¹ Naapo echipinda, wakaona munhu waiya bofu kubvira pakubarwa kwake. ² Nevadzidzi vake vakamubvunza vechiti: “Rabhi, ndiani wakashaisha, uyu munhu nokuti vabari vake, kuti abarwe ari bofu?”. ³ Jesu wakapingura akati: “Uyu munhu aazi kushaisha nokuti vabari vake, asi kuti mishando yaMwari ioniswe mwaari. ⁴ Kunosisira kuti tishande mishando youwo wakandituma achimasikati; ngokuti usiku hunouya, naapo apana ungakona kushanda. ⁵ Naapo ndichindorimwo munyika, ndiri kujeka kwenyika.” ⁶ Naapo aereketa izvi, wakapfira mata pamavhu, wakakanya matope ngemata, wakadzodza madziso aro ngedope. ⁷ Wakati kweriri: “Enda, ushambe muGandwa reSiroamu.” (Ngokukumuchwa kunoti Wakatumwa.) Ndizvo wakaenda, akashamba, wakauya oona., ⁸ Ndizvo vaakirwana vake naavo vaimuona kare, ari mupemhi, vakati: “Uyu andiyepi here munhu uwo waigara pashi echipemha?”. ⁹ Vamweni vakati: “Ndiye.” Vamweni vakati, “Haiwa, asi unotodzana naye.” Naye wakati: “Ndini.”, ¹⁰ Ndizvo vakati kwaari: “Madziso ako akaita mapembenudzirwenyi?”. ¹¹ Wakapingura, akati: “Munhu unozwi Jesu wakaita matope, akadzodza madziso angu, akati kwendiri: ‘Enda Siroamu ushambe.’ Ndizvo ndakaenda ndikashamba, ndikaona.” ¹² Navo vakati kwaari: “Uri pari munhuwo?” Wakati: “Andizii.” ¹³ Vakaunza kuvaFarisi munhu uwo waiya bofu. ¹⁴ Raiya zuva reSabatha apo Jesu paakaita matope akapembenudza madziso aro. ¹⁵ Ndizvo vaFarisi vakamubvunzazve kuti wakaita mapembenudzirwenyi. Naye wakati kwavari: “Wakaisa matope pamadziso angu; ndakashamba, neni ndinoona.” ¹⁶ Ndizvo vamweni vevaFarisi vakati: “Uyu munhu aabvi kunaMwari, ngokuti aangwariri Sabatha.” Asi vamweni vakati: “Munhu mushaishi ungaita maitirenyi iyi mioniso?” Kwakaapo kuparadzana pakati pavo. ¹⁷ Ndizvo vakatizve kunebofu: “Unotinyi ndiye iwewe, ngendaa yokuti wakapembenudza madziso ako?” Naye wakati: “Muprofeti.” ¹⁸ Ndizvo vaJudha avazi kutenda kuti ndiye waiya bofu nokuti wakapembenudzwa, metsa vakadaidza vabari vouwo wakapembenudzwa. ¹⁹ navo vakavabvunza vechiti, “Uyu mwana wenyu here, uwo womunoti, wakabarwa ari bofu? Ndizvo zvino unoita maonerei?. ²⁰ Ndizvo vabari vake vakapingura vakati: “Chetinozia ngechokuti uyu mwana wedu nokuti wakabarwa andori bofu. ²¹ Asi kuti unoita maonerenyi atizii, nokuti ndiani wakapembenudza madziso ake, atizii. Mubvunzenyi; wabva muzero, unozodziereketera pachake.” ²² Vabereki vake vakarbuya izvi ngokuti vaitya vaJudha, ngokuti vaJudha vaiya vakatenderana kuti kunyazwi ndiani unozomutenda kuti iye ndiKristu, unozodzingwa kubva mumhatso yokudira. ²³ Ngeiyi ndaa vabari vake vakati: “Wabva muzero, mubvunzenyi.” ²⁴ Ndizvo vakamudaidza ngekwechipiri uwo waiya bofu, vakati kwari: “Irikidza Mwari iwewe, isusu tinozia kuti uyu munhu mushaishi.” ²⁵ Ndizvo iye wakapingura, akati: “Kunyazwi mushaishi, andizii. Chiro chimwe chega chendinozia, ngechokuti inini ndaiya bofu, zvino ndinoona.” ²⁶ Vakati kwaari: “Wakaitenyi kwouri? wakakuvula madjisso ako here?”. ²⁷ Wakavapingura echiti: “Ndatomuronzera nemwi amuzi kupurutana. Ngenyi mwechida kuzwazve? Nemwiwo munoda kuita vadzidzi vake here?". ²⁸ Vakamutuka vechiti: “Iwewe uri mudzidzi wake, asi isusu tiri vadzidzi vaMosi. ²⁹ Tinozia kuti Mwari wakareketa kunaMosi, asi uyu munhu, atizii paanobva.” ³⁰ Munhu wakapingura, akati kwavari: “Iri igumo! Kuti amuzii paanobva, asi wakapembenudza madziso angu. ³¹ Tinozia kuti Mwari atendii vashaishi. Asi kunyazwi ndiani unomuremeredza nokuita kuda kwake, Mwari unomupurutana. ³² Kubvira pakutanga akuzi kumbozwika kuti munhu wakambopembenudza madziso owakabarwa ari bofu. ³³ Kudai uyu munhu asikabvi kunaMwari, aangakoni kuita chiro.” ³⁴ Vakamupingura vakati kwaari: “Iwewe wakabarirwa mukushaisha yaamho, newe wotidzidzisa here?” Vakamudzingira kubanze. ³⁵ Jesu wakazwa kuti vona vakamugogomera musinagoge: ena wakamuwana akati “Iwewe unotenda Mukororo woMunhu here?”. ³⁶ Naye wakapingura akati: “Ndiani, Mambo, kuti nditende kwaari?". ³⁷ Jesu wakati kwaari: “Wamuona, ndiyezve unoereketa newe.” ³⁸ Wakati: “Mambo, ndinotenda.” Naye wakamudira., ³⁹ Jesu wakati: “Inini ndakaviira kuzotonga munyika muno, kuti vasingaoni vaone nevanoona vaitwe mapofu.” ⁴⁰ Vamweni vevaFarisi vainga varipo , vaizwa swiro iswi, vakati kwaari:: “Nesuwo tiri mapofu here?". ⁴¹ Jesu wakati kwavari: “Kudai mainga mapofu, maizodai musinga shaishi. Asi zvino munoti, ‘Tinoona,’ kushaisha kwenyu kunondogara kuripo.