¹ Ndikwaya ukukomyana muli Kilisitu, ndikwaya chimwi ichakutupepusya nulukundo, ngakuliko chimwi ichawuponga numupasi, ngakuliko chimwi ichakuyisya nu luse, ² alino pangini insansa zyane zizule pakuya pamwi mumelengwi, ukuya nulukundo ululi lumwi, ukuya pamwi mumupasi nukuya nichakulondwa chonga. ³ Mutachita chimwi ukufuma mukuyikunda pamwi ukuyitutumula nkhandi ukuwelenganyizizya ayawuzo ningo ukulusya mwemwe. ⁴ Lekini wensi muli mwemwe atalola sile ukulonda kwakwe weliwe, kweni nupya nukulonda kwayawuze. ⁵ Muye na melengwi ya muli mwemwe mwenga nayano yalinji muli Yesu Kilisitu kwene, ⁶ wino, napanowuli walolechile muchikolanyo chakwe Leza, atachisile ichakuyiyika ngati yakuyana na Leza ngati ichakulemelela kweneko. ⁷ Mumalo mwakwe wayizuzile wenga pakusenda imilolechele ya muwomvi, nupya wapafilwe muchikolanyo chayanthu. ⁸ Wayisizye wenga nukuya umusuwalilwa ukufika pano wafwilile, napamfwa kwene iyapawuchingane! ⁹ Achino Leza nawe wamukwezizye papela. Wamupile izina lino lili papela pi zina lyonsi. ¹⁰ Wachisile chii umwakuti mwi zina lyakwe Yesu ikokola lyonsi lifukame, amakokola yakwe yano yali mwiyulu nayamunsi nayano yalikwisika kwansi. ¹¹ Wachisile chii ukuti ululimi lonsi luzumilizye ukuti Yesu Kilisitu amwene, kuwuchindame wakwe Leza Tata. ¹² Achino nomba, mweyakundwe yane, ngati vino mukawuvwila insita zyonsi, ansukuti pano ndipo patupu kweni nomba umwakonjelezya sana napano nsipo, wombini mwenga pakuyipususya nukutina nukutetema. ¹³ Pakuti a Leza wino ali pakuwomba muli mwemwe mwensi pakuwakomya nukuti muwombe ivizima ivhyakumusechelesya weliwe. ¹⁴ Wombini ivinthu vyonsi ukwawula ukuyilizyanya nanthi ukukanzinkhana ¹⁵ umwakuti mungize muye mweyawula ukulongeka namweyazima, yana yakwe Leza ayawula ukusozya insonyi pakasi payajanja nayachononyi ayankwatwa yii, muno mukawala ngati ulukozyo munsi. ¹⁶ Lemelelini kwizwi ilyawumi umwakuti uwanda wakwe Kilisitu ningize imechele ukuti inthasamalanga apasile nukuwomba apasile. ¹⁷ Kweni napano wuli nayifumya ngati ichakupela ichakuyipa mumilimo iyisuwilo linu, newakukunda nupya nkhusechela namwe mwensi. ¹⁸ Mumichitile iyiliyimwi namwekwe mulingine ukukunda nukusechela nani. ¹⁹ Kweni nkhusuwiula muli mwemwe Ysu pakutuma Timoti kuli mwemwe likwene umwakuti nani kwene inkhome ndnamanya ivinthu ivyakuyana na mwemwe. ²⁰ Pakuti inthaya nanthi wenga muze uwakuyana namwe, wino uwamolimo wino angayipa kuli mwemwe. ²¹ Pakuti wonsi yakulonda ivyakulondwa vyawo, ivinthu vyakwe Yesu Kilisitu pole. ²² Kwene mwamanya uwukankhala wakwe, umulandu ngati umwana na tata wakwe, apano wawombile ponga nani mwizwiu. ²³ Nomba nkhusuwila ukumutuma likwene ndinalola muno ivinthu vimayela nani. ²⁴ Kweni indi nisuwilo muli mwene ukuti nene nenga nimayiza likwene. ²⁵ Kweninkhwelenganya ukuti ichizima ukutuma Epefuloditasi ukuwelela ukwinu. Weni uwunji nupya tukawomba ponga nupya umusilika wunji, nupya inthumi nakawomba wavyakulonda vyane. ²⁶ Pakuti weni walondanga sana, nupya walondanga ukuya namwe mwensi umulandu muvwile ukuti wali umulwale. ²⁷ Pakuti ichendi kwene wali umulwale nukuti wali papipi nukufwa. Kweni Leza wali nuluse pali weliwe, nsukuti pali weliwe wenga pole kweni napali nani kwene, umwakuti inthaya ni chitima pa chitima. ²⁸ Nomba ichakulendeka sana ukuti nkhumutuma weliwe, ukuti ndimwamulola nupya mwemo musechele, nupya ningaya muchitima panono. ²⁹ Ndanji Epafuloditasi muli Mwene ninsansa zyonsi. Chindikini ayanthu ngati uweliwe. ³⁰ Pakuti kwali ukuwomba kwakwe Kilisitu ukuti wizile kupipi nimfwa atasakamile uwumi wakwe pakumbombela nene nukukwalisya vino ngali mutachisile pakuwomba kuli nene.