¹ Paulo, mtumiki-- neye mtumiki wakuchokera kuna wanthu pinango mwa munthu, soma mwa Yesu khilisitu na Mulungu Baba wathu, ndiye adamulamukisa iye kwakufa-- ² na adzinza ndiwo alipabodzi na ine, ku matchalitchi ya ku Agalatiya: ³ Chisomo kuna imwe na mtendere wakuchoka kuna Mulungu Baba wathu na Mbuya Yesu khilisitu, ⁴ womwe adabzipereka yekha thangwe la bzakuphonya bzathu kuti akatiletsetse ife ku nthawe ya bzakuipa bzathu, ninga chakuna cha Mulungu na Baba wathu, ⁵ kuna iye kukhale ulemelero bwa nthawe za nthawe. Amen. ⁶ Ndikudabwisika kuti mukupupsika kamangu kuchoka kuna iye ndiye adakuchemelani imwe na chisomo cha Khilistu. Ndikudabwisika kuti mukupupsikira ku uthenga bwakusiyana, ⁷ neye thangwe lakuti kuna uthenga bwinango, soma kuti kuna amuna winango ndiwo ambayambisa mabvuto na kupotoloza uthenga bwa Khilsitu. ⁸ Soma penu ndifepano pinango angero wakuchokera kuna kudzulu akukulalikirani uthenga bwakusiyana na ndimo tidakulalikirani, iye am'khala wa kutembelelewa. ⁹ Ninga ndimo tidalewa kale, tsapano ndikulewa pomwe, ''Penu winango amkulalikirani uthenga bwakusiyana na bomwe mudabutambira, iye am'khala wakutembelelewa.'' ¹⁰ Nakuti tsapano ndikunyang'ana kukondelewa kuna wanthu pinango Mulungu? Ndikunyang'ana kukomedwesa wanthu? Penu nimpitiliza kuyezera kukomedwesa wanthu, ndinelini nyabasa wa Khilisitu. ¹¹ Pakuti nimfuna kukudziwisani, adzinza, kuti uthenga ndibo ndidalalika neye bwamunthu. ¹² Ndilibe kubutambira kuchoka kuna munthu waliwense, pinango kukupfunzisa. M'malo mwache, ni thangwe la kuvumbulusiwa kwa Yesu Khilistu kuna imwe. ¹³ Imwe mudabva kale bza makhalidwe yangu mwa chiyuda, kuti ndidalondalonda mpingo wa Mulungu kwelekwene na kuuyezera kuti ndiupfudze. ¹⁴ Ndidawaposa na kutsogola mwa achi Yuda azinji ndiwo ali wa misensela yangu, kuchokera kuna wanthu wa thundu wangu. Apo ndidakhal wa kutsogola kuposa miymbo ya abeleki wangu. ¹⁵ Soma pomwe Mulungu, adandisankula ine kundipambula kuchoka m'mimba mwa mayi wangu na kundichemera kudzera mu chisomo, kuti azimbure ¹⁶ mwana wache kuna ine, kuti ndimulalikire iye kuna Wanthu wa Mitundu, ndilibe kubvunzana na thupi na mulopa. ¹⁷ Ndilibe kuyenda ku Yerusalemu ndiko kuna iwo ndiwo adakhala atumiki ndikanati kukhala ine. M'malo mwache, ndidayenda ku Arabiya kinangoko ndidabwelela ku Damasiko. ¹⁸ Kenangoka padapita magole matatu ndidayenda ku Yerusalemu kukadziwana na Kefa ndipo ndidakhala naye mnsiku khumi na zichanu. ¹⁹ Soma ndilibe kuona winango mwa atumiki kupambula Yakobo, m'dzinza wa Mbuya. ²⁰ Mu bzomwe ndidanemba kuna imwe, ndikukutsimikzirani pamaso pa Mulungu kuti ndikunamalini. ²¹ Kinangoko ndidayenda kumbari za ku Siriya na ku Kilisiya. ²² Soma ine ndikhali wakusaya kudziwika nkhope yangu ku matchalitchi ya ku Yudeya ndiyo yakhali mwa Khilisitu. ²³ Akhandokubva bzikulewedwa, ''Kuti ule ndiye akhatilondalonda kalekale lire tsapano akulalalikira nkhani yabwino ya chikhulupiliro ndichoadayezera kuchidzonga.'' ²⁴ Ndipo akulemekeza Mulungu thangwe la ine.