¹ Jesu wakavaronzera muedzaniso, kuti vanosisira kundogara vechikumbira vasazoremba., ² Mudhorobha rimweni waiyapo mutongi uwo waiya asikatyi Mwari, asikaremeredzi munhu. ³ Kwayiapo neshirikadzi mudhorobha iro nayo yakagara yechiuya kwaari yechiti, ‘Nditongere ndaa yangu kunegaa rangu’, ⁴ Kwekamukuwo aazi kutenda; asi ngesure kweizvi wakati mukati mwake, ‘Kunyazwi inini ndisikamutyi Mwari nokuti kuremeredza munhu, ⁵ asi ngokuti shirikadzi iyi inondinesa, ndinozoitongera, kuti isazondishisha ngokundogara yechiuya''. ⁶ NaMambo wakati, “Izwai zvaanoronza mutongi usikazi kururama. ⁷ Mwari aazotongeri here vakatsanangurwa vake, avo vanochema kwaari masikati nousiku? Unozononoka kuvadetsera here? ⁸ Ndinomuronzera, kuti unozovatongera ngokukasira. Zvakanyadaro, naapo Mukororo woMunhu ouya, unozoona kugonda panyika here?”. ⁹ Jesu wakaronzazve uyu muedzaniso kunevamweni avo vakadzigonda kuti vari vakarurama vechishoora vamweni: ¹⁰ ''Vanhu vairi vakakwira muTemperi kookumbira, umwe wavo waiya muFarisi noumweni waiya mubharisi. ¹¹ MuFarisi wakaema, akakumbira pachake, akati, ‘Mwari, ndinokubonga ngokuti andizi kudai ngevanhu vamweni, vane makaro, vasikazi kururama, vanoomba nokunyazwi nouyu mubharisi., ¹² Ndinoera kudya kairi ngevhiki, ndinopa chegumi chezviro zveshe zvendinazvo. ¹³ Asi mubhadarisi wemuthero, echiema ari kuretu, aazi kutenda nokumirudza madziso ake kuringira mudenga, asi wakarova diti rake echiti, ‘Mwari, ndiitire nyasha inini mushaishi’, ¹⁴ Ndinomuronzera, uyu munhu wakadzaka kuenda kumhatso yake echipembedzwa kunoumweni; ngokuti munhu weshe unodzikudza unozopfaiswa, asi uwo unodzipfaisa unozokuriswa”. ¹⁵ Zvinopano vaiunza kwaari vana vadoko kuti avabate; naapo vadzidzi vaona, vakavarambidza. ¹⁶ Asi Jesu wakavadaidza kwaari echiti, “Tenderai vana vadoko kuti vauye kwendiri, musavarambidza; ngokuti umambo hwaMwari ngehwevakadai. ¹⁷ Ngegwinyiso ndinoti kwomuri, uwo usikaashiri umambo hwaMwari kudai ngomwana mudoko, aatongozopoterimwo”. ¹⁸ Vamwe varume wakamubvunza echiti, “Mudzidzisi wakanaka, ndinozoitenyi kuti ndigare nhaka yokupona kusikaperi?”, ¹⁹ Jesu wakati kwaari, “Unondidaidza ngenyi kuti wakanaka? Akuna naumwe wakanaka asi Mwari ega. ²⁰ Unozia mipango: ‘Usaomba, usauraya, usaba, usaita chapupu chokunyepa, remeredza baba ako namai ako’. ²¹ Naye wakati, “Izvi zveshe ndakazvingwarira kubvira muudoko hwangu”. ²² Naapo Jesu azwa izvi, wakati kwaari, “Uchatama chiro chimwe. Tengesa zveshe zvounazvo upe kuvarombo, newe unozoa noupfumi mudenga; uuye, unditeere”. ²³ Asi apo azwa izvi wakatambudzika kakurutu, ngokuti waiya mupfumi mukurutu. ²⁴ Jesu echimuringira wakati, “A, kukonzanyi kwezvakaita kuneavo vane upfumi kuti vapotere muumambo hwaMwari! ²⁵ Ngokuti kunopinda kureruka kunekamera kuti ripotere ngepaburi renaiti kuno kuti mupfumi apotere muumambo hwaMwari”. ²⁶ Avo vakazwa izvi vakati, “Ndizvo ndiani ungaponeswa?” ²⁷ Asi Jesu wakati, “Izvo zvisikaitiki kuvanhu zvinoitika kunaMwari”. ²⁸ NaPetro wakati, “Isusu takasiya mizi yedu tikakuteera”. ²⁹ Jesu wakati kwavari, “Ngegwinyiso ndinoti kwomuri, akuna munhu wakasiya muzi nokuti mukadzi nokuti vakoma nokuti vabari nokuti vana, ngepamusoro poumambo hwaMwari, ³⁰ usikazoashiri ngouyu mukuwo zvakawanda zvakahwirinzirwa, panguva inouya unozoashira kupona kusikaperi”. ³¹ Naye wakatora gumi navairi, wakati kwavari, “tinokwira Jerusarema, nazvo zveshe zvakanyorwa ngevaprofeti ngendaa yoMukororo woMunhu zvinozoitika. ³² Ngokuti unozopirwa kunevemadzinza, naye unozoitirwa jee nokutambudzwa nokupfirwa mata; ³³ navo vanozomurova nokumuuraya, ngezuva rechitatu unozomukazve”. ³⁴ Asi avazi kuzwisisa nachimwe cheizvi zviro; neizwi iri raiya rakafishika kwavari, navo avazi kuzwisisa izvo zvakaereketwa. ³⁵ Naapo Jesu echikwedzera pasinde peJerikho, bofu raiya rakagara panjira rechipemha. ³⁶ rechizwa mbungano yechipinda, rakabvunza kuti, “Chiinyi ichi chiri kuitika?” ³⁷ Navo vakarironzera kuti, “Jesu weNazaretha unopinda ngepanapa”. ³⁸ Naro rakadaidzira rikati, “Jesu, mukororo waDhavhidha, ndiitire nyasha!”, ³⁹ Naavo vaiya pamberi vakarikaraidza, kuti rinyarare; asi rakapinda kudaidzira kakurutu rechiti, “Mukororo waDhavhidha, ndiitire nyasha”. ⁴⁰ NaJesu wakaema, akapanga kuti riunzwe kwaari; naapo rakakwedzera pasinde, wakaribvunza kuti,, ⁴¹ “Unoda kuti ndikuitirenyi?” Naro rakati, “Mambo, kuti ndione”. ⁴² Jesu wakati kweriri, “Chiona; kugonda kwako kwakuponesa”. ⁴³ Paripo rakaona, rakamuteera rechikudza Mwari; nembungano yechizviona, yakairikidza Mwari.