¹ Ngouwo mukuwo, naapo vanhu vasikaerengeki vaungana pamwepo vaitsikirirana, wakatanga kuereketa kunevadzidzi vake kuti, “Ngwarai mumera wevaFarisi, uwo uri kudziitisa. ² Ngokuti akuna chiro chakadumaidzwa chisikazoonekwi, nokuti chakafishika chisikazoziikanwi. ³ Ndizvo icho chemwakaereketa muchidima chinozozwika mukujeka, neicho chemwakapangirana munzee mukati mwemakamera akafishika, chinozoteketeswa padera pechachungu chemhatso. ⁴ Ndinomuronzera, shamwari dzangu, musatya avo vanouraya muiri, ngesure kweizvo vasina chevangaita. ⁵ Asi ndinomunyowedza ngouwo womunosisira kutya; mwechimutya uwo ngesure kwokuuraya, unesimba rokurasha mugehena, eya, ndinomuronzera mutyenyi uwo. ⁶ Zviwanzaburi zvishanu azvitengeswi ngemasendi mairi here? Nechimwe chazvo achizoriyarikanwi pamberi paMwari. ⁷ Asi nebvudzi resoro renyu rakaerengwa reshe. Musatya; imwimwi munopinda kudikanwa kunezviwanzaburi zvizhinji. ⁸ Neni ndinomuronzera, kunyazwi ndiani unonditenda pamberi pevanhu, Mswana woMunhu unozomutendawo pamberi pengirosi dzaMwari; ⁹ asi iye unondiramba pamberi pevanhu, ndinozomurambawo pamberi pengirosi dzaMwari. ¹⁰ Nomunhu weshe unoereketa izwi rakashata ngeMwana woMunhu, kunozorekererwa kwaari; asi uwo unotuka Mweya Wakachena akuzorekererwi kwaari. ¹¹ Naapo voomuunza mumhatso dzokudira nepamberi pevatongi nepamberi pevanesimba, musazodembatemba ngenjira yomunozopingura ndiyo nokuti munozopingura ngemazwi akadini nokuti munozoereketenyi, ¹² ngokuti Mweya Wakachena unozomudzidzisa ngeiro awa icho chinosisira kuti muerekete. ¹³ Umwe wembungano wakati kwaari, “Mudzidzisi, wechironzera mukoma wangu kuti tikoane nhaka.'' ¹⁴ Jesu wakati kwaari, “Munhuwe, ndiani wandiemesa kuti ndiite mutongi nokuti mukoanisiri padera penyu?'' ¹⁵ Naye wakati kwavari, “Ngwarai, mwechidzitarausa kubva mukuemura kweshe; ngokuti kurarama kwomunhu akubvi mukuwanda kwoupfumi hwaanahwo.'' ¹⁶ Jesu wakavaronzera muedzaniso akati, “Munda wegurudza wakabereka zvakawanda ¹⁷ naro rakakarakadza mukati mwaro rechiti, ‘Ndinozoitenyi, ngokuti andina ndau yokuisa zviyo zvangu?’. ¹⁸ Naro rakati, ‘Ndinozodai; ndoputsira pashi matura angu, ndiake anopinda kukura, naapo ndinozoisa zviyo zvangu zveshe nezviro zvangu. ¹⁹ Neni ndinozoti kumweya wangu, ‘Une zviro zvakawanda zvakaunganidzirwa kukwanisa makore mazhinji, chigarisika, wechidya, wechimwa, wechidakara. ²⁰ Asi Mwari wakati kwaari, ‘Iwewe benzi! Ngouyu usiku mweya wako unozodaidzwa kubva kwouri. Neizvo zvewakadzingwaririra zvinozoita zvaani?’. ²¹ “Ndizvo zvakaita uwo unodziunganidzira upfumi, asi asiri mupfumi pamberi paMwari''. ²² Jesu Wakati kunevadzidzi vake, “Ngeiyi ndaa ndinoti kwomuri, musadembatemba ngendaa yokurarama kwenyu, kuti munozodyenyi, nokuti ngendaa yomuiri wenyu, kuti munozofukenyi. ²³ Ngokuti kupona kunopinda kudya, nomuiri unopinda zvokufuka. ²⁴ Mwechipinimidza ngemakungu, kuti aakushi nokuti kuunganidza, aana tsapi nokuti matura, asi Mwari unoaburira. Imwimwi munopinda kwakaitawani kudikanwa kuneshiri!, ²⁵ Ndiani kwomuri ngokudembatemba ungatutsira zuva rimwe rokupona kwake? ²⁶ Ndizvo kudai imwimwi musina simba rokuita icho chidodoko, munodembatemba ngenyi ngezvimweni? ²⁷ Pinimidzai ngemaruva, kukura kwaanoita; aashandi, zve, aaruki; asi inini ndinoti kwomuri, naSoromoni muuthende hwake hweshe aazi kumbopfekeswa kudai ngerimwe rawo. ²⁸ Asi kudai Mwari echipfekesa kudaro mwenje worubaya, uwo uripo nyamashi namangwani unokandirwa muchoto, iye unozopinda kwakaitawani kumupfekesa, imwimwi munokutenda kudoodoko! ²⁹ Musatsvaka zvokudya nezvokumwa nokuti musanyunyuta., ³⁰ Ngokuti madzinza eshe enyika anozvitsvaka izvi zveshe, asi Baba enyu vanozia kuti munozvitama izvi zviro. ³¹ Asi tsvakai umambo hwake, neizvi zvinozotutsirwa kwomuri. ³² “Musatya, imwimwi chikwata chidoko, ngokuti chiri chidisiso chaBaba enyu kuti vamupe umambo. ³³ Tengesai zvomunazvo, mukovere varombo; mudziitire zvikwama zvisikatsakari, noupfumi mudenga husikaperi, apo mbavha peisikakwedzeri nokuti unundu pousikaparadzi. ³⁴ Ngokuti apo pouri upfumi hwenyu, apo ndipo panemwoyo wenyu. ³⁵ Zviunu zvenyu ngazvisungiswe nezvibani zvenyu ngazvijeke; ³⁶ nemwi muite kudai ngevanhu vanorindira mambo wavo apo oobva kudhiri romuchadho, kuti apo oouya nokudododza, vamubeurire paripo. ³⁷ Vanomuchena avo varanda apo mambo oouya unozovaona vechirinda; ngegwinyiso ndinoti kwomuri, unozodzisimidza nokuita kuti vagare pashi panekudya, naye unozouya nokuvashandira. ³⁸ Kudai baba echizouya ngomurindo wechipiri nokuti wechitatu, andovaona vakadaro, vanomuchena avo varanda. ³⁹ Asi mwechizia ichi, kuti kudai munewemhatso aiya azia awa iro raiuya ndiro mbavha, waizorinda asikatendi kuti mhatso yake ipwanyiwe. ⁴⁰ Ndizvo imwimwi itai vakanasirirwa, ngokuti Mwana woMunhu unouya ngeawa romusikapinimidzi''. ⁴¹ Petro wakati, “Mambo, unoereketa muedzaniso uyu kwetiri here nokuti kwavari veshe?” ⁴² Mambo wakati, “Ndiani muranda unogondeka newakangwara, uwo mambo wake unozomuemesa padera pemhatso yake, kuti avape kudya kwavo ngomukuwo wakwo? ⁴³ Unomuchena uwo muranda apo mambo wake oouya unozomuona echiita kudaro. ⁴⁴ Ngegwinyiso ndinoti kwomuri, unozomuemesa padera pezviro zveshe zvaanazvo. ⁴⁵ Asi kudai uwo muranda echizoti mumwoyo mwake, ‘Mambo wangu unononoka kuuya,’ orootanga kurova varanda vevamuna nevarandakadzi, adye nokumwa nokuradza, ⁴⁶ mambo womuranda uwo unozouya ngezuva raasikamukariri neawa raasikazii, naye unozomugura kuita zvigurwa zviiri, amuemesere chikoaniswa chake pamwepo nevasikatendi. ⁴⁷ Nouwo muranda waizia chiri kuda kwamambo wake, asi aazi kunasirira nokuti kuita kudai ngokuda kwake, unozoshwapurwa ngemishwapu mizhinji. ⁴⁸ Asi uwo usikazi kuzia, akaita izvo zvinosisira kuti ashwapurwe, unozoshwapurwa ngemishwapu mishomani. Nokwaari uwo wakapuwa zvakawanda, kunozobvunzwa zvakawanda. Nokwaari uwo wevakapa zvakawanda, vanhu vanozobvunza zvakapinda kuwanda. ⁴⁹ “Ndakauya kukandira mwoto padera penyika; neni ndinozodenyi kuti mwoto watobaka nazvinopano. ⁵⁰ Asi ndinorubhabhatidzo rwokubhabhatidzwa ndirwo; ndinokumanikidzwa metsa rwaitika. ⁵¹ Munopinimidza here kuti ndakauya kupa kunyarara munyika? Ndinomuronzera kuti haiwa, asi kuparadzana! ⁵² Ngokuti kubvira zvinopano vanozoapo vashanu mumhatso imweyo vakaparadzana, vatatu vakapesana nevairi, nevairi vakapesana nevatatu; ⁵³ “Baba vanozopesana nomukororo, nomukororo unozopesana nababa, namai vanozopesana nemwanasikana, nemwanasikana unozopesana namai, namazvarira vanozopesana nomuzakazi wake, nemuzakazi unozopesana namazvarira ake''. ⁵⁴ Jesu wakatizve kumbungano, “Apo mwoona gore rechimirukira mudenga ngokumabirirazuva, paripo munoti, ‘Kunoda kunaya,’ nakwo kunonaya., ⁵⁵ Naapo mwoona dutu rechivhuvhuta kubva ngokubani, munoti, ‘Kunozopisha,’ nakwo kunopisha. ⁵⁶ Imwimwi vadziitisi! Munokona kududzira hope yenyika neyomudenga; asi ngenyi musikazii njira yokududzira ndiyo nguva iyi? ⁵⁷ “Amukoni ngenyi ngokwenyu kuparadzanisa icho chakanaka? ⁵⁸ Naapo wechienda negaa rako pamberi pamambo, ita kuti utenderane naro uchimunjira, kuti asazokukweya akuunze pamberi pomutongi, uwo unozokupira kumuphurisa nomuphurisa unozokuisa mutirongo. ⁵⁹ Ndinoti kwouri, autongozobudimwo usati waripa nesendi rokupedzisira.