera uyu muedzaniso echiti, ⁴ “Ndiani munhu kwomuri, kudai anezana remakwai, nerimwe rawo rarashika, aasii here makumi mapfumbamwe nemapfumbamwe mushango, aende kootsvaka iro rakarashika, metsa ariona? ⁵ Naapo ariona, unoripakata pamapfudzi ake ngokudakara. ⁶ Naapo aguma kanyi, unodaidza pamwepo shamwari dzake nevaakirwana vake echiti kwavari, ‘Dakarai neni, ngokuti ndariona gwai rangu iro raiya rakarashika. ⁷ Ndinoti kwomuri, ngokudaro kunozoapo kudakara mudenga ngendaa youmwe mushaishi watenderuka kupinda kudakara ngemakumi mapfumbamwe nemapfumbamwe vari vakarurama vasikatami kutenderuka. ⁸ Nokuti ngouri mudzimai, unezvigurwa zvesirivha zviri gumi, kuti akarasha chimwe chazvo, aabasiri chibani here, atsvaire mhatso nokunasa kutsvakisisa metsa achiona?, ⁹ Naapo achiona, unodaidza pamwepo shamwari dzake nevaakirwana vake echiti, ‘Dakarai neni, ngokuti ndachiona chigurwa chesirivha icho chendakarasha’. ¹⁰ Ngokudaro ndinoti kwomuri, kuripo kudakara pamberi pengirosi dzaMwari ngendaa yomushaishi umwe watenderuka''. ¹¹ Jesu wakati, “Munhu umweni waiya nevakororo vairi. ¹² Nomudoko wavo wakati kunababa ake, ‘Baba, chindikoanisirai chikoaniswa chenhaka chendakaemeserwa.’ Naye wakakoanisira kwavari pfuma yake. ¹³ Ngesure kwemazuva mashomani mwana mudoko wakaunganidza zveshe pamwepo, akaenda kunyika iri kuretu, naye wakaparadza nhaka yake ngokupona kwokushaisha. ¹⁴ Naapo aiya apedza zveshe, yakaguma nzara huru munyikamwo, naye wakatanga kutama. ¹⁵ Ndizvo wakaenda akadzipira kunemunhu wenyikayo, naye wakamutuma kuenda murubaya koousha nguruve. ¹⁶ Naye waido kugutisa ndani yake ngemateko aidyiwa ngenguruve; apana munhu waimupa chiro., ¹⁷ Asi apo anasa kuzia pachake wakati, ‘Kuwandanyi kwakaita varanda vababa angu vane chingwa chinokwana nechokusiya, neni ndiri kufa ngenzara panapa! ¹⁸ Ndomiruka ndiende kunababa angu, ndinozoti kwavari: ‘Baba, ndashaisha pamberi paMwari nepamberi penyu; ¹⁹ neni andichasisiri kudaidzwa kuti ndiri mwana wenyu. Chindibatai kudai ngoumwe wevaranda venyu. ²⁰ Djaha rakamuruka, rikauya kunababa varo. Asi apo achikuretu, baba ake vakamuona vakamuzwira nyasha, navo vakarumba, vakamumbundira, vakamuchingamidza ngomuromo. ²¹ Mwana wakati kwaari, ‘Baba, ndakashaisha pamberi paMwari nepamberi penyu; andichasisiri kudaidzwa kuti ndiri mwana wenyu’. ²² Asi baba vakati kuvaranda vavo, ‘Unzai ngokukasira gauni rakapindisisa kunaka, mumupfekese; muise ndandazi pachikunwe chake nemagwada mutsoka dzake, ²³ mwechiunza mhuru inonuna muiuraye, ngatidye tidakare; ²⁴ ngokuti uyu mukororo wangu waiya afa, naye unoponazve; wakarashika, naye waoneka.’ Navo vakatanga kudakara. ²⁵ Zvinopano mukororo wake wedangwe waiya mumunda; naapo achauya echikwedzera kumhatso, wakazwa kuridzwa nokuzvina. ²⁶ Naye wakadaidza umwe wevaranda, akabvunza kuti izvi zviinyi! ²⁷ Naye wakati kwaari, ‘Munun'una wako wauya nababa ako vamuuraira mhuru inonuna, ngokuti vamuashira achangwaririka nokupona. ²⁸ Asi dangwe rakanyangadzwa, akaramba kungena. Nababa ake vakabuda kubanze, vakamunyengerera. ²⁹ Asi mwana wakapingura, akati kunababa ake, ‘Ringirai, makore aya mazhinji ndakakushandira neni andizi kutongogura chimwe chemipango yako; asi auzi kundipa kachimbudzana kuti ndidakare neshamwari dzangu. ³⁰ Asi wauya uyu mukororo wako uwo wakapedza pfuma yako pamwepo nemamhombo, iwewe wamuuraira mhuru inonuna’. ³¹ Asi baba wakati kwaari, ‘Mwana, undori neni nguva dzeshe neizvo zvendinazvo zvindori zvako. ³² Asi kwaisisira kuti tidakare nokudakadzwa, ngokuti uyu munun'una wako waiya afa, naye unoponazve; waiya akarashika, nazvinopano unoonekazve.