¹ Paulu, mutwanga wa Leza alimwi mutumwa waka Jeso Kilisito ku bantu bashomi basale baka Leza u ku luzhibo lwa bwini lolo luhuminana u buna Leza, ² alimwi u lulangilo lwa bumi butamana bobo Leza, walo u tachengi, ndwaakashomezha lono luundu kalutana kubawo. ³ Kuchiindi cheelele wakazubulula izwi lyakwe kwiita mu kukambauka koko kundakapewa kwiingayina u kushimwinwa u Leza mufwutuli wezu. ⁴ Ukwa Tayitasi, mwana mwini mwini mu kushoma kwesu. Luse u luumuno luhwa kwa Leza Ushesu alimwi u Kilisito Jeso mufwutuli wesu. ⁵ Kaambo kachechi ndakakushiya ku Kileti, kwaamba u kashibike kabotu shintu shesho shitana ku bambwa alimwi u kubika basololi mu minzhi mikando yoonse mbubona mbundakakulailila. ⁶ Mukando wa chikombelo abe muntu wiina kampenda, walo u twele mukaintu womwi, uuli bana bashomeshi batali bakumwa kumwa mushintu sha bulyo nikuba kubula bulemu. ⁷ Kulyeelele mulangilizhi, mbwaabamba ing'anda ya Leza, abule kampenda. Teelele kuba muntu u tazholwa, u talemani kufwambaana, u takolwa mukuku, u tali shinkondo, alimwi u tali shikalifwune. ⁸ Ulyeelele, kuba muntu shichimwa beenzu, uzandisha kuchita bubotu, uuli busongo, ululeme, usalala, alimwi u lozha kulichindulula mwini. ⁹ Ulyeelele kukwatisha ku bwini bwa mulumbe wezo walo ngwaakayiishiwa, kwaamba ati alozhe kuzumya zumya bamwi kubuyiishe bwa bwini alimwi u kuchindulula bamwi babo bachikazha. ¹⁰ Kaambo nkubali bantu banji banji batazanda kubulwa, baamba mazwi a bulyo alimwi bashiluchengo, a kando kuli babo bashikupalulwa. ¹¹ Kulyeelele babo kubalesha. Balanyonganya bulyo mikwashi yoonse kwiita mukuyiisha injiisho sha bulyo u kuyana impindu aali nchibatayiisha. ¹² Mushinshimi wakwabo beni wakaamba ati, "Bantu baku Kilete lyoonse mbabeshi, mbanyama babiyabi, bakata alimwi mbalyato." ¹³ Bobu bumboni mbwa bwini. Ubobo, bachindulule chakumaninina, kwaamba ati babe bashomeshi mu lushomo, ¹⁴ mutabikili mizeezo tunshiya nshiya twa ba Juda nikuba kushimwinwa ku bantu baka kuhwa ku lushinizho. ¹⁵ Kuli babo basalala, shoonse shintu shilasalala. Pele kuli babo basofweele alimwi bashikutashoma, kwiina chisalala pe, pele boonse mizeezo yabo alimwi u manjezheezha abo alisofweele. ¹⁶ Balalyaamba kumuzhiba Leza, pele balamukaka kwiita mu michito yabo. Mbantu basesemya, batateeleli, alimwi batalozha kuchita milimo mibotu niiba buti.