¹ Ngokuti imwimwi mwemene munozia, hama, kuti kuuya kwedu kwomuri akuzi kuita kusina shkwiro. ² Asi kunyazwi takatambudzika pakutanga nokuitirwa zvinotsverudza muFiripi, kudai ngezvomunozia, takatsunga munaMwari wedu kureketa kwomuri vhangeri raMwari ngokutambudzika kukuru. ³ Ngekuti kupota kwedu akuzi kubva mukupauka akadi nokuti mukusikasukika nokuti mukuchengedzera. ⁴ Asi kudai ngezvetakatendwa ndiMwari kuti tigondwe ngevhangeri, ndizvo tinoreketa, haiwa kudakadza vanhu, asi Mwari uwo unoedza mwoyo yedu. ⁵ Ngekuti munonasa kuzia, naMwari ndiye chapupu chedu, atizi kuoneka kunyazwi ngouri mukuwo techironza mazwi ourimbwi, kudai ngezvomunozia, nokuti zano rokuemura pfuma. ⁶ Tisikatswaki kuirikidzwa ngevanhu, nokuti kunobva kwomuri nokuti kunobva kunevamweni. ⁷ kunyazwi taikona kuita mutwaro kwomuri, kudai ngevapostori vaKristu. Asi taiya takapfaa pakati penyu, kudai ngezvaanoita mureri apo echirera vana vake. ⁸ Ndizvo techimudisisa taida kukoverana nemwi haiwa vhangeri raMwari rega, asi nokupona kwedu kwemene, ngokuti imwimwi mwakaita vanopinda kudikanwa kakuru kwetiri. ⁹ Ngokuti munokarakadza kushanda kwedu nokurwadziwa hama. Takashanda usiku nemasikati, kuti tisazoita mutwaro kunoumwe wenyu, apo petakachumaira kwomuri vhangeri raMwari ¹⁰ Imwimwi muri zvapupu, naMwariwo, ngokucheneswa nokurungama nokusakaitirwa ndaa kwakaitawani kwetakaita kwomuri imwimwi vatendi. ¹¹ Kudai ngezvomunozia njira yetakaita kunoumwe ngaumwe wenyu, kudai ndibaba vanoitira kunevana vavo, ¹² techimupanga nokumugwinyisa nokupupura, kuti muhambe kudai ngezvinosisira kuna Mwari, uwo unomudaidza kuumambo wake wemene nouthende. ¹³ Isusuwo tinoangira kubonga Mwari ngeizvi, kuti apo pemwakaashira izwi raMwari iro remwakazwa kubva kwetiri, mwakariashira haiwa kudai ngeizwi revanhu, asi kudai ngezveriri gwinyiso, izwi raMwari, iro rinoshandawo mukati mwenyu imwimwi vatendi. ¹⁴ Ngokuti imwimwi, hama, mwakaita vatedzereri vezviara zvaMwari munaKristu Jesu izvo zviri muJudhiya, ngokuti mwakatambudzwawo ngezviro zvakatodzana ngevanhu venyika yenyu kudai ngezvevakatambudzwa avo ngevaJudha. ¹⁵ avo vaJudha vakauraya veshe. Mambo Jesu nevaprofeti, vakatidzinga, vasikadakadzi Mwari, vari vanorwisana nevanhu veshe, ¹⁶ vechitirambidza kureketa kunevemadzinza kuti vaponeswe. Ndizvo vakaangira vechizadzisa chipimo chekushaisha kwavo ngenguva dzeshe. Asi ushungu waMwari wakauya padera pavo. pakupedzisira. ¹⁷ Asi kudai tisu, hama, petakaparadzaniswa nemwi kwenguva doko, mukuonana kwemuiri, haiwa kwomwoyo, takatsamwirira kuona hope yenyu ngokumushuwira kakurutu. ¹⁸ Ngekuti tinoda kuuya kwomuri. Inini, Phauri, kamwe nokwechipiri, naSathani wakatipinga. ¹⁹ Ngokuti chiinyi gonda redu nekuti kudakara kwedu nokuti dzungudza retinoganza ndiro pamberi paMambo wedu Jesu pakuuya kwake? Andimwipi here? ²⁰ Ngekuti imwimwi muri uthende wedu nekudakara kwedu.