¹ "Mutabi nimuleka myonzo yenu kupenga. Amushome mwa Leza; alimwi amushome u mwangu. ² Mung'anda yaka Taata muli masena manji manji. Kuti nikwataakuli bobo, indamushimwina, ubobo ndaya kumubambila busena. ³ Naakuti ndaya u kumubambila busena, ndakazhoka alimwi kwiza kumutola kwangu, kwaamba koko Ume kwinjakuba amwe mukabe nkuko. ⁴ Muliizhi inzhila koko Ume nkwindaakuya." ⁵ Tomasi wakaamba kwa Jeso ati, "Mwami, uswe tatukwinzhi koko nkuulyakuya; notulaizhiba buti inzhila?" ⁶ Jeso wakaamba kwakwe ati, "Ume ndime inzhila, bwini, alimwi u bumi; kwiina naaba womwi ukonzha kuya kwa Taata chita kwiitila mwangu. ⁷ Naakuti umwe nimwakanzhiba, aze Taata nimwakaakumwinzhi. Kuhwa awa ninzho mwamuzhiba alimwi u kumubona." ⁸ Filipo wakaamba kwa Jeso ati, "Mwami, tutondezhe Bauso, ati bobo uswe twalamwa," ⁹ Jeso wakamwaambila ati, "Ume ndaakulya amwe kwa chiindi chilafwu amana umwe tamuna kunzhiba, Filipo? Woonse wezo wabona ume wabona u Taata. Ulaamba buti, 'ati tutondezhe Bauso'? ¹⁰ Saa umwe tamushomi kwaamba ati Ume ndili mwa Taata alimwi Taata uli mwangu? Mazwi aza Ume ngumushimwina Nshaamba kuhwa kunsana shangu, pele bulyo Taata wezo uupona mwangu nguuchita milimo yezhi. ¹¹ Amushome mwangu kwaamba ati Ume ndimwa Taata, alimwi aze Taata uli mwangu, naa bulyo mushome u kaambo ka milimo yalo. ¹² Chini, chini, Ume ndamushimwina, wezo woonse uu shoma mwangu ulakeechita milimo yezhi njichita, alimwi ulakachita milimo mikandosha kubaala yezhi kaambo kakuti Ume ndabweela kwa Taata. ¹³ Kufwumbwa checho nchimukakakumbila mwizhina lyangu, Ume ndakachichita kutewa ati Taata alemekwe kwiita mu Mwana. ¹⁴ Naakuti Ume mwankumbila kufwumbwa chintu kwiita mwizhina lyangu, Ume ndakachichita. ¹⁵ Naakuti mulinfwini Ume, mulakaabamba malailile angu, ¹⁶ ubobo Ume ndakakomba kwa Taata, amana ulakamupa uumwi wakumuzumya zumya kwaamba akabe amwe lyoonse--- ¹⁷ walo Moza wa bwini. Luundu talukonzha kumutambula kaambo talumuboni naakumuzhiba. Pele umwe mulimwizhi, kaambo ulapona amwe alimwi ulaakuli muli umwe. ¹⁸ Ume nshimushiyi bulyo ukoya bamushaala; Ume ndakazhoka kwenu. ¹⁹ Ubobo kwakaindi bulyo kashoonto alo luundu talukamboni linji, pele umwe mulakambona. Kaambo Ume ndapona, amwe mulakapona. ²⁰ Kubuzuba bobo mulakazhiba kwaamba Ume ndili mwa Taata, alimwi kaambo muli mwangu, alimwi kaambo Ume ndili mwenu. ²¹ Wezo woonse uukwete malailile angu u kwaabamba inguwe wezo nguunfwini, alimwi wezo unfwini ulakafwunwa kwa Taata, amana Ume ndakamufwuna alimwi Ume ndakalitondezha kwakwe." ²² Judasi (uutali Sikaliyoti) wakaamba kwa Jeso ati, "Mwami, kaambooyi nchichili kuti ulakalitondezha bulyo kuli uswe u kutali ku luundu?" ²³ Jeso wakamwiingula waamba kwakwe ati, "Naakuti umwi ulinfwini, ulakalibamba izwi lyangu. Taata ulakamufwuna, amana tulakazhiza kwakwe twamana tulakapanga munzhi aze. ²⁴ Wezo woonse utanfwini tabamba mazwi angu. Izwi lelyo ndimuteelela talihwi kwangu pele lilahwa kwa Taata wezo wakantuma. ²⁵ Ume ndashaamba sheshi shintu nkumubele, lelyo ninchili amwe. ²⁶ Nikuba bobo, Shikumuzumya zumya--Moza Usalala wezo Taata ngwaati akatume mwizhina lyangu--ulakamuyiisha alimwi ulakamuzhibalusha shintu shoonto shesho Ume nshindakamushimwina. ²⁷ Ndamushiila luumuno; Ndamupa luumuno lwangu. Ume nshipi ukoya luundu mbulupa. Mutaleka myonzo yenu kupenga, alimwi mutabi nimutiya. ²⁸ Mwakachiteelela checho Ume nchindakamwaambila ati, 'Ume ndakuhwa kwenu, alimwi Ume ndakazhoka nkumubele.' Kuti nimwaakunfwini ume, nimwaakubotelelwe kaambo ndaya kwa Taata, ukuti Taata mukandosha kubaala Ume. ²⁹ Ubobo Ume ndamushimwina kachitana kuchitika kwaamba ati, chakachitika, mukashome. ³⁰ Ume nshaamba linji shinji shinji kulyuumwe, muleli wa luundu lono ulazhiza. Wiina insana ali ume, ³¹ pele kwaamba ati luundu lukazhibe ati Ume ndimufwini Taata, Ume ndachita ukoya Taata mbwaakandailila. Atuzhimuke twaahwe ano."