¹ Atabadwa Yesu ku Betelehemu waku Yudeya mu nthawi ya mfumu Herodi, adafika ku Yelusalemu amuna wa nzeru kuchokera ku machibese mkulewa, ² ''Iri kuponi Mfumu ya Ayuda yomwe ya badwayo? Tawona nthanda yache yakumachibese yabwera kudzamunamatira iye.'' ³ Pomwe mfumu Helodi adabva bzimwebzi, adabonela mumtima, pabodzi na wanthu wense mu Yerusalemu. ⁴ Herodi adachemelesa wanthu wense akulu wa nsembe na apfunzisi wa malamulo, apo adawabvunza iwo, ''Kodi Mkhirisitu anzabadwila kuponi?'' ⁵ Iwo adamutawira iye, ''Betelehemu wa Yudeya, thangwe ibzi mbzomwe adanemba aneneri, ⁶ 'Tsono iwe, Betelehemu, mbali ya Yuda, ndiwe lini wakumalizira pa atongi wachi Yuda, pakuti anyakutsogolera amdzachoka mwa iwe, omwe anzatsogolera wanthu wangu Aizalaeri.''' ⁷ Tsapano Herodi adachemera amuna wanzeluwo zawo mkuwabvunza nthawi chayiyo ndiyo adawona nthandayo. ⁸ Iye adawatumiza ku Betelehemu, achiti, ''Ndokoni mukapsage mwanayo palipense. Mungakamugumana, mudzandiuzembo pala kuti inembo ndikamunamatire iye.'' ⁹ Atamala kubvera mafala ya mfumu, adanyamuka ulendo bwawo, ndipo nyenyezi yomwe adayiwona kumachibese ile idawatsogolera ate ichikayima pulu mdzaulu pomwe mwana ule akhali. ¹⁰ Pomwe adawona nyenyeziyo, adasekera kwenekwene. ¹¹ Adapita mnyumbamo mkuwona mwanayo pabodzi na mayi wache Mariya. Adagodama mkumpembedza iye. Adatsudzula pamwepo mitolo yawo mkupeleka mpfupo zawo za kobiri za golide, lubani, na mure. ¹² Mulungu ku atulo adawapasa basopo kuti nampodi kudzela kuna Herodi, mwakuti pakubwereradi kudziko lakwawo adadzela njira inango. ¹³ Pambuyo atachoka, mnjelo wa mbuya adawonekera kuna Yosefe kutulo achiti, ''Muka, thawa naye mwanayu na mayi wache, thawira ku ku Aiguputo. Kakhaleni koko ate ndidzakuuzeni, thangwe Herodi amdzamupsaga mwanako pala adzakuphele.'' ¹⁴ Usiku bumwebo Yosefe adamuka mkunyamula mwanayo pabodzi na mayi wache ulendo bwa ku Aiguputo. ¹⁵ Adakhaladi kuoko ate Herodi kusaika. Ibzi bzidakwanirisa mafala ndiyo Mbuya adasewera kudzela kwa mneneli kuti, ''Kubula mu Aiguputo ndadachemela mwanangu.'' ¹⁶ Tsapano Herodi, pomwe adabulukila kuti wanzeruwo adampusisa adabva chiya kwenekwene. Iye adatonga kuti wana wense wachimuna mu Betelehemu na miyi yense yakuzungulira wakuyambila magole mawiri kubwerera m'buyo aphiwe, malingana na nthawi yomwe iye adaganizira ndendende kuchoka kuna wanzeru wacheo. ¹⁷ Apo bzidakwanirisiwa bzomwe bzidalewedwa na mneneli Yelemiya, kuti, ¹⁸ ''Kulila kukubveka ku Rama, kubula na kulira, Rakelo kulilira wana wache, apo iye akulamba kunyamaliziwa, thangwe wana wache palibe.'' ¹⁹ Pomwe Herodi adasaika, onani, mnjelo wa Mbuya adamuwonekela Yosefe kutulo ku Aiguputo kulewa kuti, ²⁰ ''Muka tenga mwanayo na mayi wache ndoko kudziko la Izalayeli, pakuti omwe akhafuna kuchosa moyo wa mwanayo adasaika.'' ²¹ Yosefe adalamuka, achitenga mwanayo na mayi wache, kuyenda kudziko la Izalayeli. ²² Soma atabva kuti Alekiyesi akutonga mu Yudeya kupita nthaka ya babache Herodi, adagopa kuyenda kumweko. Atachenjeziwa na Mulungu kutulo, adayenda ku Galileya ²³ adayenda mkukakhazikika ku Nazaleti. Ibzi bzidakwanirisa bzomwe adalewa aneneri, kuti anzachemeliwa Mnazareni.