¹ Kumatalikilo kalili izwi, alimwi izwi kali u Leza, alimwi izwi kali Leza. ² Wezu nguwena kali kumatalikilo u Leza. ³ Shoonse shintu shakapangwa kwiitila mwakwe, kuti nikwakaakwiina nguwe kwiina chintu nichiba chomwi checho chakapangwa ⁴ U mwakwe kamuli bumi, alimwi bumi kooli mumuni wa bantu. ⁵ Mumuni ulamunika u mushinze, amana mushinze toolonzha kuubaala mumuni. ⁶ Kakuli mulombwana wezo wakatumwa kuhwa kwa Leza, walo wakaakukwete inzhina lya Johani. ⁷ Wakazhiza u koya kamboni kwiza kupa bumboni bwa mumuni, kwaamba boonse balozhe kumushoma kwiita mwakwe. ⁸ Johani katali nguwe mumuni, pele wakazhiza kwaamba ape bumbni kutwaambo twa mumuni. ⁹ Mumuni wabwini, wezo upa mumuni ku bantu boonse, wakazhiza muluundu. ¹⁰ Kali muluundu, alimwi luundu lwakapangwa kwiita mwakwe, pele luundu lwiina nilwakamuzhiba. ¹¹ Wakazhiza ku bantu bakwe mwini, amana bantu bakwe bayina nibakamutambula. ¹² Pele ku banji banji bakamutambula, babo bakashoma mwizhina lyakwe, wakabapa chaabilo chakuba banakwe Leza. ¹³ Baba bayina nibakazhalwa kubulowa, nikuba kukuzanda kwa mubili, nikuba kuzanda kwa muntu, pele nkuzanda kwa Leza. ¹⁴ Izwi lyakaba mubili amana lyakapona a kati kesu. Twakabubona bulemu bwakwe, bulemu bwakaakuli bwa wezo bulyo walo wakahwa kwa ushi, uzwile luse alimwi u bwini. ¹⁵ Johani wakamupela bumboni wakapozomoka kulila, waamba ati, "Wezu inguwe ngundakaakwaamba ati, 'Wezo uzhiza munshi lyangu mukandosha kubaala ume, kaambo kaliko nchitana kuba ko."' ¹⁶ Kaambo kuhwa kukuzulila kwakwe toonse twakatambula luse kuhwa ku luse. ¹⁷ Milawo yakapewa kwiita mwa Mozesi. Luse aliwmi u bwini bwakazhiza kwiita mwa Jeso Kilisito. ¹⁸ Kwiina naaba womwi wakamubona Leza; bulyo Leza, walo uuli kufwaafwi uushi, wakachita kuti Leza azhibwe. ¹⁹ Bobu mbubumboni bwaka Johani lelyo ba Juda nibakatuma bapayizhi alimwi uba Levi kwakwe kuhwa ku Jelusalemu kwaamba bamubuzhe, "Ndiweni uwe?" ²⁰ Wakachibika atuba--- wiina naakaka pe, pele wakachibika atuba--"indime Kilisito." ²¹ Bamane bakamubuzha ati, "No nkukuti ndiweni? Saa ndiwe Elija?" Wakaamba ati, Indime." Bakaamba ati, "Saa uli mushinshimi?" Wakayingula ati, "pe pe." ²² Bamane bakaamba kwakwe ati, "Ndiwe ni, kwaamba tukayingule kuli babo batutuma? No uwe laamba buti lwako umwini?" ²³ Wakaamba ati, "Ume ndi izwi, lyoopolola mulukula; 'Bamba inzhila ya Mwami isuumane,' ²⁴ Inzho u bamwi kuhwa kuba Falisi bakatumwa, ²⁵ bamane bakamubuzha baamba kwakwe ati, "Kaambooyi ulapapatiza wataakuli Kilisito naaba Elija nikuba mushinshimi?" ²⁶ Johani wakabayingula , waamba ati, "Ume ndapapatiza u meenzhi. Pele akati kenu alizhimine wezo walo umwe ngumutezhi. ²⁷ Inguwe wezo uzhiza munshi lyangu, nikuba tutambo twamakatulo akwe shilozha kutwaangulula." ²⁸ Sheshi shintu shakachitikila mu Betani mumutala wa Jodani, koko Johani nkwaaka kupapatiza. ²⁹ Buzuba bwakachilila Johani wakabona Jeso uleza kwakwe amane wakaamba ati, "Amubone, nguwelya Mwanaa mbelele waka Leza walo u kusha shibi kuhwa muluundu! ³⁰ Wezu inguwe walo ume ngundaakwaamba ati, 'Wezo walo u kakazhiza munshi lyangu mukandosha kubaala ume, kaambo kaliko ume nchintana kubako.' ³¹ Ume nchintamwizhi, pele chakaba bobo kwaamba walo azubululwe ku Izilaili kwaamba ume ndakazhiza kupapatiza u meenzhi." ³² Johani wakapa bumboni, wakaamba ati, "Ume ndakabona moza ulazhiza anshi ukoya inzhiba kuhwa kwizeulu, amane yakakala ali nguwe. ³³ Ume ndiina indakamuzhiba, pele wezo wakantuma kwiza kupapatiza mu meenzhi wakaamba kwangu ati, 'Wezo walo nguukakabona moza wazhiza anshi u kukala, inguwe wezo u kakapapatiza u moza usalala.' ³⁴ Ume ndakabona alimwi u kupa bumboni kwaamba ati wezu Mwanakwe Leza." ³⁵ Alimwi, buzuba bwakachilila, awo Johani naakakuzhimine u bashichiiya bakwe bobile, ³⁶ bakamubona Jeso uleza bweenda, amane Johani wakaamba ati, "Amubone, Mwanaa mbelele waka Leza!" ³⁷ Bashichiiya bakwe bobile bakamuteelela kwaamba chechi bamane bakamuchilila Jeso. ³⁸ Amane Jeso wakachinduluka wabona balamuchilila waamba kwabo ati, "Nchiiyi nchimukapula?" Bakayingula ati,"Labi" (checho chipandulula ati "Mwiiyi"), "Ulakala kwi?" ³⁹ Wakaamba kwabo ati, "kamwiza mubone." Bamane bakaya kukubona nkwaakaakakula; bakakala aze buzuba bobo, kaambo kachili ukoya kwiwoola lye kumi. ⁴⁰ Umwi wababo bobile wakateelela Johani kaamba amane wamuchilila Jeso kali Andulu, munina Simoni Pita. ⁴¹ Wakataanguna kumuyana munina wakwe mwini wakaamba kwakwe ati, "Twamuyana Mesaya" (chipandulula ati "Kilisito"). ⁴² Wakamuleta kwa Jeso, amane Jeso wakamulanga amane wakaamba ati, "Ndiwe Simoni mwanakwe Johani. Uwe ulaakutewa ati Kefasi" (checho chipandulula ati "Pita"). ⁴³ Buzuba bwakachilila, awo Jeso naakazanda kuya ku Galili, Wakayana Filipu wakaamba kwakwe ati, "Nchilila." ⁴⁴ Inzho Filipu kahwa ku Betesayida, munzhi mukando waba Andulu u Pita. ⁴⁵ Filipu wakayana Natanewo wakaamba kwakwe ati,"Wezo walo Mozesi ngwaakalemba mumulawo, alimwi u bashinshimi, uswe twamuyana: Jeso mwanakwe Jozefu, waku Nazaleta." ⁴⁶ Natanewo wakaamba kwakwe ati, "Saa mulakonzha kuhwa chintu chibotu mu Nazaleta?" Filipu wakaamba kwakwe ati, "Kweza u bone." ⁴⁷ Jeso wakamubona Natanewo uleza kwakwe amane wakaamba shikuma kwakwe ati, "Bona, mwi Izilaili mwini mwini, u mwakwe mwiina kampenda!" ⁴⁸ Natanewo wakaamba kwakwe ati, "No wezhiba buti ume?" Jeso wakamwiingula amane wakaamba kwakwe ati, "Katana Filipu kukwita, lelyo nuwaakuzhimine munshi muchisamu chamukuzu, Ume ndakubona." ⁴⁹ Natanewo wakayingula ati, "Labi, uli Mwanakwe Leza! Uli Mwami wa Izilaili!" ⁵⁰ Jeso wakamwiingula amane wakaamba kwakwe ati, "Kaambo ndaamba kwako ati, 'Ume ndakubona munshi muchisamu chamukuzu,' saa washoma? Ulakabona shintu shikando shibaala sheshi." ⁵¹ Amane wakaamba ati, "Chini, chini, ndaamba kwako ati, ulakabona izeulu liliyalukile, amana baangelo baka Leza balaliza u kuseluka aali Mwanaa Muntu."