¹ Tulizhi kwaamba ati ing'anda yesu ya ano anshi--nditente--kuti chazonaunwa, tulikwete ing'anda kuhwa kwa Leza. Ing'anda yezho yatakazakwa u matashi a bantu, pele yezho ing'anda nja lyoonse, ili kwizeulu. ² Kaambo mwitente leli tulatongela, kulangila kwaamba tusamikwe mibili yesu ya kwizeulu. ³ Tulalangila chechi kaambo twakachisama tatukayanwa kwaamba ati tuli chintanda. ⁴ Chini chini lelyo nituchili mwitente leli, tulatongela, kaambo kakulemenwa. Tatuzanda kwaamba ati tusamununwe. Pele, tulazanda kuti tusamikwe, kwaamba ati checho chaku mubili chikamaninine u kaambo ka bumi. ⁵ Wezo walo wakatubambilila uswe kuchintu chechi nchichona ngu Leza, walo wakatupa Moza kuba chishomezho kuli checho chizhiza. ⁶ Ubobo lyoonse tutafwi bukandu, tuukwizhi ati lelyo nituchili mu mubili , tuli kulaale kuhwa ku Mwami. ⁷ Kaambo tuleenda kwiita mulushomo, kutali u kaambo kakubona. ⁸ Uswe twiina nchitutiya. Alimwi chilabota tukuhwe kuli sha mubili tukakale u Mwami. ⁹ Ubobo tuchibike kuba chikwankwani chesu, nikuba kuti tuli kulaale naaba afwaafwi, tubotezhe Leza. ¹⁰ U kuti toonse tulakabulika kuchuuna chalubeta lwaka Kilisito, kwaamba ati umwi umwi a katambule cheelele kushintu shesho nshaakachita kwiita mu mubili, nikuba ku shibotu naaba shibiyabi. ¹¹ Ubobo, tulizhi nchichaamba kutiya Mwami, kwaamba tukombelezhe bantu bamwi. Bolya mbutubele Leza ulitubwene chakumaninina, amana Ume ndashoma kwaamba ati amwe mulitwizhi chakumaninina mu mizeezo yenu. ¹² Tatulyeensheensha lwesu tubeni alimwi kuli umwe, pele tulazanda kwaamba ati umwe mulisumpule kaambo kesu, kwaamba ati mukwate chakwiingula kuli babo balisumpula mbuli mbuba boneka pele kutali mbubabele mukati ka monzo. ¹³ Naakuti twakalibonya u koya basondokele, twakaakuli bobo u kaambo ka Leza; alimwi naakuti twalibonya kushitikila, tulaba bobo kaambo kenu. ¹⁴ Lufwuno lwaka Kilisito ndulutweendelezha, kaambo twakamaninzha muli chechi: Kwaamba ati muntu womwi wakafwila boonse, alimwi u bobo boonse bakafwa mwaabele. ¹⁵ Wakafwila boonse, kwaamba ati babo boonse bapona tabeelele kuliponena lwabo beni pele mwa wezo wakabafwila alimwi u kubushiwa kuhwa kubafwu. ¹⁶ U kaambo kako, kuhwa ninzho kwiina ngutuzeezela naaba womwi kwiingayina u sha mubili, nikuba kuti limwi twakabeteka Kilisito kwiingayina u sha mubili. Pele ninzho imbo mbutumwizhi munzhila yezho. ¹⁷ U bobo, naakuti umwi waba mwa Kilisito, ati walengwa bupiya. Shintu shakale kale shamana. Bona, shaba shipiya. ¹⁸ Shoonse sheshi shintu shilahwa kwa Leza. Wakatuzhololola uswe kwakwe mwini kwiita mwa Kilisito amana wakatupa mulimo wakuzhololana. ¹⁹ Chechi chilaamba ati, mwa Kilisito Leza wakazhola luundu kwakwe, kutabala linji bubiyabi kwabo. Wakatupa mulumbe wakuzhololana. ²⁰ Uninzho twakabikwa kuba bazhiminizhi baka Kilisito, ubobo Leza ulamukombelezha kwiita mwesu. Twamukumbila, u kaambo kaka Kilisito: "Amuzhokele kwa Leza!" ²¹ Wakamuchita wezo wataakwizhi chibi kuba shichibi kaambo kesu, kwaamba ati uswe tube balulami baka Leza kwiita mwakwe.