¹ Hama, kuti munhu abatwa ngechishaichi, imwimwi voMweya muunziridzirenyi wakadaro ngomweya wokupfaa, wechidzingwarira iwewe pachako newewo usazoedwa. ² Twariranai mitwaro, ngokuita kudaro muzadzise muoango waKristo. ³ Ngokuti daii, munhu echidzipinimidzara kuti urinare kupinda vamweni, apo asikavapindi, iye unodzichengedzaera pachake. ⁴ Asi munhuwese ngaaedze mushando wake wemene; naapo unozodzionera kuti ugangamza ngenyi pachake, haiwa ngomushando womuakirwana; ⁵ Ngokuti munhu wese unozodzitwarira mutwaro wake. ⁶ Asi uwo unodzidziswa izwi ngaakoanisire zviro zvese zvakanaka nomudzidzisi wake. ⁷ Musachengedzerwa: Mwari aaitirwi jee, nokuti munhu unovhuma kunyuzwi ngechiri chaanokusha. ⁸ Ngokuti uwo unodzikushira nyama yake, unozvovhuma kuora kubva kunyama; asi uwo unodzikushira Mweya kupona, unozovhuna kubva kuMweya kupona kusikaperi. ⁹ Tisarembe kuita zvakanaka, ngokuti ngenguva kwayo tinovhuma, kudai tisikademei. ¹⁰ Ndidzo, zvino kudai ngezvetinayo nguva, ngatishande zvakanaka kunevanhu wese, kakurutu kuneovo vari vamhuri yokutenda. ¹¹ Munoona kukura kwetsamba yendakanyora kwomuri ngenyara yangu yemene! ¹² Ndivo avo vanoda kuoneka vari vakanaka munyama, vanomuangigiridza kuti muchekwe; kwega kuti vasazotambudzwa ngendaa yomuchinjiko waKristo. ¹³ Ngokuti kunyazwi naawo vemene vakachekwa, avangwariri Mupango, asi vanechidisisp chokuti muchekwe kuti vaganze ngenyama yenyu. ¹⁴ Asi kusaitika kuti inini ndiganze ngechiro chimweni asi ngomuchinjiko waMammbo wendu Jesu Kristo, kubudikidza ndiwo nyika yakakohomerwa kwendiri, neni ndakakohomerwa kunenyika. ¹⁵ Ngokuti kuchekwa nokuti kusikakwa akuna shwiro, asi kuita chisikwa chitsva kuri zviro zvese. ¹⁶ Kunyarara nenyasha ngazvigare padera pavo vese vanohamba ngouyu murao nepadera pavIsuraeri vaMwari. ¹⁷ Kubvira zvino kusaapo munhu unonditambudza, munhu unonditambudzi, ngokuti nditwara pamuiri wangu magotsa aJesu. ¹⁸ Nyasha dzaMambo Jesu ngadzingare noMweya yenyu,hama. Amen!