¹ Paulu, mwa apositolo waka Kilisito Jeso kwiita mu luzando lwaka Leza, ku bantu basalala baka Leza mu Efeso, babo bashomeshi mwakwe Kilisito Jeso. ² Luse kuli umwe alimwi u luumuno kuhwa kwa Leza Tatesu alimwi u Mwami wesu Jeso Kilisito. ³ Atembaulwe Leza Ushi Mwami wesu Jeso Kilisito, wezo wakatulongezha u shilongezho shoonse sha moza shamazeulu mwa Kilisito. ⁴ Leza wakatusala mwakwe kuhwa ku matalikilo a luundu, kwaamba uswe tusalale alimwi u kubula kampenda ku bushu bwakwe mulufwuno. ⁵ Leza kachibambile kale kuli uswe kutambulwa ukoya banakwe kwiita mwa Jeso Kilisito, kwiingayina mbubona buli luzando lwakwe. ⁶ Kutambulwa kwesu kulaleta kutembaula kwa bulemu u luse lwakwe lolo ndwaakatupa lwa bulyo muli wezo ngwaafwini. ⁷ U mwakwe Jeso Kilisito wakatunununa kwiita mu bulowa bwakwe alimwi u lulekelelo lwa shibi shesu, kwiingayina u luse lwakwe lunji lunji. ⁸ Wakaluhwuzha luse kuli uswe u busongo alimwi u kuteelelesha. ⁹ Leza wakatuzubululila maseseke a luzando lwakwe, kwiingayina u checho chakamubotela, alimwi u checho nchaakachita mwa Kilisito, ¹⁰ u checho nchaakaakukanza kukuzulila kwa chiindi, kwaamba ashilete shintu shoonse antoomwi, shoonse shintu shili mwizeulu alimwi anshi, ku mutwi womwi, waka Kilisito. ¹¹ U mwa Kilisito twakapewa lukono, lwa bubambe kwiingayina u makanze akwe walo u bamba shintu shoonse kwiingayina u muzeezo wa luzando lwakwe. ¹² Leza wakatusala kuba bashimulya zhina kwaamba ati uswe, tubataanzhi mululangilo mwa Kilisito, lukabe lwakutembaula bulemu bwakwe. ¹³ Umwa Kilisito, amwe, lelyo nimwakateelela mazwi a bwini, mulumbe walufwutuko lwenu, mwakashoma mwakwe alimwi mwakapewa Moza Usalala wakashomezhewa, ¹⁴ walo nchishomezho chalukono lwesu mpaka kunununwa kwa shintu shesu, u kutembaula kwa bulemu bwakwe. ¹⁵ U kaambo kachechi, kuhwa lelyo Ume indakateelela a lushomo lwenu mu Mwami Jeso alimwi u lufwuno lwenu mu bantu basalala baka Leza, ¹⁶ Ume ndiina indakaleka kulumba Leza u kaambo kenu lyoonse Ume ndamubanda mukukomba kwangu. ¹⁷ Ume ndakomba kwa Leza wa Mwami wesu Jeso Kilisito, Ushi wa bulemu, ulakamupa moza wa busongo alimwi u buzubuluzhi mu luzhibo lwakwe. ¹⁸ Ume ndakomba ati menso a myonzo yenu kwaamba ati a munikilwe, kuti muzhibe a lulangilo lolo ndwaakamwitila alimwi u bunji bunji bwa bulemu bwa lukono a kati ka bantu ba Leza basalala. ¹⁹ Mukukomba kwangu Ume ndakumbila kwaamba ati mulyeelele kuzhiba lwaandaano u bukando bwa nsana shakwe kuli uswe nitushoma, kwiingayina u busebeza insana mumasana akwe. ²⁰ Sheshi inshisho nshishona insana shesho nshaakabelesha mwa Kilisito lelyo naakamubusha kuhwa kubafwu amana wakamukalika kwitashi lyakwe lya lulyo kumasena a kumazeulu. ²¹ Wakamukalika Kilisito ezeulu aali shoonse kulela alimwi insana a shintu shilenge shoonse, alimwi kufwumbwa izhina lelyo lyuulikilwe. Kilisito ulakalela, kutali bulyo mu musela wezu pe, pele alimwi u kumusela wezo uzhiza. ²² Leza wakabika shoonse kunshi kumatende aka Kilisito amane wakamupa chikombelo kuba mutwi a shintu shoonse. ²³ Chikombelo mubili wakwe, mukuzulila kwakwe walo ulazulizha mushiyanza shoonse.