¹ jesu wakati kuvadzidzi vake, “Kwaiyapo munhu waiya gurudza, uwo waiya nomungwariri, naye wakaitirwa ndaa yokuti waiparadza pfuma yamambo wake. ² Naye wakamudaidza, akati kwaari, ‘Chiinyi ichi chendinozwa ndiwe? Wechindipa mushumo womushando woungwariri hwako, ngokuti iwewe aungachaiti mungwariri’. ³ Nomungwariri wakati mukati mwake, ‘Ndodini, ngokuti mambo wangu unodusa kwendiri mushando woungwariri hwangu? Andina simba rokurima, ndinenyowa dzokupemha. ⁴ Ndinozia chendinozoita, apo ndadzingwa kubva mumushando woungwariri hwangu, kuti vanhu vazondiashira mumhatso dzavo’. ⁵ Ndizvo mudzwiti echidaidza kwaari veshe vaiya nezvikwereti kunamambo wake umwe ngaumwe, wakati kuneuwo wokutanga, ‘Unechikwereti chakadini kunamambo wangu?’. ⁶ Iye wakati, ‘Zana remabiya emafuta.’ Naye wakati kwaari, ‘Tora tsamba yako ukasire kugara pashi, unyore kuti makumi mashanu’. ⁷ Naapo wakatizve kuno umweni, ‘Iwewe unechikwereti chakadini?’ Naye wakati, ‘Zana rezvitundu zvekoroni.’ Naye wakati kwaari, ‘Tora tsamba yako unyore kuti makumi masere’. ⁸ Namambo wake wakakudza mungwariri wakashata ngokuti yaiya aita ngourimbwi. Ngokuti vanhu veiyi nyika vanopinda kungwara kundanga dzavo kunevanhu vokujeka. ⁹ Neni ndinomuronzera, mwechidziitira shamwari ngoupfumi husikazi kururama, kuti apo hwapera vazomuashira muugaro husikaperi. ¹⁰ Uwo unogondeka ngezvidoodoko unozogondekazve ngezvakawanda; nouwo usikazi kururama ngezvidoodoko aazi kururamazve ngezvakawanda. ¹¹ Ndizvo kuti musikazi kuita vanogondeka ngoupfumi husikazi kururama, ndiani unozomugonda ngoupfumi hwegwinyiso? ¹² Kudai musikazi kuita vanogondeka ngeizvo zvaiya zvevamweni, ndiani unozopa kwomuri izvo zviri zvenyu? ¹³ Apana muranda ungakona kushandira madzimambo mairi; ngokuti unozonyenya umwe ade umweni, nokuti unozobatirira kuneumweni, ashoore umweni. Amungakoni kushandira Mwari neMare”. ¹⁴ VaFarisi, avo vaida mare, vakazwa zveshe izvi, navo vakamusvereredza. ¹⁵ Naye wakati kwavari, “Imwimwi muri avo vanodzipembedza pamberi pevanhu, asi Mwari unozia mwoyo yenyu; ngokuti icho chinoremeredzwa pakati pevanhu, chiri chinonyangadza pamberi paMwari. ¹⁶ Mupango nezvinyorwa zvevaprofeti zvaindoapo metsa kuguma kwaJohani; kubvira ngouwo mukuwo umambo hwaMwari hunochumairwa, nomunhu weshe unopoteramwo ngesimba. ¹⁷ Asi kunopinda kureruka kuti denga nenyika zvipinde, kunekuti kadonhwe kamwe keMipango kakorere kuitika. ¹⁸ Kunyazwi ndiani unoramba mukadzi wake, aroore umweni unoomba, nouwo unomuroora uwo wakarambwa kubva kumwamuna wake unoomba. ¹⁹ Kwaiyapo munhu waiya gurudza, uwo waipfeka machira akatsvukuruka neakachena akanaka echidya zvakanaka mazuva eshe. ²⁰ Kwaiyapozve mupemhi waizwi Razarusi waiiswa pamusiwo wegurudza, akazara ngezvironda, ²¹ waida kudya matsekeneswa aiwa kubva patafura pegurudza; kunyazwi nembwa dzaiuya dzechinambura zvironda zvake. ²² Kwakaitika kuti mupemhi wakafa, akatwarwa ngengirosi kuenda paditi raAbrahama. Negurudza rakafawo rikaikwa; ²³ riri muHaidhesi, rakamirudza madziso aro rechishononwa, rikaona Abrahama ari kuretu naRazarusi ari paditi pake. ²⁴ Naro rakadaidzira rikati, ‘Baba Abrahama, ndiitirei nyasha, tumai Razarusi kuti anyike kumagumo kwechinwe chake mumvura atonhodze rurumi rwangu; ngokuti ndiri mukurwadziwa mumurazvu uyu’. ²⁵ Asi Abrahama wakati, ‘Mwana, karakadza kuti iwewe ngenguva yokupona kwako wakaashira zviro zvako zvakanaka, naRazarusi ngokudaro wakaashira zviro zvakashata; asi zvinopano unoembedzerwa, newe uri mukurwadziwa. ²⁶ Nepadera peizvi zveshe, riripo gaha guru rakaiswa pakati pedu nemwi, kuti avo vanoda kubva uno kuuya kwomuri, avangakoni, zve akuna ungaambuka kubva kwomuri kuuya kwetiri`. <sup>27</sup> Mufhumi wakati, ‘Ndinokupota, baba Abrahama, kuti umutume kumhatso yababa angu,, <sup>28</sup> ngokuti ndine vanun'una vashanu, kuti anase kupupura kwavari, kuti vasazouyawo kundau iyi yokushononwa.’, <sup>29</sup> Asi Abrahama wakati, ‘Vanaye Mosi nevaprofeti; ngavavapurutane`. ³⁰ Asi iye wakati, ‘Haiwa, baba Abrahama; asi kudai umwe akaenda kwavari echibva kwevakafa, vanozotenderuka`. ³¹ Asi iye wakati kwaari, ‘Kudai vasikapurutani Mosi nevaprofeti, avatongozozwi kunyazwi umwe amuka kubva kwevakafa.