¹ Naapo Jesu apedza mazwi ake eshe mukuzwa kwevanhu, wakangena muKhapernaume. ² Hloko yenduna yezana, yaidikanwa ndiye, yairwara, iri paduze pokufa. ³ Naapo yazwa ndiJesu, yakatuma kwaari vakuru vevaJudha yechikumbira kuti auye aponese hloko yayo. ⁴ Naapo vakaguma kunaJesu, vakamupota kakurutu vechiti, “Iyo inosisira kuti uyiitire ichi, ⁵ ngokuti inoda dzinza redu, nayo yakatiakira mhatso yedu yokudira”. ⁶ NaJesu wakaenda navo. Naapo aapasinde pemhatso, nduna yezana yakatuma hama dzayo yechiti kwaari, “Mambo, usadzinesa, ngokuti andisisiri kuti iwewe upotere pashi pedenga rangu. ⁷ ndizvo ndapinimidza kuti andisisiri kuuya kwouri ndemene. Asi ronzai izwi, nomuranda wangu unozopona., ⁸ Ngokuti inini neniwo ndiri munhu wakaemeswa pashi pesimba, ndine masoja pashi pangu; neni ndinoti kuneiri, ‘Chienda,’ naro rinoenda, nokunerimweni, ‘Chiuya,’ naro rinouya, nokunemuranda wangu, ‘Chiita ichi,’ naye unochiita. ⁹ Naapo Jesu azwa ichi wakashamiswa ndiyo, naye wakakunukukira kune mbungano yaimuteera, akati kweiri, “Ndinoti kwomuri, andizi kutongomboona kutenda kukurutu kwakadaro, kunyazwi muIsuraeri”. ¹⁰ Naavo vakatumwa vapetuka kumhatso, vakaona muranda apona. ¹¹ Paripo ngesure kweizvo, Jesu wakaenda kudhorobha rinozwi Naini, nevadzidzi vake vakaenda naye nembungano huru. ¹² Naapo echikwedzera pamusiwo wedhorobha, penya, munhu wakafa waitwarwa kubva mudhorobha, uwo waiya ari mukororo umwe ega wamai ake, vaiya shirikadzi; nevanhu vazhinji vedhorobha vaiya naye. ¹³ Naapo Mambo amuona, wakamuzwira urombo, akati kwaari, “Usachema”. ¹⁴ Naye wakakwedzera, akabata ruhlaka, nevatwari vakaema. Wakati, “Jaha, ndinoti kwouri, muka”. ¹⁵ Nouwo waiya afa wakamuka akagara, akatanga kuereketa. Naye wakamupa kunamai ake. ¹⁶ Kutya kwakabata veshe; navo vakairikidza Mwari vechiti, “Muprofeti mukuru wakabuda pakati pedu!” “NaMwari wakahambira vanhu vake”. ¹⁷ Nembiri iyi yakateketeswa ngendaa yake muJudhia mweshe nomunyika dzeshe dzaitendenedza. ¹⁸ NaJohani wakaziiswa izvi zviro zveshe ngevadzidzi vake. NaJohani, echidaidza kwaari vadzidzi vake vairi, ¹⁹ wakavatuma kunaMambo echiti, “Ndiwe here uwo unouya, nokuti ticharindira umweni? ²⁰ Naapo vanhu avo vaguma kwaari, vakati, “Johani Mubhabhatidzi wakatituma kwouri echiti, ‘Ndiwe here uwo unouya, nokuti ticharindira umweni? ²¹ Ngeiro awa wakaponesa vazhinji vairwara ngenhenda nomweya yakashata, nevazhinji vaiya vari mapofu wakavapembenudza. ²² Jesu wakapingura, akati kwavari, “Endai muronzere Johani zvemwaona nezvemwazwa: mapofu anosvinurwa, zvirema zvinohamba, vane mapere vanoshambidzwa, madziiranzee anozwa, vakafa vanomuswa nevarombo vane mashoko akanaka anochumairwa kwavari. ²³ Naye unomuchena usikapumhunwi ndini”. ²⁴ Naapo nhumwa dzaJohani dzaiya dzaenda, Jesu wakatanga kuereketa kune mbungano ngendaa yaJohani echiti, “Mwakabuda kuenda mushango koopenyei? Rutsanga rwakazungunyiswa ngedutu here? ²⁵ Asi mwakabuda kuenda koonenyi? Munhu wakapfekeswa ngemachira akapfaa here? Penyai avo vanopfeka machira akapfaa vanogara mungome. ²⁶ Asi mwakabuda kuenda koonenyi? Muprofeti here? Eya, ndinoti kwomuri nouwo unonyanya kupinda muprofeti. ²⁷ Uyu ndiye wakanyorwa ndiye kwechizwi, ‘Penyai, ndinotuma nhumwa yangu pamberi pehope yako, uwo ndiye unozonasirira njira yako pamberi pako. ²⁸ Ndinoti kwomuri, mukati mwaavo vakaberekwa ngevakadzi akuna mukuru kupinda Johani; asi uwo uri mudoko muumambo hwaMwari uri mukuru kupinda Johani”. ²⁹ Vanhu veshe apo vazwa izvi pamwepo nevabharisi, navo vakatenda kururama kwaMwari, ngokuti vakabhabhatidzwa ngorubhabhatidzo rwaJohani. ³⁰ Asi vaFarisi nemagweta vakadzirambira zano raMwari, vakaramba kubhabhatidzwa ndiJohani. ³¹ ''Ndizvo ndovaedzanisa nenyi vanhu vomubarirwana uyu, vanotodzaniswa nenyi? ³² Vanotodzaniswa nevana vanogara pandau yomusika, vechidaidzana vechiti, ‘Takaridza kwomuri, nemwi amuzi kuzvina; takabonda, nemwi amuzi kuchema’. ³³ Ngokuti Johani Mubhabhatidzi wakauya asikadyi chingwa nokuti kumwa vhini, mwakati, ‘Une dhimoni’. ³⁴ Mwana woMunhu wakauya echidya nokumwa, nemwi mwakati, ‘Penyai, munhu unemakaro nomumwisi wevhini, shamwari yevabharisi neyevashaishi!’ ³⁵ Nokungwara kunopembedzwa ngevana vakwo veshe”. ³⁶ Umwe wevaFarisi wakakumbira kuti adye naye, naye wakapotera mumhatso youwo muFarisi, akagara patafura. ³⁷ Painga nemudzimai womudhorobha, waiya mushaishi, naapo azia kuti wakagara patafura panekudya mumhatso yomuFarisi, wakaunza nhera yemafuta anonuhwira, ³⁸ naye echiema ngesure kwetsoka dzaJesu, echichema, wakatanga kunyakatisa tsoka dzaJesu ngemasodzi ake, akadzipukuta ngebvudzi resoro rake, akachingamidza tsoka dzake ngomuromo, akadzidzodza ngemafuta. ³⁹ Asi muFarisi uwo wakakoka Jesu echiona, wakati mukati mwake, “Uyu munhu dai aiya muprofeti, waidai azia kuti ndiani, nokuti mudzimai uyu wakadini unomubata, ngokuti mushaishi”. ⁴⁰ NaJesu echipingura wakati kwaari, “Simoni, ndinacho chokuereketa newe.” Naye wakati, “Mudzidzisi, chierekete”. ⁴¹ Jesu wakati ''Kwaiyapo munhu wakakweretwa ngevanhu vairi. Umwe wavo wakamukwereta zvigurwa zvesirivha mazana mashanu, noumweni zvigurwa zvesirivha makumi mashanu. ⁴² Naapo vasina chokuripira ndicho, iye wakavarekerera veshe. Ndizvo ndiani kwavari unozopindisisa kumuda? ⁴³ Simoni wakapingura akati, “Ungaita uwo wakarekererwa zvakapinda kuwanda.” Wakati kwaari, “Wanasa kutonga”. ⁴⁴ Jesu echikunukukira kunemudzimai wakati kunaSimoni, “Unomuona here uyu mudzimai? Inini ndapotera mumhatso yako, auzi kundipa mvura yokushamba tsoka dzangu, asi iye wanyakatisa tsoka dzangu ngemasodzi ake, akadzipukuta ngebvudzi rake. ⁴⁵ Iwewe auzi kundipa kisi, asi iye kubvira mukuwo wendapotera ndiwo aazi kurekera kuchingamidza tsoka dzangu ngomuromo. ⁴⁶ Iwewe auzi kudzodza soro rangu ngemafuta, asi iye wadzodza tsoka dzangu ngemafuta. ⁴⁷ Ndizvo ndinoti kwouri, zvishaishi zvake zvakawanda zvarekererwa kwaari, ngokuti iye wada kakurutu. Asi kwaari warekererwa zvishomani, iye unondodawo zvishomani”. ⁴⁸ Naye wakati kwaari, “Zvishaishi zvako zvarekererwa kwouri”. ⁴⁹ Zvino navo vaigara naye patafura panekudya vakatanga kuereketa mukati mwavo vechiti, “Ndiani uyu unokona kurekerera zvishaishi? ⁵⁰ Naye wakati kuno mudzimai, “Kugonda kwako kwakuponesa; enda ngokunyarara”.