¹ "Chini, chini, Ume ndaamba kwenu ati, wezo woonse utanjilila kumanjililo momo mukala imbelele, pele waliza wasebezha manjililo amwi, wezo muntu ati mutewu alimwi muyazhi. ² Wezo walo unjilila kwiita kumanjililo wezo ati ngu mweembezhi wa mbelele. ³ Babo babamba manjililo balamuyalulila. Imbelele shilaliteelela izwi lyakwe, amana uloompolola imbelele shakwe kumazhina anshisho shamana ulashisololela. ⁴ Amana kushikusha shoonse shesho shakwe, ulashisololela, shamana imbelele shilamuchilila, kaambo shililinzhi izwi lyakwe. ⁵ Tashikonzha kumuchilila mweenzu pele shilamukakila, kaambo tashilizhi izwi lya mweenzu." ⁶ Jeso wakaamba kaka kaambyo kwabo, pele bayina nibakateelelesha sheshi shintu mbushaakubele shesho nshakaakwaamba kwabo. ⁷ Amane Jeso wakaamba kwabo alimwi ati, "Chini, chini, Ume ndaamba kwenu ati, Ume ndime manjililo a mbelele. ⁸ Uli woonse wezo wakazhiza nchitana kuzhiza wezo mutewu amana muyazhi, pele imbelele shiina nishakamuteelela. ⁹ Ume ndime manjililo. Naakuti umwi wanjila kwiitila mwangu, wezo ulakafwutulwa; ulakanjila amana u kuhwa alimwi u kuyana machelelo. ¹⁰ Mutewu tazhiza bulyo chita kwiza kwiba u kuyaya alimwi u kuwononga. Ume ndakazhiza kwaamba ati bayane bumi alimwi u kubuyanina limwi. ¹¹ Ume ndime mweembezhi mubotu. Mweembezhi mubotu ulapa bumi bwakwe ku mbelele. ¹² Musebezhi u pewa mali tali mweembezhi alimwi imbelele tashili shakwe pe. A bona muyama washika ulashishiya imbelele amana walukanka, amana munyama u lashilya shamana shilamwaala. ¹³ U lalukanka kaambo musebezhi muule bulyo amana tashibikili u maanu imbelele. ¹⁴ Ume ndime mweembezhi mubotu, amana bangu Ume ndibezhi, alimwi bangu balinzhi. ¹⁵ Taata ulinzhi, alimwi Ame ndimwinzhi Taata, amana ndakapa bumi bwangu ku mbelele. ¹⁶ Ume ndikwete imbelele shimwi shalo shitali shamuchiba chechi. kulazandika kushileta asho, shamana shilakaliteelela izwi lyangu kwaamba ati kukabe butanga bomwi alimwi u mweembezhi womwi. ¹⁷ Nchichecho Taata chaafwini: Ume ndakapa bumi bwangu kwaamba ati nkabubweze alimwi. ¹⁸ Kwiina naaba womwi u bukusha kwangu, pele Ume ndakabupa ndimwini. Ndikwete insana shakubupa bumi, amana ndikwete insana shakububweza alimwi. Ume ndakapewa kuchita bolya kuhwa kwa Taata." ¹⁹ Kwaandaana alimwi kwakaba akati kaba Juda kaambo kamazwi azo. ²⁰ Banji banji bakaamba ati, "Ulikwete musangushi amana ulalibonya kuzanda kusondoka. Kaambooyi mulamupupulala?" ²¹ Bamwi bakaamba ati,"Aza taali mazwi a muntu unjililwe musangushi pe. Saa musangushi ulakonzha kuyula menso a moofwu?" ²² Kumane kachili chiindi chepobwe lya kusalazha mu Jelusalemu. Kooli mweto, ²³ amane Jeso kaya bweendeenda muchikombelo mumaluze aka Solomoni. ²⁴ Bamane ba Juda bakamuzhinguluka bakaamba kwakwe ati, "Ndililiye nuuya kulizubulula kwaamba tuleke kushinshanya? Naakuti ndiwe Kilisito, tushimwine antangalala." ²⁵ Jeso wakabayingula ati, "Ume ndakamushimwina, pele umwe mwiina kushoma. Milimo yezho Ume njichita mwizhina lyaka Taata, chechi chilapa bumboni bwangu. ²⁶ Amana tamushomi kaambo tamuli imbelele shangu. ²⁷ Imbelele shangu shilaliteelela izwi lyangu; Ume ndishinzhi, amana shilanchilila. ²⁸ Ume ndakabapa bumi butamana; bayina nibati bakafwe, amana kwiina uti a kabakushe mwitashi lyangu. ²⁹ Taata, walo wakampa mbabo, mukandosha kubaala bamwi, amana kwiina naaba womwi u konzha kubakusha mwitashi lyaka Taata. ³⁰ Ume u Taata tuli womwi." ³¹ Bamane ba Juda bakabweza mabwe alimwi kwaamba bamuyase. ³² Jeso wakabayingula ati, "Ume ndakamutondezha milimo minji minji kuhwa kwa Taata. Inzho njiiliye milimo yezho njimuzanda kunjasila mabwe?" ³³ Ba Juda bakamwiingula ati, "Tatukuyasili mabwe kufwumbwa mulimo mubotu pe, pele kutalemeka, kaambo uwe, u muntu, ulalibika lwako u mwini kuba Leza." ³⁴ Jeso wabayingula ati, "Saa tachilembelwe mumulawo wenu, 'Ume ndaamba ati, "Muli ba leza'''? ³⁵ Naakuti walo ulabeta ati tu leza, u mwakwe izwi lya Leza mulyakazhila (amana bulembe tabukonzha kuchincha), ³⁶ Saa mulaamba kwa wezo walo Ushi ngwaakabika ambali amane wamutuma mu luundu, 'Tamumulemeka,' kaambo Ume ndakaamba ati, 'Ume ndimwanakwe Leza'? ³⁷ Naakuti Ume nshichiti milimo yaka Taata, mutabi nimunshoma. ³⁸ Pele naakuti Ume ndeechita, nikuba kuti umwe tamunshomi, amushome mumilimo kwaamba ati ambweni mulazhiba alimwi u kuteelelesha ati Taata uli muli ume ame mwa Taata." ³⁹ Bakasoleka kumukwata alimwi, pele wakamuhwa mumatashi abo. ⁴⁰ Wakaya alimwi kwiitilila ku Jodani kubusena koko nkwaakatalikila Johani kupapatiza, amane wakakala koko. ⁴¹ Bantu banji banji bakaya kwakwe bamane bakaamba ati, "Johani chini chini wiina naakachita shitondenzho, pele shoonse shintu shesho Johani nshaakaamba shamu muntu wezu nsha meni meni." ⁴² Bantu banji banji kolya bakashoma mwakwe.