Salam Lawan Filemon ¹ Salam mulai Paulus, saurang nang dipanjara lantaran Yesus Kristus, lawan Timotius dansanak saiman kita gasan Filemon, kawan sapelayanan nang kami sayangi, ² wan gasan Apfia, dansanak kita jua gsan Arkhipus, kawan saparjuangan kita, wan gasan jemaat nang bakumpul di tilung kawu. ³ Anugerah wan damai sejahtera gasan gasan kawu dari Allah Bapa kita, lawan dari Tuhan Yesus Kristus. Ucapan Syukur atas Iman wan Kasih Filemon ⁴ Aku tarus basyukur gasan Allahku amun maingat kawu dalam doa-doaku, ⁵ Sabab aku mandangar iman wan kasih nang kawu baisi dalam Tuhan Yesus wan gasan sagalaan urang Kudus. ⁶ Aku badoa supaya bagabungan iman kawu jadi epiktif gasan pangatahuan nang hibak gasan satiap hal nang maih nang ada intang kita demi Kristus. ⁷ Aku baungahan banar wan tahibur ulih sayang kawu karana malibasi kawu, Dansanak, hati urang-urang kudus diwagasakan baulik. Pamintaan Paulus manganai Onesimus ⁸ Karena itu , biar aku baisi kayakinan ganal dalam Kristus wan kawa manyuruh kawu maulah apa nang manjadi kawajiban kawu, ⁹ tatapi karana kasih sayang, labih maih amun aku mamintanya lawan kawu. Aklu, Paulus--nang sudah tuha, wan wayahini manjadi urang nang dipanjara karana Kristus Yesus-- ¹⁰ maminta lawan kawu gasan anakku, Onesimus, nang aku ulehi salawas aku ada dipanjara, ¹¹ nang dahulu kada tapakai wan kawu, tatapi wayahini liwar baguna, maih gasan kawu atawa gasan aku. ¹² Aku manyuruh inya, buah hatiku, babulik lawan kawu, ¹³ nang sabujurnya handak aku sangga gasan badiam lawan aku supaya inya kawa manggantiakan kawu manggaduhi aku salawas aku dipanjara lantaran Injil.* ¹⁴ Pabila, kadak ada parsatujuan kawu, aku kada hakun mamaksa supaya kamaihan nyitu kawu gawiakan lantaran kaharusan, malainakan lantaran kahimungan. ¹⁵ Angguhanku alasan Onesimus dilainakan dari kawu satumat supaya kawu kawa manarima inya baulik gasan salawasannya, ¹⁶ tatapi kada lagi sabagai hulun, malainakan labih pada nyitu, tatapi sabagai dansanak nang tasayang, kada khusus haganku, tabantak lagi gasan kawu, maih dalam lunak atawa dalam Tuhan. ¹⁷ Jadi, amun kawu maanngap aku sabagai kawan sagawian kawu, alaplah Onesimus nangkaya kawu manarima aku. ¹⁸ Amun inya udah basalah lawan kawu atawa mainjam nyapa pung wan kawu, sandangakan itu gasanku. ¹⁹ Aku, Paulus, manulis ini lawan tanganku saurang haja; Aku akan mambayarinya--kada manyambat apa haja masalah hutang kawu wan aku, yaitu hidup kawu saurang. ²⁰ Ya, dansanakku, biarha didalam Tuhan aku baulah kamaihan dari kawu. Wigasakanlah hatiku di dalam Kristus. ²¹ Karana yakin sidi aku akan kataatanmkawu, aku manulis surat nyia gasan kawu., Sabab aku kada tahu kawu akan manggawiakan labih pada nang aku mainta. ²² Angkuhan nyitu, tolong ulahakan kamar gasanku karana aku baharap mahayati doa-doa kawu, aku kawa baulik kawadah kawu. Salam Pahabisan ²³ Eprafas, dansanakku sapanjara dalam Yesus Kristus, mangirim salam gasan kawu, ²⁴ nyiatai jua Markus, Aristarkhus, Demas, wan Lukas, kawanan sapalayananku. ²⁵ Anugreah dari Tuhan kita, Yesus Kristus, kiranya mandangani rohkawu.