¹ Mazuba chisambomwi kalitana kushika ikubi lyakwiitilila, Jeso wakashika ku Betani, koko Lazalasi nkwaakaakubele, wezo Jeso ngwaakabusha kuhwa kubafwu. ² Inzho bakamubambila chakulya koko, Malita nguwakaakusengela, pele Lazalasi nguwakaakuli wababo bakaakulele kufwaafwi kwitebulu u Jeso. ³ Amane Maliya wakabweza kakopo kamafwuta anunka kalonze a kabambwa u musamu utewa ati nadi, wakashoba matende aka Jeso, amana wakakunkumuna matende akwe u masusu akwe. Ing'anda yoonse yakazula bwema bwakununka kwa mafwuta. ⁴ Judasi Sikaliyoti, umwi wa bashichiiya bakwe, wezo walo uti a kamwaabe, wakaamba ati, ⁵ "Kaambooyi aza mafwuta natauzhiwa bulyo myaanda yotatwe yama denali amana nitwapa bapushi?" ⁶ Inzho wakaamba chechi, kakutali kuti kazandisha bapushi pe, pele kaambo kali mutewu. Nguwakaakukwete inkomo ya mali pele keba kuhwa kuli chechi nchakaakubikwa mumo. ⁷ Jeso wakaamba ati, "Amumuleke a bambe checho nchaakwete kubuzuba bwangu bwakuzhikwa. ⁸ Umwe lyoonse bapushi mulaakuli abo. Pele tamukabi ame kwa lyoonse." ⁹ Inzho imbunga inkando yaba Juda yakazhiba kwaamba ati Jeso kaliko koko, bamane bakazhiza, kutali kwa Jeso bulyo, pele kwiza kubona u Lazalasi aze, wezo Jeso ngwaakabusha kuhwa kubafwu. ¹⁰ Bapayizhi bakando bakateelezhanya antoomwi kwaamba bayaye u Lazalasi aze; ¹¹ chakaba bobo u kaambo kakwe banji banji ba Juda bakaya bamane bakashoma mwakwe Jeso. ¹² Mubuzuba bwakachilila ibunga ikando lyakazhiza kwipobwe. Lelyo nibakateelela kwaamba ati Jeso ulezhiza ku Jelusalemu, ¹³ bakabweza mitabi yamalala bamane bakaya kumuchinga u kupozomoka ati,"Hosana! Mulongezhe wezo walo uzhiza mwizhina lya Mwami, mwami waba Izilaili." ¹⁴ Jeso wakayana kana kambongolo amane wakala aali nkako; mbubona mbuchakaakulembelwe, ¹⁵ Utabi nuutiya, u mwana wa Ziyoni; bona, Mwami wako ulazhiza, ulishite a kana kambongolo." ¹⁶ Bashichiiya bakwe bayina nibakashiteelelesha sheshi shintu a kutaanguna; pele lelyo Jeso naakalemekwa, bakashizhibaluka kwaamba ati sheshi shintu shakaakulembelwe shamakani akwe amana shakachitika sheshi shintu kwakwe ¹⁷ Inzho bambunga bakapa bumboni bwakuti bakaakuli abo lelyo naakoompolola Lazalasi kuhwa muchuumbwe amane wakamubusha kuhwa kubafwu. ¹⁸ Inchicho checho chakapa kwaamba ati imbunga baye kuya kumuchinga, kaambo bakateelela kwaamba ati wakachita chechi chitondezho. ¹⁹ Ba Falisi ngoonaawo bakaamba akati kabo beni ubeni ati, "Amulange, kwiina nchimukonzha kuchita chibotu; bona, luundu loonse lwaya nkwaabele." ²⁰ Inzho bamwi ba Giliki kabali a kati kababo bakaakuya kukomba koko kwipobwe. ²¹ Baba bakaya kwa Filipu, walo wakaakuli waku Betesayida mu Galili, bamane bakamubuzha, bakaamba ati, "Mwami, tulazanda kubona Jeso." ²² Filipu wakaya kushimwina Andulu; Andulu wakaya u Filipu, bamane bakamushimwina Jeso. ²³ Jeso wakabayingula waamba ati, "Iwoola lyashika lya Mwanaa Muntu kwaamba alemekwe. ²⁴ Chini, chini, Ume ndaamba kwenu ati, chita kuti inseke ya wiiti yawa anshi yamana yafwa, ilashaala ini iche; pele kuti naayafwa, ilakazhala muchelo munji munji. ²⁵ Wezo woonse u zandisha bumi bwakwe u lakabuluza; pele wezo walo uswile bumi bwakwe mono muluundu ulakabukwata u bumi butamana. ²⁶ Naakuti umwi wansebezela mulimo, wezo naanchilile; amana Ume nkwinkakaba, nkukoko aze musebezhi wangu nkwaati akabe. Naakuti umwi wansebezela, Taata ulamusumpula. ²⁷ Inzho moza wangu wakapenga amana nchiiyi checho nchinkaamba? 'Taata, fwutula kuhwa kwiwoola leli'? Pele nkukako nkukaambo Ume nkundakazhila kwiwoola leli. ²⁸ Taata, lemeka inzhina lyako." Amane kwakazhiza izwi kuhwa kwizeulu lyaamba ati, "Ume ndalilemeka amana Ume ndalilemeka alimwi." ²⁹ Inzho imbunga yezho yakaakuzhimine yakaliteelela bamane bakaamba ati ninhula yalila. Bamwi bakaamba ati, "Angelo waamba kwakwe." ³⁰ Jeso wakayingula wakaamba ati, "Leli izwi liina kuzhila ume, pele ndilyenu. ³¹ Saa koku nkubetekwa kwa muluundu: Saa inzho muleli wamono muluundu ulakasowelwa ansengwe. ³² Awo Ume ndakabwezwa kuhwa ano anshi, Ume ndakabweza boonse kwangu." ³³ Wakaamba chechi kuti kulibonye kwaamba ati lufwu luli buti lolo ndwaakakafwa. ³⁴ Imbunga yakamwiingula ati, "Uswe twakateelela mumulawo kwaamba ati Kilisito ulakakalilila limwi. No ulaamba buti ati, 'Mwanaa Muntu ulyeelele kusumpulwa'? Nguni Mwanaa Muntu?" ³⁵ Amane Jeso wakaamba kwabo ati, "Mumuni ulaakuchili amwe kwakaiindi bulyo kashoonto. A mweende lelyo nimuchikwete mumuni, kwaamba ati mushinze utakabi nuumubaala. Wezo woonse uyenda mumushinze takwizhi koko nkwaaya. ³⁶ Nimuchikwete mumuni, amushome mumuni kwaamba ati mube bana bamumuni." Jeso naakamana kwaamba sheshi shintu amane wakakuhwa wazuba kuhwa nkubabele. ³⁷ Nikuba kuti Jeso wakachita shitondezho shinji shinji ambele lyabo, pele bayina nibakashoma mwakwe. ³⁸ Kwaamba ati izwi lyaka Iyizaya mushinshimi lizuzukizhiwe, momo mwaakaamba ati: "Mwami, nguni washoma mulumbe wesu, alimwi nkwani itashi lya Mwami nkulyazubululwa?" ³⁹ Kaambo kachechi bayina nibakashoma, u kuti Iyizaya aze kachaambile, ⁴⁰ "Wakaboofwaazha menso abo, amana wakazumya myonzo yabo, u bobo nibaakubona u menso abo u kuteelelesha u myonzo yabo, u kuchinduluka, amana Ume indabaponya." ⁴¹ Iyizaya wakaamba shintu sheshi kaambo wakabona bulemu bwaka Jeso amane wakaamba akwe. ⁴² Pele nikuba bobo, baleli banji banji bakashoma mwa Jeso; pele kaambo kaba Falisi, bayina kulyaambilila kwaamba batatandwa kuhwa mu sinagogi. ⁴³ Bakafwuna bulemu bobo buhwa ku bantu kabaazha bulemu bobo buhwa kwa Leza. ⁴⁴ Jeso wakapozomokesha amane wakaamba ati, "Wezo woonse u shoma mwangu, tashomi bulyo mwangu pele umwa wezo wakantuma, ⁴⁵ amana u wezo wabona ume wabona u wezo wakantuma ⁴⁶ Ume ndakazhiza u koya mumuni muluundu, kwaamba ati woonse wezo washoma mwangu atabi naashaala mumushinze. ⁴⁷ Naaakuti umwi waateelela mazwi angu amana taabamba, Ume nshimubeteki; kaambo Ume ndiina kwiza kubeteka luundu, pele kwiza kufwutula luundu. ⁴⁸ Wezo u kaka ume alimwi u wezo u tatambuli mazwi angu, ulikwete wezo walo u beteka. Izwi Ume lelyo ndindakaamba lilakamubeteka kubuzuba bwamamanino. ⁴⁹ Kaambo Ume nchintaamba lwangu ndimwini, pele ngu Taata wezo ume wakantuma, wezo wakapa insana shesho shakwaamba alimwi u chakwaamba. ⁵⁰ Ume ndizhi ati insana shakwe nsha bumi butamana, u bobo nchichecho nching'amba---mbubona Taata mbwaamba kwangu, mbubona Ame mbwing'amba."