¹ Hangpijumpuhan ni, pulaksanaiku, kami laku nelang nyamara naun hang wuang Tuhan Yesus. Tawuk naun haut kahaba patitah teka kami kewangun naun ta'u malupui lalan isa haut naami isa sasuai andri kabahumen Alatalla. Sabujurni naun haut ngaraja inun sa haut nalaku daya nanun andri kapinu'u. ² Daya naun haut karasa pitataan isa haut natarime kami haut na anyu pada ma kami itetei Tuhan Yesus Kristus : ³ Ina kabahumen Alatalla umak naun, pidudusan nu, himpan hanyu isanawit teka gawian idapa ibela, ⁴ Himpan hanyu ngalap erang kaulun wawei umak jari darangan nu hang wuang pidudusan nelang kahurumaten, ⁵ nelang puang ekat daya aheng hawa nafsu (nyalah kuan bangsa puang ulun Yahudi sa puang kataru Alatalla). ⁶ Himpan hang wuang hal ina puang uweng isa nulah kahalaen nelang puang uweng isa ngampihala pulaksanai ni, daya Tuhan pamuahi pamulelu ma katuluhan ni, kewangun kami dahuluni haut ngampi itung nelang ngampitamam ma hanyu. ⁷ Daya Alatalla puang nerau takam ma ulahan isa bere murun walehani ulahan isa maeh madia. ⁸ Daya sabab iru hie-hieleh isa puang narime Alatalla isa haut ngami Ruh Barasis ma naun. ⁹ Manyu hal ngalelu sasameh pulaksanai, iru puang usah natulis ma hanyu daya Alatalla haut ngajar naun manyu kewangun sameh pamuahi pamulelu. ¹⁰ iru haut nakaraja daya naun nintu kuan pulaksanai isa naan hang Makedunia, kude kami magun nyamara kamulek, ma naun pulaksanai, himpan naun labis tatu'u ngarajani. ¹¹ Kaliru pada kami hamennyamara himpan naun melum andri ranai, ngurus kuan urusan naun erai, nyalah isa haut napesen kami ma naun. ¹² Andri ngaraja katuluhni ru naun sagar welum nyalah ulun-ulun isa mamaeh dinung ulun isa hang luar iman hampe naun nadinung puang uweng ala kurang. ¹³ Kuan pulaksana'i, kami puang hamen naun hala paham nintu here isa haut matei himpan naun ada mahanang atei nyalah ulun-ulun isa lain isa puang uweng kapastianni hang wuang kaharapen ma handrian andrau ni. ¹⁴ Daya amun takam parisaya neu Yesus isa haut matei nelang mihem'muk, andri kaliru pada Alatalla hang wuang Yesus sagar ngampihem'muk here isa haut mate hang wuang ngaran Ni. ¹⁵ Neu hal iru kami kaeau neu firman Tuhan nintu takam isa magun welum hampen tamian wayah ni pihawian Tuhan himat puang sagar nahuluan here isa haut dahulu matei. ¹⁶ Daya Tuhan erai sa sagar minau teka suruga, tawuk kuan malaikat mahrek nelang nyiwui sangkakala Alatalla maeau, balalu here isa haut matei hang wuang ngaran Kristus sagar labis dahulu mihem'muk. ¹⁷ balalu takam isa magun welum hampe wayah katikani sagat naenat sindrah-sindrah andri here hang wuang awan nyam'mut Tuahan hang amau riwut. Kaliru pada takam sagar slawah-lawahni baya andri Tuhan. ¹⁸ Daya iru tantulu rariu erang kaulun andri isa lainni makai pitataan-pitatan yena.