¹ بِلؔدد کی دوسری تقریر تب بِلؔدد سوخی نے خطاب کر کے کہا کہ۔ ² تُمہاری باتوں کی کب حد ہوگی؟ تُم غور کرو اَور بعد اُس کے ہم بولیں گے۔ ³ ہم کیوں جانوروں کی مانند شُمار کِئے جاتے ہیں۔ اَور کیوں تُمہاری نِگاہ میں ناپاک ہَیں۔ ⁴ اَور تُو جو اپنے غُصّے میں اپنی جان کو پھاڑتا ہے۔ کیا تیری خاطِر زمین بربادہو جائے گی۔ یا چٹان اپنی جگہ سے ہِلا دی جائے گی؟ ⁵ ہاں شریر کا نُور بُجھا دِیا جائے گا۔ اَور اُس کی آگ کا شُعلہ روشنی نہ دے گا۔ ⁶ اُس کے خیمے میں روشنی تارِیک ہو جائے گی۔ اَور اُس کا چراغ اُس پر بُجھا دِیا جائے گا۔ ⁷ اُس کی قُوّت کے قدم چھوٹے کئے جائیں گے۔ اَور اُسی کا منصُوبہ اُسے گِرا دے گا۔ ⁸ کیونکہ اُس کے پاؤں ہی اُسے جال کی طرف لے جائیں گے۔ اَور وہ پھندوں پر چلتا ہے۔ ⁹ جال اُس کی ایڑی کو پکڑلے گا۔ اَور پھندا اُسے مضبُوطی سے جکڑ لے گا۔ ¹⁰ رسی کا پھندااُس کے لئے زمین میں چُھپادیا گیا ہے۔ اَور پھندا اُس کے لئے رستے میں رکھّا گیا ہے۔ ¹¹ دہشت چاروں طرف سے اُسے ڈرائیں گی۔ اَور بلائیں اُس کے در پر ہو کر اُسے بھگائیں گی۔ ¹² اُس کا زور جاتا رہے گا اور آفت اُسے آ دبائے گی۔ ¹³ مرض جو اُس کے چیتھڑے اُڑا دے گی اور موت کا پہلوٹھا اُس کی چمڑی اُدھیڑ دے گا۔ ¹⁴ وہ اپنے خَیمے سے جس پر اُس کا بھروسا ہے۔ اُکھاڑا جائے گا اَور وہ دہشت کے بادشاہ کے آگے حاضِر کِیاجائے گا۔ ¹⁵ جو اُس کا نہیں ہے وہ اُس کے خَیمے میں بسے گا۔ اَور اُس کے مَسکِن پر گندھک برسائی جائے گی۔ ¹⁶ نیچے سے اُس کی جڑیں سُوکھائی جائیں گی اَور اُوپر سے اُس کی شاخیں مُرجھا جائیں گی۔ ¹⁷ اُس کا ذِکر زمین پر سے مِٹا دِیا جائے گا اَور کُوچوں میں اُس کا نام و نشان نہ رہے گا۔ ¹⁸ وہ روشنی سے اندھیرے میں دھکیل دِیا جائے گا۔ اَور دُنیا میں سے ختم کر دِیا جائے گا۔ ¹⁹ اُس کی قوم میں نہ اُس کی نسل اَور نہ اُس کی اولاد ہو گی۔ اَور اُس کے مکانوں میں کوئی باقی نہ رہے گا۔ ²⁰ اہلِ مغرب اُس کا دِن دیکھ کر خوف کھا جائیں گے۔ اہلِ مشرق خوف زَدہ ہوں گے۔ ²¹ یقیناً ۔ شریر کے مَسکِن ایسے ہی ہیں۔ اَور جو خُدا کو نہیں جانتا اُس کی جگہ یہی ہے۔