¹ Yawe adasewera kuna Mose mchihema cha kugumanirana mchipululu cha Sinai. Ibzi bzidachitika nsiku yakutoma ya mwezi wachiwiri mkati mwa gole lachiwiri wana wa Isaraeri atabula mdziko la Aigupto. Yawe adati, ² ''Chitisa chilewengero cha wanthu wensene wa mu Isaraeri mwa mabanja yawo, ya mabanja ya abereki wawo. Uwalewenge na madzina yawo. Ulewenge amuna paokha m'bodzi m'bodzi, ³ omwe ana magole makumi mawiri ayai kupitirira paokha. Lewenga wense ndiwo angakwanise kumenya nkhondo ninga achikunda wa Isaraeri paokha. Iwepo na Aloni mulewenge mbogo yawo ya amuna mmathimu yawo yankhondo. ⁴ Pakhale munthu m'bodzi wakuchokera mdzinza lirirense, mkulu wa nyumba, atumikire na imwepo ninga mkulu wadzinza lache. Mkulu aliyense atsogolere wanthu omwe amdzamenya nkhondo ya banja la abereki wache. ⁵ Aya ni madzina ya akulu ndiwo omwe ati amenye nawe nkhondo: ⁶ Kuchoka kudzinza la Rubeni, Elizuri mwana wa Sedeuri; kuchoka ku dzinza la Simeoni, Selumiyeli mwana wa Zurisadai; ⁷ kuchoka kudzinza la Yuda, Nahesoni mwana wa Aminadabu; ⁸ kuchoka kudzinza la Isakara, Nataneli mwana wa Zuwara; ⁹ kuchoka kudzinza la Zebuloni, Eliyabu mwana wa Heloni; ¹⁰ Kuchoka kudzinza la Efraimu mwana wa Yosefe, ELisama mwana wa Amihudi; kuchoka kudzinza la Manase, Gamaliyeli mwana wa Pedazuri; ¹¹ kuchoka kudzinza la Benjami, Abidana mwana wa Gideoni; ¹² Kuchoka kudzinza la Dani, Ahiyezeri mwana wa Amisadai; ¹³ kuchoka kudzinza la Aseri, Pagiyeli mwana wa Okirani; ¹⁴ kuchoka kudzinza la Gadi, Eliyasafe mwana wa Deyueli; ¹⁵ na kuchoka kudzinza la Nafitali, Ahira mwana wa Enani. ¹⁶ Awa akhali wanthu wakuchemeriwa kuchoka mwa wanthu. Adatsogolera madzinza ya abereki wawo. Akhali akulu wa miyi ya mu Isaraeri. ¹⁷ Mose na Aloni adatenga wanthu amwewa, omwe adagumiwa madzina yawo, ¹⁸ achigwezeka wanthu wensene pabodzi nsiku yakutoma ya mwezi wachiwiri. Amuna wa magole makumi mawiri na kupitirira kuwalewenga na dzina la abereki wawo, na mitupo, na mabanja ya abereki wawo. Iwo adalewengewa dzina m'bodzi m'bodzi. ¹⁹ Kinangoka Mose adawalewenga kuwanda kwawo mchipululu cha Sinai, ninga ndimo Yawe adawatongera kuchita. ²⁰ Kuchoka kwa wana wa Rubeni, mwana wakutoma wa Isaraeri, kuchoka ku chilewengero, cha mitupo yawo, na mabanja ya abereki wawo, madzina ya amuna wa magole mawiri ayai kupitirira, wakukwanisa kuyenda ku nkhondo, adalewengiwa m'bodzi na m'bodzi. ²¹ Adakwana 46,500 wanthu wakuchoka mdzinza la Rubeni. ²² Kuchoka kwa wana wa Simeoni, kuchoka ku bzakunemba, bza mitupo yawo, na mabanja ya abereki wawo, madzina ya wanthu wensene wa magole makumi mawiri ayai kupitirira, wakukwanisa kuyenda ku nkhondo, adalewengiwa m'bodzi m'bodzi. ²³ Adakwana 59,300 wanthu wadzinza la Simeoni. ²⁴ Kuchoka kwa wana wa Gadi, kubzakunemba, bza mitupo yawo, na mabanja ya abereki wawo, madzina ya wanthu wamagole makumi mawiri ayai kupitirira, wakukwanisa kuyenda ku nkhondo, adalewengiwa. ²⁵ Adakwana 45,650 wanthu wakuchoka mdzinza la Gadi. ²⁶ Kuchoka kwa wana wa Yuda, kubzakunemba, bza mitupo yawo, na mabanja ya abereki wawo, madzina ya wanthu wensene wa magole makumi mawiri ayai kupitirira, wakukwanisa kuyenda ku nkhondo, adalewengiwa. ²⁷ Adakwana 74,600 wanthu wakuchoka mdzinza la Yuda. ²⁸ Kuchoka kwa wana wa Isakara, kubzakunemba, na mitupo yawo, na mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda, yadalewengiwa. ²⁹ Adakwana 54,400 wanthu wakuchokera mdzinza la Isakara. ³⁰ Kuchoka kwa wana wa Zebuloni, ku bzakunemba, na mitupo yawo, ya mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda kunkhondo, adalewengiwa. ³¹ Adakwana 57,400 wanthu wakuchoka mdzinza la Zebuloni. ^{32 33} Kuchoka kwa wana wa Efraimu mwana wa Yosefe, kuchoka ku bzakunemba, na mitupo yawo, ya mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda kunkhondo, adalewengiwa. Adakwana 40,500 wanthu wakuchoka mdzinza la Efraimu. ³⁴ Kuchoka kwa wana wa Manase mwana wa Yosefe, kuchoka mu bzakunemba, na mitupo yawo, na mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda ku nkhondo, adalewengiwa. ³⁵ Adakwana 32,200 wanthu wamdzinza la Manase. ³⁶ Kuchoka kwa wana wa Benjami, kuchoka mubzakunemba, na mitupo yawo, na mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda kunkhondo, adalewengiwa. ³⁷ Adakwana 35,400 wanthu wamdzinza la Benjami. ³⁸ Kuchoka kwa wana wa Dani, kuchoka mubzakunemba, bza mitupo yawo, na mabanja ya abereki wawo, madzina yensene ya wanthu wamagole makumi mawiri ayai kupitirira, wakukwanisa kuyenda ku nkhondo, adalewengiwa. ³⁹ Adakwana 62,700 kuchoka mdzinza la Dani. ⁴⁰ Kuchoka kwa wana wa Aseri, kuchoka mu bzakunemba, na mitupo yawo, na mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda ku nkhondo, adalewengiwa. ⁴¹ Adakwana 41,500 wanthu wamdzinza la Aseri. ⁴² Kuchoka kwa wana wa Nafitali, kuchoka mubzakunemba bzawo, na mitupo yawo, na mabanja ya abereki wawo, madzina ya wanthu wensene wamagole makumi mawiri ayai kupitirira, wakukwanisa kuyenda kunkhondo, adalewengiwa. ⁴³ Adakwana 53,400 kuchoka mdzinza la Nafitali. ⁴⁴ Mose na Aloni adalewenga wanthu wensenewa, pabodzi na wanthu khumi na awiri ndiwo akhatsogolera Isaraeri, aliyense wakuchokera kubanja la abereki wache. ⁴⁵ Ndiye wana wensene wa Isaraeri wakuyambira magole makumi mawiri na kupitirira, wensene omwe angadakwanisa kumenya nkhondo, adalewengiwa paokha paokha mmabanja ya abereki wawo. ⁴⁶ Adakwana wanthu 603,550. ⁴⁷ Soma Alevi alibe kulewengiwa mwakuteweza madzinza ya abereki wawo ⁴⁸ thangwe Yawe akhadati kuna Mose, ⁴⁹ ''Nampodi kulewenga wadzinza la Alevi ayai kuwaphatanidza mchilewngero cha wana wa Isaraeri. ⁵⁰ Soma, muwaikhe Alevi akoye kachisi wa ntchirimiko za mpangano, na kukoya madekesero ya mkachisi na chirichense ndicho chiri momo. Alevi atakule kachisi, na kutakula bzakudekesera bza mkachisi. Atchenkhe kachisi na kumanga tsasa lawo kuzungulira. ⁵¹ Pa nthawe ndiyo kachisi akufulusiwa kuyenda mbuto inango, Alevi augwese. Pomwe kachisi akukamangiwa, alevi akaumange. Mulendo wakufendera pafupi na kachisiyo aphiwe. ⁵² Wana wa Isaraeri angamanga ma tsasa yawo, munthu aliyense achitembo tenepoyo pafupi na chakulatiza phathi la achikunda wache wankhondo. ⁵³ Soma, Alevi amange matsasa yawo kuzungulira kachisi wa ntchirimiko za mpangano pala kuti kukalipa kwangu nampodi kufikire wana wa Isaraeri. Alevi achite bzakulinga bza kachisi wa ntchirimiko za mpangano.'' ⁵⁴ Wana wa Isaraeri adachita bzinthu bzensenebzi. Iwo adachita bzensene ndibzo Yawe adatonga kudzera mwa Mose.