¹ Ndinoti, Naapo, kuti, izvi mudyi wenhaka ndumure, aana chaanopinda ndicho muranda, kunyazwi ndiye Mambo wazvo zvese. ² Asi uri pasi pevarindi nevangwariri metsa igume nguva yakaemswa ndibhaba. ³ Ndizvo nesuwo, apo tichiri ndumure, taiya hloyo dzomweya yaitonga mundau dzomundenga. ⁴ Asi apo nguva yakwana, Mwari wakatumira Mukororo wake, wakabarwa ngomukadzimai, wakabarirwa pasi peshi peMupango, ⁵ Kuti aripire avo vaiya pasi peMupango, kuti tiachire urerwa hwokuita vana. ⁶ Ngokuti muri vana waMwari, wakatumira Mweya woMukororo wake mukati mwemwoyo yedu, wechindaidzira wechiti: ''Abha, Baba!'' ⁷ Naapo iwewe auchaiti muranda, asi mwana; kudai uri mwana, unongarawo nhaka kubudikidza ndiMwari. ⁸ Karatu musati mwazia Mwari, mwaiya hloko dzezviro zvechibarirwe zvaiya zvisiri zvimwari? ⁹ Asi zvino mwamuzia Mwari, kakurutu kuzikwana ndiMwari, munoita mapetukirenyi sure kuneiyo mweya yokuamba isina simba neyoubemha, yomunda kusungwazve ndizvo? ¹⁰ Munongwarira mazuva, mwedzi, nguva, nemakore. ¹¹ Ndinomutyira, kuti mushando wangu pakati penyu ungaita usina shwiro. ¹² Ndinomupota, hama, itai mwakandai ndini, ngokuti inini ndakadai ndimwi. Amuzi kundishaishira. ¹³ Zvino munozia kuti indaa yokurwadzirwa kwomuiri kwakaita kuti ndichumaire vhangeri kwomuri pokuntanga; ¹⁴ Kunyazwi kurwara kwangu kwaiya chiedzo kwomuri, amuzi kundinyenya nokuti kundiramba; asi mwakandiashiara kudai ngevanoashira ngirosi yaMwari, kudai ngevanoashira Kristo Jesu. ¹⁵ Kuripai? kudakadza kwenyu, kwemwakadzwa? Nokuti ndinomuitira chapupu imwimwi kuti kudai zvaibvira, mwaizondai mwakabvita madziso enyu mukaapa kwendiri. ¹⁶ Ndizvo ndaita gaa renyu here ngokumuronzera gwinyiso? ¹⁷ Vanotsamwirira kumutsvaka asi haiwa ngejira yakanaka; vanoda kumukonyera kubanze, kuti imwimwi muvatsamirire. ¹⁸ Asi zvakanaka, naapo, kutsamirirwa ngenjira yakanaka ngenguva dzese, haiwa kwega apo ndinemwi. ¹⁹ Vana vangu vadoko, vendinotambudzikira metsa Kristo abarwe mukati mweyu: ²⁰ Ndaida kuti dai ndaiyapo nemwi zvino, kuti ndishandure izwi rangu; ngokuti ndinokangaidzwa ndimwi. ²¹ Ndironzerenyi, imwiwmwi munoda kutongwa ngeMupango, amupurutani Mupago? ²² Ngokuti kwakanyorwa kuti Abrahama waiya nevakororo vairi. ²³ Umwe wakabarwa ngomurakadzi, noumweni wakabarwa ngomukadzi wakasunhurika, ndechigondiso. ²⁴ Izvi zvinechidzidzo chomuendzaniso: ngokuti vakadzi vairi ava muedzaniso wezvitenderano zviiri, Umwe wevakadzi ndiHaga unobva kumtunhu weSinai, unbara vana vouranda. ²⁵ Zvino Hagau induntu reSinai muArabhia, unoedzaniswa neJerusarema rindoripo, ngokuti uri muusungwa pamwepo nevana vake. ²⁶ Asi mukadzi umweni unoedzaniswa neJesrusarema iro rimundenga rakasunhurika; ndivo mai edu. ²⁷ Ngokuti kwakanyorwa kuti: Dakara, iwewe ngomwa usikabari, puriridza, udaidzire, iwewe usikadzikurwadziwa ngokubarwa, ngokuti vanopinda kuwanda vana vanomuka wakasiiwa kunouwo unemwamuna. ²⁸ Zvino imwiwmwi, hama, muri vana, vechigondiso kudai ndiIsaka. ²⁹ Naapo, ngezvakaitika ngouwo mukuwo, iye wakabarwa ngokunda kwoMweya, zvakandodaro nazvino. ³⁰ Asi chinyorwa chinotinyi? Chinoti, dzinga uwo murandakadzi nomukororo wake, ngokuti mukororo womuradakadzi aazongari nhaka pamwepo nomukororo womukadzi wakasunhurika. ³¹ Ndizvo, hama, isusu atiri vanapi vouwo murandakadzi, asi tiri vouwo wakasunhirika.