Msolo 1
1
Paulo, wamuperezo na thangwe la Khilistu Yesu, mdzinza wache wa Timoteo, kuna Filimoni, mwanzathu ule wakuphata naye basa pabodzi,
2
tichiyenda pomwe kuna Afiya nana wathu, na Arikipo nyakhondo mwayathu, na watchalitchi omwe ambagumana munyumba mwako.
3
Mulungu Baba wathu na Mbuya Yesu Khiristu akuchitire bzabwino achikupasani mtendere.
4
Mumapemphero yanu nthawe zense nimbatenda Mulungu,
5
nakuti inepano ndidabva bzachikhulupiliro chaka chino kuna Mbuya Yesu nakufuna kwako pomwe wanthu wense wakuchena moyo .
6
Inepano ndikukumbira kuti chikhulupiliro chire mukuchipasana chiphate basa kwenekwene, tenepo kuti ubvetsetse chilichense chabwino chile ifepano tinacho muna Khilistu.
7
Nakuti ine pano ndikhali wakukomedwa nachilimbikiso kwenekwene na thangwe lakufuna kwako, nakuti mitima ya wanthu wakuchena moyo wa Mulungu yatendewusiwa na thangwe la iwepo, mdzinza.
8
Tenepo, nichadidi kuti inepano ningakhale nako kulimba mtima muna Khilistu pakukuuza iwepo kuchita bzomwe ungabzichite,
9
tenepo na thangwe lachikondi, inepano ndikukudandaulira iwepo m'malomwa__ ine pano, Paulo, na nkhalamba, ndichikhala pomwe wamuperezo na thangwe la Yesu Khilistu.
10
Ine ndikukudandaulira na thangwe la mwanangu Onesimo, wakubaliwa muperezo na inepano.
11
Nakuti akhali wa kusaya basa kuna iwepo, apo tsapano niwakufunika kuna tensepano.
12
Inepano ndikumutuma pomwe kuna imwepo, ule omwe ali ninga mtima wangu.
13
Ndikadafunisisa kukhala naye inepano kuno kuti ambandithandize pambuto pa iwepo pomwe ndili mperezo na thangwe la mafala yabwino ya Mulungu.
14
Soma ndikufuna lini kuchita chilichense ndikanati kukubvunza iwepo. Inepano ndikufunalini kuti mabasa yako yabwino yakhale ninga yakukakamiziwa soma yakhale yamtendere.
15
Pinango na bzobzi iye adatondo kukusiyanisa na imwe kanthawe pangóno tenepo kuti udzakhale naye nthawe zense.
16
Ule ninyabasa lini pomwe, soma wabwinombo kusiyana nanyabasa, m'bale wakufuniwa. Iye niwakukondewa na ine, ambamufuna kwenkwene, apo nitenepoyombo kuna iwepo, pabodzi ku thupi na muna Mbuya.
17
Pamwepo iwepo una inepano ninga mwanzanu, umutambire umweyo ninga inepano.
18
Penu adakuphonyerani imwe pinango anamangawa yaliyense nayiwepo, udzasunde inepano.
19
Inepano, Paulo, ndikulemba bzobzi na boko langu. Inepano, ndekha ninzapereka__ m'psakufuna lini pomwe kukumbusa kuti iwepo udabzifiyalisi moyo wako kuna inepano wekha!
20
Inde, m'dzinza, inepanombo ndipindulembo na iwepo mwa Mbuya; komedwesa mtima wangu mwa Khilistu.
21
Nakukhulupilira kubvera kwako, ndikukunembera iwepo. Ndikudziwa inepano kuti unzachita kwenekwene kusiyana na mule ninga ndidakukumbilira inepano.
22
Panthawe ibodziyi, undikonzere mbuto yakugona inepano, nakuti inepano ndikukumbuka malingana na mapemphero yanu inepano nidzabwera pomwe kuna iwepo.
23
Epafra, mwayangu wa muperezo mwa
Khilistu Yesu, akukumusa iwepo.
24
Ukumusiwa pomwe na Maliko, Aristarko, Dema, Luka, na anyabasa anzangu.
25
Mukhale mu mwayi na Mzimu wa Mbuya wathu Yesu Khilistu. Ameni.