¹ Inzho Jeso naakakwiita, wakabona mulombwana wakazhalwa boofwu kuhwa kubuzhalwe bakwe. ² Bashichiiya bakwe bakamubuzha ati, "Labi, nguni wakachita chibi, wezu mulombwana naa bazhali bakwe, kwaamba walo azhalwe moofwu?" ³ Jeso wakabayingula ati, "Takuli kuti wezu mulombwana wakachita chibi pe, naaba bazhali bakwe pe, pele nkwaamba ati milimo ya Leza izubululilwe mwakwe. ⁴ Tulyeelele kuchita milimo yakwe wezo walo wakantuma nikuchili muunza. Mashiku alashika lelyo nikwiina naaba womwi ukonzha kusebeza. ⁵ Awo Ume ninchili muluundu, Ume ndime mumuni wa luundu." ⁶ Naakamana Jeso kwaamba sheshi shintu, wakafwila mate anshi, wakabumba bulongo bwa mate, amane wakamunanika bulongo amenso akwe. ⁷ Wakaamba kwakwe ati, "Koya, kasambe mukazhiba ka Silowamu" (chalo chipandulula ati "kutumwa").Wezo mulombwana wakaya, wakasamba, amane wakazhoka ulabona. ⁸ Inzho bashimukobonina wezu mulombwana alimwi ubabo bakamubona checho chiindi naakaakulomba lomba bakaamba ati, "Saa wezu ingwe mulombwana welya wakaakukala alimwi u kulomba lomba?" ⁹ Bamwi bakaamba ati, "Inguwe." Bamwi bakaamba ati, "Pe pe, pele uli ukoya inguwe." Pele walo wakaamba ati, "Ndime." ¹⁰ Bakaamba kwakwe ati, "No inzho menso ako akayalulwa?" ¹¹ Wakayingula ati, "Mulombwana utewa ati Jeso wachita bulongo amane wananika kumenso amane wakaamba kwangu ati, 'Koya ku Silowamu u kasambe.' Ubobo ndakaya kusamba, ndamana ndakatambula kubona alimwi." ¹² Bakaamba kwakwe ati, "Anu ulikwi?" Wakayingula ati, "Ume kwiina nchinzhi." ¹³ Bakamuleta wezu mulombwana walo wakaakuli moofwu kuba Falisi. ¹⁴ Inzho kamuli mubuzuba bwa muchibelu awo Jeso naakabweza bulongo amane wayayula menso akwe. ¹⁵ Awo alimwi ba Falisi bakamubuzha mbuli mbwakabona bona. Wakaamba kwabo ati, "Wakambika bulongo ku menso angu, ndakasamba, amana ume ndakabona." ¹⁶ Bamwi ba Falisi bakaamba ati, "Wezu muntu wiina naakahwa kwa Leza kaambo walo tabamba chibelu." Abo bamwi bakaamba ati, "Saa muntu shishibi ulakonzha buti kuchita shitondezho shilibolya?" Ubobo kwakaba kwaandaana akati kabo beni. ¹⁷ Ubobo bakamubuzha wezu moofwu alimwi, "No ulaamba buti akwe wezu, u kuti wakakuyalula menso ako?" Wezu mulombwana moofwu wakaamba ati, "Wezu mushinshimi." ¹⁸ Alimwi ba Juda bayina nibakaashoma akwe kwaamba ati kali moofwu amana watambula kubona chita lelyo nibakoompolola bakamuzhala wezu wakatambula kubona. ¹⁹ Bakababuzha bazhali bakwe ati, "Saa wezu ngu mwanenu ngumwaamba ati wakazhalwa boofwu? No mbuti kayi alimwi ulabona?" ²⁰ Awo bazhali bakwe bakabayingula ati, "Uswe tulizhi ati wezu mwanesu alimwi ati wakazhalwa kataboni. ²¹ Inzho mbwaabona, uswe tatuchizhi. Amumubuzhe, wezu mukando. Ulalozha kulyaambilila mwini lwakwe." ²² Bazhali bakwe bakashaamba bobo shintu sheshi, kaambo bakaakutiya ba Juda. Kaambo ba Juda bakaakuteelezhanyinye kale kwaamba ati naakuti umwi wapa bumboni bwakuti ngu Kilisito, ati ulatandwa kuhwa mu Sinagogi. ²³ Kaambo kachechi, bazhali bakwe bakaamba ati, "Wezu mukando, amumubuzhe." ²⁴ Alimwi lwabili bakamoompolola wezu mulombwana wakaakuli moofwu bamane bakaamba kwakwe ati, "Mupe bulemu Leza. Uswe tulizhi kwaamba ati wezu muntu ngushishibi." ²⁵ Amane wezu mulombwana wakayingula ati, "Ume nshimwizhi naakuti ngushishibi. Ume chintu chomwi checho nchinzhi: Ume ndaakuli moofwu, amana ninzho ndabona." ²⁶ Bamane bakaamba kwakwe ati, "No wakachita buti kwako? No menso ako wakaayalula buti?" ²⁷ Wakabayingula ati, "Ume ndamushimwina kale, mwamana mwiina nimwateelela! Kaambooyi mulazanda mukuchiteelela alimwi? Saa amwe mulazanda kuba bashichiiya bakwe, naambuti?" ²⁸ Bakamutuka amane bakaamba ati, "Uwe ulishichiiya wakwe, pele uswe tuli bashichiiya baka Mozesi. ²⁹ Uswe tulizhi ati Leza wakaamba kwa Mozesi, pele uswe tatukwizhi wezu walo nkwaakahwa." ³⁰ Wezu mulombwana wakabayingula amane wakaamba kwabo ati, "Chechi chilazoosha, kwaamba ati tamukwizhi koko walo nkwaakahwa, amana walo wakaayalula menso angu. ³¹ Tulizhi kwaamba ati Leza talozha kuteelela muchita shibi pe, pele naakuti ulakomba Leza amana ulachita luzando lwakwe, wezo ulamuteelela. ³² Kuhwa luundu nilwakatalika kwiina nikwakateelelwa kwaamba ati umwi wakayalula menso a muntu moofwu kuhwa kukuzhalwa kwakwe. ³³ Naakuti wezu mulombwana wiina naakahwa kwa Leza, kwiina nchaakonzha kuchita." ³⁴ Bakamwiingula bamane bakaamba kwakwe ati, "Uwe wakazhalwa muchibi chakumaninina, amana ulatuyiisha uswe?" Bamane bakamufwusa ansengwe. ³⁵ Jeso wakateelela kwaamba ati bakamutanda kuhwa mu Sinagogi. Bakaswaangana amane wakaamba ati, "Saa ulashoma mu Mwanaa Muntu?" ³⁶ Wakayingula amane wakaamba ati, "Saa nguni, Mwami, kwaamba ambweni ndashoma mwakwe?" ³⁷ Jeso wakaamba kwakwe ati, "Wamubona, amana inguwe wezo walo ngumubandika aze." ³⁸ Wezu mulombwana wakaamba ati, "Mwami, Ume ndashoma," amane wakamukomba. ³⁹ Jeso wakaamba ati, "Ume ndakazhiza mono muluundu kubeteka kwaamba ati wezo u taboni kwaamba abone amana kwaamba ati babo boonse babona babe boofwu." ⁴⁰ Bamwi ba Falisi bakachiteelela chechi bamane bakamubuzha ati, "Saa aswe tuli boofwu?" ⁴¹ Jeso wakaamba kwabo ati, "Kuti nimwaakuli boofwu, nimwaakwiina chibi, pele ninzho mulaamba ati, 'Mulabona,' nkukuti shibi shenu shilaakuchiliwo."