Salmo 25 Salmo de David.

1 A Ti, ó Iahveh, elevo a miña alma.

2 Meu Deus, confío en ti!

Non sexa eu avergoñado,

non se alegren de min os meus inimigos.

3 De certo que ningún dos que confían en ti

será defraudado.

porén serán avergoñados os que se rebelan sen motivo.

4 Móstrame os teus camiños, ó Iahveh,

Ensíname as túas veredas.

5 Encamíñame na túa verdade,

e ensíname, porque ti es o Deus da miña salvación.

En ti esperei todo o día.

6 Lémbrate, ó Iahveh, das túas piedades e das túas misericordias, que son perpetuas;

7 Non te lembres dos pecados da miña xuventude nen das miñas rebelións.

Conforme á túa misericordia,

lémbrate de min,

pola túa bondade, ó Iahveh.

8 Iahveh é bo e xusto;

por tanto El mostrará o camiño aos pecadores.

9 Dirixe os humildes na xustiza,

e ensina aos humildes a súa vereda.

10 Todos os camiños de Iahveh son misericordia e verdade,

para aqueles que observan o seu pacto e os seus preceptos.

11 Ó Iahveh, por amor do teu nome,

perdoa a miña iniquidade, porque é grande.

12 Quen é o home que teme a Iahveh?

El instruirao no camiño que debe escoller.

13 A súa alma habitará na prosperidade,

e a súa descendencia herdará a terra.

14 Os segredos de Iahveh son para os que o temen,

e El fará que coñezan o seu pacto.

15 Os meus ollos están sempre cara Iahveh,

pois El tirará os meus pés da rede.

16 Vólvete a min e ten compaixón,

porque estou só e aflixido

17 As angurias do meu corazón multiplicáronse.

líbrame do meu sufrimento!

18 Olla a miña aflición e traballos,

e perdoa todos os meus pecados.

19 Mira os meus inimigos, que son moitos,

e que me odian con odio violento.

20 Garda a miña alma e líbrame;

non sexa eu avergoñado, porque me refuxio en ti.

21 Integridade e rectitude me garden,

porque eu espero en Ti.

22 Ó Deus, rescata a Israel de todas as súas angurias!