Chaandano 11
1
Inzho umwi mulombwana waakutewa ati Lazalasi wakaakuli mulwazhi. Kali waku Betani, munzhi waba Maliya u munina Malita.
2
Kali Maliya wezo wakananika Mwami mafwuta a Mili amane wakamukunkumuna u masusu akwe, walo uli munina Lazalasi wakaakuli mulwazhi.
3
Baba babunina bamane bakamutumina Jeso, bakaamba ati, "Mwami, bona, wezo uwe nguufwini mulwazhi."
4
Awo Jeso naakateelela, wakaamba ati, "Bobu bulwazhi tabuli bwa lufwu, pele mbwaabulemu bwaka Leza kwaamba ati Mwanaa Muntu kwaamba alemekwe kwiita muli nchicho."
5
Inzho Jeso kamufwini Malita alimwi u munina alimwi u Lazalasi.
6
Awo naakateelela kwaamba ati Lazalasi mulwazhi, Jeso wakakala alimwi mazuba obile kubusena nkwaakaakubele.
7
Awo kumane chechi, wakaamba ku bashichiiya bakwe ati, "Katuya ku Judeya alimwi."
8
Bashichiiya bakaamba kwakwe ati, "Labi, uninzho bolya ba Juda balasoleka kukuyasa mabwe, amana ulazanda kubweela alimwi kolya?"
9
Jeso wakayingula ati, "Inta kuli mawoola aali ikumi u wobile a mumuni mubuzuba? Naakuti muntu uleenda muunza lubala, takonzha kulifwumpula, kaambo ulabona kwiita mu mumuni wamono muluundu.
10
Nikuba bobo, naakuti uleenda mashiku, u lalifwumpula kaambo mumuni tooli muli nguwe."
11
Wakaamba shintu sheshi, amane kwiite sheshi shintu, wakaamba kwabo ati, "Mweenzhinokwesu Lazalasi woona ulilele, pele Ume ndayako kwaamba ati ambweni ndaya mubushe kuhwa mutulo."
12
Bamane bashichiiya bakwe bakaamba kwakwe ati, "Mwami, naakuti ulilele bulyo uloona, ulabuka kabotu."
13
Awo kaamba shalufwu lwakwe, pele balo kabatelaika ati ulaamba shakoona kupumuna.
14
Amane Jeso wakaamba kwabo wabazubulwila ati, "Lazalasi wafwa.
15
Inzho Ume ndabotelwa, kaambo kenu, kwaamba Ume nchinteko kutewa umwe mushome. Atuye kwakwe."
16
Tomasi walo wakaakutewa ati Didimusi, wakaamba ku bashichiiya beenzhiina ati, "Atuye aswe kwaamba tukafwe u Jeso."
17
Awo Jeso naakashika, wakayana kuti Lazalasi kakwete kale mazuba one muchuumbwe.
18
Inzho Betani kali afwaafwi u Jelusalemu, mushinzo koolampa bulyo bamaile botatwe.
19
Ba Juda banji banji bakashika kuli ba Malita u Maliya, kwaamba babaumbulizhe u kaambo ka musanzhinokwabo.
20
Awo Malita, lelyo naakateelela ati Jeso uleza, wakaya kumuchinga, pele Maliya wakaakushite mukati mung'anda.
21
Amane Malita wakaamba kwa Jeso ati, "Mwami, kuti niwakaakuliko kono, mukwesu naatakafwa.
22
Uninzho bolya, Ume ndizhi kwaamba ati kufwumbwa checho nchuukakumbila kuhwa kwa Leza, ulakupa."
23
Jeso wakaamba kwakwe ati, "Musazhinoko ulabuka alimwi."
24
Malita wakaamba kwakwe ati, "Ume ndizhi ati ulakabuka alimwi kububuke bwa bafwu mubuzuba bwamamanino."
25
Jeso wakaamba kwakwe ati, "Ume ndime bubuke bwa bafwu alimwi u bumi; wezo woonse ushoma mwangu, nikuba kuti wafwa, ulakapona;
26
alimwi kufwumbwa wezo upona u kushoma mwangu wiina naati a kafwe. Saa ulachishoma chechi?"
27
Wakaamba kwakwe ati, "Ee ye, Mwami, Ume ndashoma kwaamba ati ndiwe Kilisito, mwanakwe Leza, walo u kakazhiza muluundu."
28
Awo naakaamba bobo, wakaya koompolola musazhiina Maliya kumabali. Wakaamba ati, "Mwiiyi nkwaali kono amana u lakwita."
29
Awo naakateelela chechi, wakazhimuka chakufwambaana amane wakaya kwakwe.
30
Inzho Jeso katana kushika kale mu munzhi pele kachili koko Malita nkwaakamuswaanganyinya .
31
Inzho awo ba Juda, babo bakaakuli aze mung'anda babo bakaakumooshosha, nibakabona ati Maliya wazhimuka chakubindaana kuya ansengwe, bakamuchilila, bakatelaika ati ulazanda kuya kuchuumbwe kuya kulila.
32
Awo Maliya naakashika kubusena koko nkwaakakubele amane kumubona Jeso, wakawila kumatende akwe amane wakaamba kwakwe ati, "Mwami, kuti niwakaakuliko, mukwesu naatakafwa."
33
Awo Jeso naakamubona ati ulalila, alimwi uba Juda babo bakazhiza aze balalila abo, wakausa chini chini mu moza wakwe alimwi wakapenga;
34
wakaamba ati, "Anu mwakamooneka kwi?" bakaamba ati, "Mwami, kweza u bone."
35
Jeso wakalila.
36
Bamane ba Juda bakaamba ati, "Amubone mbwaakumufwini Lazalasi!"
37
Pele bamwi babo bakaamba ati, "Saa ingwe wezu muntu, wakayula menso a mulombwana moofwu, alimwi wachita wezu muntu kutafwa?"
38
Awo Jeso alimwi, kausile mukati kakwe, wakaya kuchuumbwe. Inzho kachili mulupako lwebwe, amana ibwe kalishinkilwe aali nchicho.
39
Jeso wakaamba ati, "Amulikushe ibwe.' Malita, munina Lazalasi, wezo wakaakufwile, wakaamba kwa Jeso ati, "Mwami, kwacheno chiindi mubili wabola kale, kaambo ufwile kale kwa mazuba one."
40
Jeso wakaamba kwakwe ati, "Saa ndiina indakaamba kwenu ati, naakuti kuti mwashoma, mulakabona bulemu bwaka Leza?"
41
Bamane bakalikusha ibwe. Jeso wakalyaalala amane wakaamba ati, "Taata, Ume ndakulumba kaambo wampupulala.
42
Ume ndizhi kwaamba lyoonse ati ulampupulala, pele nkaambo kaba mbunga babo banzhingulukile nchichecho nchindaambila bobo, kwaamba ati ambweni balashoma ati ndiwe wakantuma."
43
Awo naakamana kwaamba bobo, wakapozomoka izwi ikando, "Lazalasi, hwa mo!"
44
Wezu muntu mufwu wakahwa; matende akwe u matashi kaazambaililwe u masani, alimwi u bushu bwakwe kabuzambaililwe chisani. Jeso wakaamba ati, "Amumwaangulule mwamana mumuleke aye."
45
Kumane ba Juda banji banji babo bakazhiza kwa Maliya nibakabona checho Jeso nchaakachita, bakashoma mwakwe.
46
Pele bamwi babo bakaya kuba Falisi bamane babashimwina shintu shesho Jeso nshaakachita.
47
Bamane bapayizhi bakando alimwi uba Falisi bakabunganya inkuta antoomwi bamane bakaamba ati, "No inzho tulachita buti? Wezu muntu ulachita shitondezho shinji shinji.
48
Naakuti twamuleka bolya mbubona mwini, boonse balaba nibashoma mwakwe; ba Loma balakazhiza kwamana balakabweza busena bwesu alimwi u chishi."
49
Nikuba bobo, umwi mulombwana akati kabo, Kefasi, wezo wakaakuli mupayizhi mukando mwaka wezo, wakaamba kwabo ati, "Kwiina nchimwizhi.
50
Saa umwe tamwizhi kwaamba ati nchibotu kwaamba muntu womwi afwile bantu kubaala choonse chishi kuzonauka."
51
Inzho chechi nchaakaamba chiina kuhwa kwakwe mwini. Pele, kaambo kakuba mupayizhi mukando mwaka wezo, wakashinshima kuti Jeso ulyeelele kufwila chishi;
52
alimwi kutali bulyo chishi, pele kwaamba ati bana ba Leza babo bakaakumweele ati babungikwe antoomwi kuba omwi.
53
Inzho kuhwa kubuzuba bobo kuya kumbele bakalanga langa inzhila mbubaakukonzha kumuyayila Jeso.
54
Wiina linji Jeso naakaakweenda antangalala akati kaba Juda, amane wakakuhwa koko wakaya kuchishi chili kufwaafwi u lukula kuya mumunzhi mukando wa Efulemu. Koko wakakala u bashichiiya.
55
Inzho ikubi lyakwiitilila lyaba Juda kalili afwaafwi, amana banji banji bakaya ku Jelusalemu kuhwa muchishi kalitana kuba ikubi lyakwiitilila kwaamba ati balisalazhe lwabo beni.
56
Kabaya bukapula Jeso, kabaamba umwi u mweenzhiina awo nibakaakushite muchikombelo, "Mulatelaika buti? Saa takazhiza kwikubi?"
57
Inzho bapayizhi bakando alimwi uba Falisi bakapa malailile kwaamba ati naakuti umwi ulizhi koko Jeso nkwaabele, ulyeelele kuleta mulumbe kwaamba tulozhe kumukwata.