¹ Teka penatua nuju ma kuan ineh isa tapidi baya kuan anak isa nakaleluku hang wuang kapinuu -- nelang puang ekat aku, walehani pada teka here isa haut kataru kapinuu - ² Daya kapinuu ru haut muneng hangwuang tenga takamnelang ibaya andri takam makalalawahni. ³ Mara anugerah, rahmat, nelang damai sejahtra sagar ibaya andri takam teka Alatalla ammah, hang wuang kapinuu nelang ahilelu. ⁴ Aku tuu-tuu arai hewu andri inun sa haut rengeiku neu meheni teka kuan ianu isa lagi welum hang wuang kapinuu, kewangun takam haut narime parentah teka ammah. ⁵ Itati aku ilaku ma hanyu o ineh, puangkah nyalahni aku haut nulis parintah isa wau, walehanni parentah isa haut natarime kuteka dahulu hie, neu takam haut ipangalelu isa andri sa lainni. ⁶ Nelang, ina ahilelu, neu takam paiyuh ang takia yalah isa naparentah Ni. Ina parentah yeru, kewangun isa narengei naun teka dahulu hie, neu hanyu paiyuh ang takia hang wuang ni. ⁷ Daya rama kuan tukang santawang hulet ma dunia, nelang here puang ngaku neu Yesus Kristus haut hawi yalah murunsia. Ina isa tukang santawang nelang anti Kristus. ⁸ Pansining nu ma diri nu raerai, himpan hanyu puang kawawaian inun sa haut nakara daya takam, kude kabalikanni himpan hanyu narime upa andri penu. ⁹ Hie-hie isa puang taat, nelang puang muneng hang ajaran Kristus, hanye puang uweng Alatalla. Ulun isa muneng hang wuang ajaran Ni, hanye ru ai isa uweng karuehni inun hanye Ammah atawa Anak. ¹⁰ Amun naan erang kaulun hawi ma hanyunelng puang ngenei ajaran yena, ada hanye narime hang lewu nu nelang ada ngami tabe ma hanye. ¹¹ Daya hie isa ngami tabe ma hanye sameh ngalap meheni hang wuang ulahan isa murun. ¹² Magun hene kuan hal isa hamen natulis dayaku ma hanyu, kude aku puang hakun nulis hang karatas makai tintah. kude ahengku mun aku hawi ma unengnu nelang langsung paner, andri kaliru naan arai hewu neu takam andri penu. ¹³ Tabe teka kuan anak pulaknainu isa haut tapidi.