¹ Boonse babo bali mwijoko lya buzhike balyeelele bape bulemu bubaala kuba shimatwangaabo. Balyeelele kuchita bobo kwaamba ati inzhina lyaka Leza alimwi injiisho kwaamba ati shitasampaulwa. ² Bazhike babo bakwete bashimatwangaabo bashomi tabeelele kutondezha kubanyasha kaambo baba mbabunina. Mu lushinizho, balyeelele kubasebezela chibaala. Kaambo babo batambula bulumbu mbubabo bafwinwi alimwi u bashomi. Amuyiishe alimwi u kukambauka shintu sheshi. ³ Naakuti umwi ulayiisha injiisho iitali njiyo alimwi teendelana u mazwi a lushinizho a Mwami wesu Jeso Kilisito alimwi injiisho yabuna Leza, ⁴ ngushikalifwune alimwi kwiina nchaateelelesha. Wiina nchaazanda chili kabotu walo ngushimunkazhizha alimwi u kuzwangana shi mazwi a leta munyono, kuzwangana, matushi, u mazeezela bubiyabi, ⁵ alimwi u mazwanga a tamana akati ka bantu babo bashimakulo bayina manjezheezha mabotu. Babula lushinizho alimwi balateelaika kwaamba ati buna Leza niinzhila yakuyanina mo mali manji manji. ⁶ Inzho chilabaala kubota kuba umbuna leza u shesho nshitukwete kale, ⁷ kaambo kwiina nchitwakaletelela mono mu luundu, alimwi kwiina nchitukakakushamo pe. ⁸ Inzho atulamwe kuli nshitukwete shakulya alimwi u shakusama. ⁹ Inzho babo bazandisha kuba bahubi balawila mukooze, kakutepaulwa. Balawila mu bulimbushi bunji bunji alimwi u kuzandisha kuzonauna, alimwi kufwumbwa muli shoonse shilabakwelelezha kuya kuzonauka alimwi u kufwa. ¹⁰ Kaambo kufwuna mali kulatola ku mishobo yoonse ya bubi. Bantu bamwi babo bachizandisha checho bakamuhwa munzhila ya lushomo alimwi bakalibika lwabo beni mu kubiilwa kunji kunji. ¹¹ Pele uwe, u muntu wa Leza, kuhwe ku shintu sheshi. Kapula bululami, buna Leza, lushomo, lufwuno, u kukwatisha, alimwi u bubonhwu monzo. ¹² Lwa inkondo imbotu ya lushomo. Kwatisha ku bumi butamana bobo mbuwaketilwa, alimwi kuli bobo mbuwakalyaaba a bushu bwa bakamboni banji banji. ¹³ Ume ndakupa malailile aza a bushu bwa Leza, wezo upa bumi ku shintu shoonse, alimwi a bushu bwaka Kilisito Jeso, wezo wakapa bumboni a bushu bwaka Pontiyasi Pilato alimwi wakapa twaambo tubotu, ¹⁴ u kwaabamba malailile chakubula kabala nikuba kubishiwa bishiwa kushikila lelyo naati a kabulike Mwami wesu Jeso Kilisito. ¹⁵ Leza ulakamubulisha Kilisito a chiindi chelele---Leza, mulongezhe alimwi ulelekelwe iche, Mwami walo ulela alimwi Mwami mulezhi. ¹⁶ Walo bulyo nguutafwi alimwi ulakala mu mumuni koko kutashikwa. Kwiina u mubona nikuba ulozha ku mubona. U kwakwe a kube bulemu alimwi a kube insana lyoonse u lyoonse. Ameni. ¹⁷ Balailile bahubi mu luundu batalisumpula alimwi batasukamini mu buhubi, bobo bumana. balyeelele kusukamina mwa Leza. Ulatupa buhubi bwini bwini kwaamba tubotelwe. ¹⁸ Bashimwine kwaamba bachite kabotu, kutewa bahube milimo mibotu, babe baabi balozha kwabaana u bamwi. ¹⁹ Munzhila yezho iili bobo balalizobolela lwabo beni intalisho inzumu yezho izhiza, kwaamba ati bakayane bumi bwini bwini. ²⁰ Timoti, chibambilile checho nchiwakapewa. Chileke kwaamba twaambo tutali twabuna Leza alimwi u twaambo twa bulyo alimwi u mizeezo yakukazhanya kuli checho chitewo chitewa ati luzhibo. ²¹ Bamwi bantu balashaamba shintu sheshi bamana bakamuhwa munzhila ya lushomo. Luse alube amwe.